Roˉma‸ li‸ 15
15
1Ngaˬ hui awˬ gʼaˇ uiˍ ve chaw teˇ hpaˍ lehˬ, a shu yawˇ ve a loˍ awˬ hkʼaˇ suh maˇ te leh, awˬ gʼaˇ nuˇ ve chaw hui gʼaˇ nuˇ ve awˬ ceuˬ teˇ hpaˍ hta‸ yeunˇ hkanˍ cawˇ ve yoˬ. 2Ngaˬ hui teˇ gʼaˇ le le, a shu yawˇ awˬ paˇ awˬ kui lo chehˇ ve chaw hui hta‸ da‸ la uiˍ la tuˬ awˬ pon, yawˇ hui nyi ma cawˇ tuˬ te piˇ-a veuˬ. 3Awˬ lawn kʼo, Hkri‸ htawˇ yawˇ awˬ to nyi ma cawˇ ve hta‸ yawˇ maˇ te. Li‸ hpu hkʼaw bvuh‸ taˍ ve hkʼe, Nawˬ hta‸ hkʼaiˉ ve chaw teˇ hpaˍ, yawˇ hui hkʼaiˉ ve tawˇ hkawˇ ngaˬ awˬ hkʼoˆ gaˬ la peuˬ teh‸ bvuh‸ taˍ ve yoˬ.#Chi 69:9 4Awˬ lawn kʼo, aˬ sho-eˬ htaˇ hkʼa bvuh‸ taˍ ve teˇ hpaˍ lehˬ, ngaˬ hui hta‸ maˍ laˇ tuˬ ve awˬ pon bvuh‸ taˍ ve yoˬ. Hkʼe te leh, ngaˬ hui yeunˇ hkanˍ leh Li‸ hpu awˬ hkʼaw lo dawˇ sha ve hta‸ gʼa ve pa taw, dawˇ law tuˬ cawˬ ve yoˬ. 5Yeˍsuˆ Hkri‸ awˬ hkʼaw lo nawˬ hui teˇ gʼaˇ leh teˇ gʼaˇ htaˇ da‸ hawˍ da‸ tuˬ, yeunˇ hkanˍ puiˉ leh dawˇ sha piˇ puiˉ ve Gʼuiˬ sha lehˬ nawˬ hui hta‸ sheh kʼai piˇ lawˬ-o‸. 6Hkʼe te leh, nawˬ hui nyi ma teˇ shiˍ tiˉ te leh, ngaˬ hui ve Jawˇmawˇ Yeˍsuˆ Hkri‸ ve Awˬ pa Gʼuiˬsha hta‸ chiˇ uiˍ chiˇ mvuh hkawˇ teˇ hkawˇ tiˉ chiˇ mvuh hpeh‸ tuˬ yoˬ.
Buiˇ shaˆ aˉ naˆ chaw hui hta‸ ha lehˬ ve bon hkawˇ maˍ piˇ ve
7Hkʼe te leh, Gʼuiˬsha hta‸ awˬ me‸ awˬ hponˇ cawˬ piˇ lawˬ tuˬ, Hkri‸ nawˬ hui hta‸ ha‸ yuˬ ve hkʼe, nawˬ hui teˇ gʼaˇ leh teˇ gʼaˇ hta‸ ha‸ yuˬ-o‸. 8Awˬ lawn kʼo, Gʼuiˬsha ve hteˇ ve awˬ ceuˬ awˬ pon Hkri‸ lehˬ, awˬ guiˬ meuˇ shoˍ ve chaw hui ve awˬ ceˬ hpeh‸ la ve yoˬ teh‸ ngaˬ kʼoˆ ve yoˬ. Hkʼaˬ hkʼe te leh, awˬ puˍ lonˉ hui hta‸ piˇ taˍ ve ka ti‸ teˇ hpaˍ yeˬ la tuˬ leh, 9yawˇ ha kʼaˉ puiˉ ve hta‸ pa taw buiˇ shaˆ aˉ naˆ chaw hui Gʼuiˬsha hta‸ chiˇ uiˍ chiˇ mvuh tuˬ, Hkri‸ lehˬ awˬ guiˬ meuˇ shoˍ ve chaw hui ve awˬ ceˬ hpeh‸ la ve yoˬ, Li‸ hpu hkʼaw bvuh‸ taˍ ve hkʼe,
Chi hta‸ pa taw, buiˇshaˆaˉnaˆ chaw hui awˬ hkʼaw lo
ngaˬ nawˬ hta‸ chiˇ mvuh leh,
nawˬ ve awˬ meh hta‸ kʼa muiˬ chiˇ mvuh tuˬ yoˬ, teh‸ bvuh‸ taˍ ve yoˬ.#Chi 18:49
10Teˇ pawˆ kʼaw‸ kʼoˆ ve,
Buiˇ shaˆ aˉ naˆ chaw teˇ hpaˍ-oˬ,
yawˇ ve chaw hui geh teˇ geh ha lehˬ-o‸, teh‸ bvuh‸ taˍ ve yoˬ.#Bon 32:43
11Teˇ pawˆ kʼaw‸ kʼoˆ sheˍ ve,
Buiˇ shaˆ aˉ naˆ chaw hkʼa peu-eˬ
Jawˇmawˇ Gʼuiˬsha hta‸ chiˇ mvuh-o.
Chaw ceuˬ hkʼa peu-eˬ yawˇ hta‸ chiˇ mvuh piˇ lawˬ-o‸, teh‸ kʼoˆ ve yoˬ.#Chi 117:1
12Iˉsaˍyaˆ htawˇ teˇ pawˆ kʼoˆ ve,
Yeˍsehˇ ve awˬ geu lo awˬ caˍ caˍ la tuˬ yoˬ.
Buiˇ shaˆ aˉ naˆ chaw hui hta‸ uˉ peunˍ tuˬ yawˇ tawˆ la leh,
buiˇshaˆaˉnaˆ chaw hui
yawˇ awˬ hkʼaw lo dawˇ law kuiˬ cawˬ tuˬ yoˬ, teh‸ kʼoˆ taˍ ve yoˬ.#Isy 11:1, 10
13Da‸ ve kehˬ ve Awˬ ha hpu ve kanˇ paˆ hta‸ pa taw, dawˇ law ve awˬ hkʼaw lo nawˬ hui biˇ la tuˬ, dawˇ law tuˬ cawˬ la piˇ ve Gʼuiˬ sha lehˬ, nawˬ hui yonˍ ve awˬ hkʼaw lo ha lehˬ dawˇ sha ve teˇ ceuˬ le le biˇ la piˇ-oˆ.
14Ngaˬ ve awˬ viˉ awˬ nyi teˇ hpaˍ-oˬ, nawˬ hui lehˬ da‸ ve awˬ ceuˬ hkʼa biˇ cawˬ ve chaw, shiˍ puiˉ ve teˇ ceuˬ biˇ ve chaw leh, nawˬ hui teˇ gʼaˇ leh teˇ gʼaˇ maˍ da‸ puiˉ ve chaw hpeh‸ ve yoˬ teh‸ ngaˬ yonˍ ve yoˬ. 15Ngaˬ lehˬ, buiˇshaˆaˉnaˆ chaw hui awˬ pon Yeˍsuˆ Hkri‸ ve paw hkuˇ te tuˬ Gʼuiˬ sha ngaˬ hta‸ awˬ bon pe‸ laˇ ve pa taw, nawˬ hui hta‸ awˬ lawn teˇ hpaˍ hpaˍ dawˇ nawˇ piˇ tuˬ ngaˬ nyi ma ha‸ hanˉ te leh, li‸ chi bvuh‸ laˇ ve yoˬ. 16Da‸ ve kehˬ ve Awˬ ha hpu lehˬ, buiˇ shaˆ aˉ naˆ chaw hui hta‸ da‸ piˇ kehˬ piˇ ve pa taw, yawˇ hui hta‸ tanˇ tuˬ hkʼe Gʼuiˬsha hta‸ tanˇ piˇ ve teˇ yanˇ yawˇ nyi ma cawˇ tuˬ, ngaˬ lehˬ Gʼuiˬsha ve ha lehˬ ve bon hkawˇ maˍ piˇ shehˍ hpaˇ hpeh‸ ve yoˬ. 17Hkʼe te leh, Gʼuiˬsha hta‸ caˉ da‸ ve teˇ hpaˍ awˬ hkʼaw lo, Yeˍsuˆ Hkri‸ hta‸ pa taw ngaˬ nyi ma uiˍ kuiˬ cawˬ ve yoˬ. 18Awˬ lawn kʼo, buiˇshaˆaˉnaˆ chaw hui na yuˬ tuˬ, tawˇ yaw leh kanˉ te ve maˇ kʼoˆ, awˬ heˆ leh anˇ tuˬ ve kanˇ paˆ awˬ hkʼaw lo maˇ kʼoˆ, da‸ ve kehˬ ve Awˬ ha hpu ve kanˇ paˆ awˬ hkʼaw lo maˇ kʼoˆ, Hkri‸ ngaˬ hta‸ cuˇ leh te ve teˇ hpaˍ awˬ lawn maˇ heˆ kʼo, awˬ kaˍ awˬ nu awˬ lawn te‸ chiˉ ka‸ ngaˬ maˇ ca kʼoˆ. 19Chi hta‸ pa taw, Yeˍruˆsaˍlehnˍ venˇ te leh Iˇluˇriˆ mvuhˇmiˬ hkʼa gaˬ, hkʼa caw zuhˇ Hkri‸ ve ha lehˬ ve bon hkawˇ ngaˬ hkʼa deh‸ maˍ piˇ peuˬ. 20Yehˬ awˬ hkuiˉ puiˍ hta‸ shu te taˍ ve awˬ hkʼoˆ hta‸ ngaˬ maˇ kʼaw‸ caˉ te tuˬ, Hkri‸ ve awˬ meh hta‸ maˇ gʼa kaˇ jaw sheˍ ve chehˇ kuiˬ teˇ hpaˍ awˬ hkʼaw lo ceh tiˉ ngaˬ ha lehˬ ve bon hkawˇ maˍ piˇ gaˇ jaˇ ve yoˬ. 21Li‸ hpu hkʼaw bvuh‸ taˍ ve hkʼe,
Yawˇ ve awˬ lawn hta‸ shu
maˇ hto piˇ jaw htawˇ, yawˇ hui gʼa mawˬ tuˬ yoˬ.
Yawˇ ve awˬ lawn maˇ gʼa kaˇ jaw htawˇ, yawˇ hui gʼa shiˍ tuˬ yoˬ, teh‸ bvuh‸ taˍ ve yoˬ.#Isy 52:15
Roˉma‸ venˇ lo kʼai tuˬ Pawˇlu‸ dawˇ taˍ ve
22Chi hta‸ pa taw, nawˬ hui geh ngaˬ maˇ gʼa gaˬ la tuˬ laiˉ pawˆ ngaˬ hta‸ tawˍ taˍ laˇ ve awˬ ceuˬ cawˬ ve yoˬ. 23Chi beu‸ lehˬ, mvuhˇmiˬ chi teˇ hpaˍ awˬ hkʼaw lo kanˉ te kuiˬ maˇ kʼaw‸ cawˬ leh, laiˉ hkʼaw‸ nawˬ hui geh ngaˬ laˬ gaˇ jaˇ ve pa taw, 24Saˍpenˍ mvuhˇmiˬ lo ngaˬ kʼai ve teˇ yanˇ, nawˬ hui geh ca guiˇ taˉ tuˬ dawˇ law taˍ ve yoˬ. Nawˬ hui geh teˇ tcuhˉ teˇ jaw awˬ chawˇ te da‸ peuˬ hkʼaw‸ nawˉ, mvuhˇmiˬ oˇ ve lo nawˬ hui ngaˬ hta‸ peu kʼai laˇ tuˬ htawˇ ngaˬ dawˇ law chehˇ ve yoˬ. 25Ya‸ hkʼaˇ, Hkri‸ yaˇ hui hta‸ ga piˇ tuˬ, chi beu‸ Yeˍruˆsaˍlehnˍ venˇ lo ngaˬ kʼai ve yoˬ. 26Awˬ lawn kʼo, Maˍkeˍdawˇniˆ mvuhˇmiˬ leh Aˍhkaˍyaˆ mvuhˇmiˬ hkʼaw chehˇ ve chaw teˇ hpaˍ lehˬ, Yeˍruˆsaˍlehnˍ venˇ hkʼaw chehˇ ve Hkri‸ yaˇ hui awˬ hkʼaw lo haˍ ve gʼawˇ ve chaw hui hta‸ mawˇ jeˬ pehˬ piˇ tuˬ, yawˇ hui ha lehˬ ha kʼa