Roˉma‸ li‸ 16
16
Ha‸ pehnˇ ve hkawˇ shanˍ feu piˇ ve
1Keˍcheˍ venˇ Hkri‸ yaˇ awˬ moˍ awˬ hkʼaw lo ga piˇ shehˍ ma hpeh‸ ve ngaˬ hui ve awˬ nyi ma Hpiˉbeˍ hta‸ nawˬ hui geh lo ngaˬ kʼai tcuh ve yoˬ. 2Hkri‸ yaˇ hui te keunˍ ve hkʼe, Jawˇmawˇ Yeˍsuˆ ve mehˆ hpfuhˇ hta‸ nyi leh yawˇ hta‸ ha‸ yuˬ-o‸. Yawˇ hkʼaˬ ve teˇ ceuˬ loˍ ve htawˇ maˇ kʼoˆ, yawˇ hta‸ ga piˇ-oˆ. Awˬ lawn kʼo, yawˇ lehˬ chaw laiˉ gʼaˇ hta‸ ga piˇ peuˬ ve awˬ hkʼoˆ, ngaˬ hta‸ ka‸ ga laˇ peuˬ ve yoˬ.
3Ngaˬ geh teˇ geh Yeˍsuˆ Hkri‸ ve kanˉ ga te ve Piˇkiˇlaˆ leh Aˍkuˉlaˆ hta‸ ngaˬ dawˇ nawˇ chehˇ ve yoˬ teh‸ hto piˇ-oˆ. 4Yawˇ huiˉ maˬ lehˬ, ngaˬ a sha‸ gʼa ponˬ tuˬ ngaˬ awˬ pon hkanˍ suh taˬ ve chaw hpeh‸ ve yoˬ. Ngaˬ ceh tiˉ chiˇ mvuh ve maˇ heˆ, buiˇshaˆaˉnaˆ Hkri‸ yaˇ awˬ moˍ hkʼa peu-eˬ htawˇ yawˇ huiˉ maˬ ve awˬ bon hta‸ dawˇ nawˇ leh chiˇ mvuh chehˇ ve yoˬ. 5Yawˇ huiˉ maˬ ve yehˬ awˬ hkʼaw hpawnˬ da‸ chehˇ ve Hkri‸ yaˇ awˬ moˍ hta‸ htawˇ ngaˬ dawˇ nawˇ chehˇ ve yoˬ teh‸ hto piˇ-oˆ.
Aˍsiˆ mvuhˇmiˬ awˬ hkʼaw lo Hkri‸ yaˇ awˉ lawˉ hpeh‸ la ve ngaˬ ha‸ ve Eˇpehˇnehˆ hta‸ ka‸ ngaˬ dawˇ nawˇ chehˇ ve yoˬ teh‸ hto piˇ-oˆ. 6Nawˬ hui awˬ pon kanˉ gʼaˇ hte‸ te ve Maˍriˆ hta‸ htawˇ ngaˬ dawˇ nawˇ chehˇ ve yoˬ teh‸ hto piˇ-oˆ. 7Ngaˬ geh htawnˍ hkʼaw chehˇ jaw ve, ngaˬ ve awˬ ceuˬ awˬ hkʼaˇ Aˍdawˇniˆ leh Yuˇniˆ hta‸ ka‸, ngaˬ dawˇ nawˇ chehˇ ve yoˬ teh‸ hto piˇ-oˆ. Yawˇ huiˉ maˬ lehˬ, tcuh yaˇ hui awˬ hkʼaw lo awˬ meh bvuhˬ ve chaw hpeh‸ ve yoˬ. Ngaˬ Hkri‸ yaˇ maˇ hpeh‸ la sheˍ htaˇ ka‸ yawˇ huiˉ maˬ Hkri‸ yaˇ hpeh‸ la peuˬ.
8Jawˇmawˇ Yeˍsuˆ awˬ hkʼaw lo ngaˬ ha‸ ve Aˍpaˍliˆ hta‸ htawˇ ngaˬ dawˇ nawˇ chehˇ ve yoˬ teh‸ hto piˇ-oˆ. 9Ngaˬ geh teˇ geh Hkri‸ ve kanˉ te ve Uˇraˍbaˍ leh ngaˬ ha‸ ve Saˍtaˍhkuˆ hta‸ ka‸ ngaˬ dawˇ nawˇ chehˇ ve yoˬ teh‸ hto piˇ-oˆ. 10Hkʼa deh‸ lawˇ nyi peuˬ ve Hkri‸ yaˇ Aˍpeˍleˍ hta‸ ka‸, Aˍriˇtawˇbuˆ ve yehˬ yaˇ kʼa yaˇ hui hta‸ ka‸ ngaˬ dawˇ nawˇ chehˇ ve yoˬ teh‸ hto piˇ-oˆ. 11Ngaˬ ve awˬ ceuˬ awˬ hkʼaˇ hpeh‸ ve Heˍroˍdiˍoˍ leh, Jawˇmawˇ Yeˍsuˆ awˬ hkʼaw lo chehˇ ve Naˍkiˍsuˆ ve yehˬ yaˇ kʼa yaˇ hui hta‸ ka‸ ngaˬ dawˇ nawˇ chehˇ ve yoˬ teh‸ hto piˇ-oˆ.
12Jawˇmawˇ Yeˍsuˆ awˬ pon kanˉ te chehˇ ve Taˍruˇhpehˇnaˆ leh Taˍruˇ hpawˇsaˆ hta‸ maˇ kʼoˆ, Jawