Roˉma‸ li‸ 14
14
Yonˍ ve nyi ma awˬ gʼaˇ nuˇ ve chaw awˬ lawn
1Yonˍ ve nyi ma awˬ gʼaˇ nuˇ ve chaw hta‸ ha‸ yuˬ-o‸. Ya‸ hkʼaˇ, dawˇ hkʼaˇ maˇ hawˍ da‸ ve teˇ hpaˍ awˬ lawn yawˇ geh tawˇ gʼawˬ da‸ tuˬ awˬ pon ha‸ yuˬ ve taˇ te. 2Chaw teˇ gʼaˇ lehˬ, caˇ tuˬ teˇ ceuˬ le le hta‸ caˇ hpeh‸ ve teh‸ yonˍ ve yoˬ. Ya‸ hkʼaˇ yonˍ ve nyi ma awˬ gʼaˇ nuˇ ve chaw teˇ gʼaˇ lehˬ, gʼawˇ hpa‸ mvuhˬ naweh hta‸ ceh tiˉ caˇ ve yoˬ. 3Teˇ ceuˬ le le hta‸ caˇ ve chaw lehˬ, maˇ caˇ ve chaw hta‸ maˇ shawˍ maˇ caˆ maˇ gʼa te. Maˇ caˇ ve chaw htawˇ, caˇ ve chaw hta‸ venˇbaˆ maˇ gʼa taˍ. Awˬ lawn kʼo, Gʼuiˬsha lehˬ yawˇ hta‸ ha‸ yuˬ peuˬ. 4Shu ve awˬ ceˬ awˬ hkʼoˆ venˇbaˆ taˍ ve nawˬ lehˬ, hkʼaˬ hkʼe ve chaw le. Yawˇ hta‸ chehˇ tcuh tuˬ maˇ kʼoˆ, gʼa‸ kʼoˬ tuˬ maˇ kʼoˆ, yawˇ ve awˬ jawˇmawˇ hta‸ cawˬ ve yoˬ. Ya‸ hkʼaˇ, jawˇmawˇ lehˬ yawˇ hta‸ chehˇ tcuh tuˬ yoˬ. Awˬ lawn kʼo, jawˇmawˇ yawˇ hta‸ chehˇ tcuh tuˬ kanˇ paˆ cawˬ ve yoˬ.
5Chaw teˇ gʼaˇ lehˬ, awˬ nyi teˇ hpaˍ hpaˍ awˬ hkʼaw lo, teˇ nyi nyi hta‸ awˬ kaˍ awˬ nu awˬ nyi teˇ hpaˍ a‸ kehˉ taˍ uiˍ ve yoˬ. Chaw teˇ gʼaˇ lehˬ, awˬ nyi hkʼa peu-eˬ hkʼa shuˍ shuˍ yoˬ teh‸ shawˍ taˍ ve yoˬ. Chaw teˇ gʼaˇ le le a shu yawˇ nyi ma hkʼaw hkʼa deh‸ dawˇ cheˆ loˬ. 6Awˬ nyi hta‸ taˍ uiˍ ve chaw teˇ gʼaˇ lehˬ, Jawˇmawˇ Yeˍsuˆ hta‸ dawˇ nawˇ leh taˍ uiˍ ve yoˬ. Teˇ ceuˬ le le hta‸ caˇ ve chaw teˇ gʼaˇ htawˇ, Jawˇmawˇ Yeˍsuˆ hta‸ dawˇ nawˇ leh caˇ ve yoˬ. Awˬ lawn kʼo, yawˇ Gʼuiˬ sha hta‸ chiˇ mvuh leh caˇ ve yoˬ. Maˇ caˇ ve chaw teˇ gʼaˇ htawˇ, Jawˇmawˇ Yeˍsuˆ hta‸ dawˇ nawˇ ve awˬ hkʼaw lo caˇ tuˬ ce leh Gʼuiˬsha hta‸ chiˇ mvuh ve yoˬ. 7Awˬ lawn kʼo, ngaˬ hui awˬ hkʼaw lo a shu htawˇ maˇ kʼoˆ, a shu yawˇ awˬ to awˬ pon te‸ chehˇ ve maˇ heˆ. A shu htawˇ maˇ kʼoˆ, a shu yawˇ awˬ to awˬ pon suh ve maˇ heˆ. 8Ngaˬ hui te‸ ve lehˬ, Jawˇmawˇ Yeˍsuˆ awˬ pon te‸ ve yoˬ. Ngaˬ hui suh ve htawˇ, Jawˇ mawˇ Yeˍsuˆ awˬ pon suh ve yoˬ. Hkʼe te leh te‸ ve maˇ kʼoˆ, suh ve maˇ kʼoˆ, ngaˬ hui lehˬ Jawˇmawˇ Yeˍsuˆ ve mawˇ hpeh‸ ve yoˬ. 9Awˬ lawn kʼo, suh peuˬ ve chaw hta‸ ka‸, te‸ chehˇ ve chaw hta‸ ka‸ uˉ peunˍ tuˬ, Hkri‸ hkanˍ suh leh kʼaw‸ te‸ tu la ve yoˬ.
10Nawˬ lehˬ, aˬ hto‸ ma hta‸ pa taw nawˬ ve awˬ viˉ awˬ nyi awˬ hkʼoˆ hta‸ venˇbaˆ taˍ ve le. Aˬ hto‸ ma hta‸ pa taw, nawˬ ve awˬ viˉ awˬ nyi hta‸ maˇ shawˍ maˇ caˆ te ve le. Awˬ lawn kʼo, ngaˬ hui hkʼa peu-eˬ Gʼuiˬsha ve suhˉ jehˬ kuiˬ kʼaw jaw awˬ gʼuˇ suhˍ gʼa gaˬ tuˬ yoˬ. 11Li‸ hpu hkʼaw bvuh‸ taˍ ve hkʼe,
Jawˇmawˇ Gʼuiˬsha kʼoˆ ve, Ngaˬ te‸ chehˇ ve hkʼe
ngaˬ mehˆ gʼuˇ suhˍ chaw teˇ gʼaˇ le le hkui tcuhˉ teh leh,
maw‸ kʼaw teˇ maˬ le le Gʼuiˬsha hta‸ chiˇ mvuh tuˬ yoˬ, teh‸ bvuh‸ taˍ ve yoˬ.#Isy 45:23
12Hkʼe te leh, ngaˬ hui teˇ gʼaˇ le le a shu yawˇ awˬ to awˬ lawn Gʼuiˬsha hta‸ gʼa kʼaoˍ maˍ piˇ tuˬ yoˬ.
13Chi hta‸ pa taw, ya‸ nyi hkʼaw‸ nawˉ teˇ gʼaˇ hta‸ teˇ gʼaˇ venˇbaˆ taˇ kʼaw‸ taˍ da‸. Awˬ viˉ awˬ nyi hkui htiˇ poˬ paiˍ leh te ya‸ tuˬ ngaˬ maˇ te-o teh‸, nawˬ hui dawˇ cheˆ taˍ loˬ. 14Hkʼaˬ ve teˇ ceuˬ maˇ kʼoˆ, yawˇ hkʼaˇ yawˇ cha‸ chiˆ ve teˇ ceuˬ ka‸ maˇ cawˬ teh‸ Jawˇmawˇ Yeˍsuˆ awˬ hkʼaw lo ngaˬ shiˍ leh yonˍ ve yoˬ. Ya‸ hkʼaˇ, chaw teˇ gʼaˇ lehˬ, teˇ ceuˬ ceuˬ hta‸ cha‸ chiˆ ve teh‸ yawˇ shawˍ ve kʼo, yawˇ awˬ pon cha‸ chiˆ ve teˇ ceuˬ hpeh‸ ve yoˬ. 15Caˇ tuˬ dawˬ tuˬ hta‸ pa taw nawˬ ve awˬ viˉ awˬ nyi gʼa dawˇ haˍ ve kʼo, nawˬ lehˬ ha‸ pehnˇ ve awˬ hkʼaˇ suh kʼai chehˇ ve maˇ heˆ. Nawˬ ve caˇ tuˬ hta‸ pa taw nawˬ awˬ viˉ awˬ nyi hta‸ taˇ te luˬ piˇ. Yawˇ awˬ pon htawˇ Hkriˬ hkanˍ suh taˍ peuˬ. 16Nawˬ awˬ pon da‸ ve teˇ ceuˬ hta‸ shu maˇ shawˍ maˇ caˆ kʼoˆ tuˬ taˇ cawˬ piˇ. 17Awˬ lawn kʼo, Gʼuiˬsha ve mvuhˇmiˬ lehˬ, caˇ tuˬ dawˬ tuˬ hpeh‸ ve maˇ heˆ. Ya‸ hkʼaˇ, da‸ ve kehˬ ve Awˬ ha hpu hta‸ pa taw hteˇ ve cawˇ ve, dawˇ sha gaˇ sha ve leh, ha lehˬ ve awˬ ceuˬ hpeh‸ ve yoˬ. 18Hkri‸ awˬ pon chi hkʼe kanˉ te ve chaw hta‸ Gʼuiˬsha nyi hkʼaˇ suh leh, chaw yaˇ htawˇ yawˇ hta‸ nyi ma cawˇ ve yoˬ.
19Hkʼe te leh cawˇ da‸ hui da‸ tuˬ leh, teˇ gʼaˇ leh teˇ gʼaˇ uiˍ la mvuh la tuˬ, hkʼaˬ htaˆ ka‸ te kʼai-a veuˬ. 20Caˇ tuˬ dawˬ tuˬ hta‸ pa taw Gʼuiˬsha ve kanˉ hta‸ taˇ te luˬ piˇ. Hkʼa peu-eˬ lehˬ da‸ kehˬ ve yoˬ. Ya‸ hkʼaˇ, caˇ ve hta‸ pa taw shu hkui htiˇ poˬ paiˍ ve kʼo, caˇ ve chaw teˇ gʼaˇ lehˬ te ya‸ ve yoˬ. 21Shaˍ caˇ ve maˇ kʼoˆ, a pehˉ meuˇ gʼuiˬ dawˬ ve maˇ kʼoˆ, hkʼaˬ ve teˇ ceuˬ te ve htawˇ maˇ kʼoˆ, nawˬ ve awˬ viˉ awˬ nyi hkui htiˇ poˬ paiˍ tuˬ hpeh‸ ve kʼo, maˇ te cawˇ ve yoˬ. 22Nawˬ yonˍ ve teˇ ceuˬ lehˬ, nawˬ awˬ to leh Gʼuiˬsha mehˆ gʼuˇ suhˍ ceh tiˉ cawˬ piˇ-oˆ. A shu yawˇ nyi ma cawˇ ve hta‸ te ve chaw lehˬ, a shu yawˇ awˬ to hta‸ venˇbaˆ maˇ taˍ ve pa taw, ha lehˬ ve chaw hpeh‸ ve yoˬ. 23Yonˍ ve awˬ hkʼaw lo nyi ma htawˇ dawˇ nawˬ dawˇ te ve chaw teˇ gʼaˇ caˇ ve kʼo, yonˍ ve nyi ma maˇ cawˬ leh caˇ ve pa taw, nyi ma hkʼaw suhˉ taˆ ve hta‸ gʼa hkanˍ peuˬ. Yonˍ ve hta‸ maˇ caˉ da‸ ve hkʼaˬ ve teˇ ceuˬ maˇ kʼoˆ, venˇbaˆ hpeh‸ ve yoˬ.
Currently Selected:
Roˉma‸ li‸ 14: LHBE
Highlight
Share
Copy
Want to have your highlights saved across all your devices? Sign up or sign in
Lahu Bible Edited © Thailand Bible Society and Bible Society of Myanmar, 2010, 2020.