ga piˇ taˍ ve yoˬ. 27Yawˇ hui ha lehˬ ha kʼa ga piˇ ve lehˬ, awˬ bon kʼaw‸ te hkʼaw‸ piˇ ve teˇ ceuˬ yoˬ. Awˬ lawn kʼo, co ha hpawˇ Yuˇda‸ chaw hui ve awˬ bon teˇ hpaˍ hta‸ buiˇshaˆaˉnaˆ chaw hui htawˇ gʼa ve kʼo, awˬ suhˍ awˬ shaˍ hpawˇ ve mawˇ jeˬ teˇ hpaˍ yawˇ hui lehˬ, Yuˇda‸ chaw hui hta‸ kʼaw‸ ga piˇ cawˇ ve yoˬ. 28Hkʼe te leh, kanˉ chi hta‸ ngaˬ te peuˬ leh, la‸ shawnˍ chi teˇ hpaˍ yawˇ hui hta‸ chiˇ a‸ piˇ peuˬ hkʼaw‸ nawˉ, nawˬ hui geh te leh Saˍpenˍ mvuhˇmiˬ lo ngaˬ kʼai tuˬ yoˬ. 29Ngaˬ nawˬ hui geh gaˬ la htaˇ, Hkri‸ ve awˬ bon hkʼa biˇ cawˬ ve awˬ hkʼaw lo gaˬ la tuˬ ve hta‸ ngaˬ shiˍ ve yoˬ.
30Awˬ viˉ awˬ nyi teˇ hpaˍ-oˬ, ngaˬ hui ve Jawˇmawˇ Yeˍsuˆ Hkri‸ hta‸ pa taw maˇ kʼoˆ, Awˬ ha hpu ve ha‸ da‸ pehnˇ da‸ ve hta‸ pa taw maˇ kʼoˆ, ngaˬ nawˬ hui hta‸ chi hkʼe lawˬ hkawˉ ve yoˬ. 31Yuˇda‸ mvuhˇmiˬ awˬ hkʼaw lo maˇ na yuˬ puiˉ ve chaw hui la‸ hkʼaw ngaˬ gʼa ponˬ leh, Yeˍruˆsaˍlehnˍ chaw hui awˬ pon ngaˬ gʼa te ve kanˉ teˇ hpaˍ hta‸ Hkri‸ yaˇ hui nyi hkʼaˇ suh tuˬ, ngaˬ awˬ pon bon ga lawˬ laˆ mehˍ. 32Chi hkʼoˆ ka‸, Gʼuiˬsha ve a loˍ hta‸ pa taw ha lehˬ ha kʼa nawˬ hui geh gʼa gaˬ la tuˬ leh, nawˬ hui geh ngaˬ awˬ gʼaˇ kʼaw‸ gʼa tuˬ, ngaˬ geh teˇ geh Gʼuiˬsha hta‸ bon gʼaˇ hte‸ ga lawˬ laˇ-oˆ teh‸, nawˬ hui hta‸ lawˬ hkawˉ ve yoˬ. 33Dawˇ sha piˇ shehˍ hpaˇ Gʼuiˬsha lehˬ, nawˬ hui hkʼa peu-eˬ geh chehˇ piˇ-oˆ. A menˬ.
Currently Selected:
Roˉma‸ li‸ 15: LHBE
Highlight
Share
Copy
Want to have your highlights saved across all your devices? Sign up or sign in
Lahu Bible Edited © Thailand Bible Society and Bible Society of Myanmar, 2010, 2020.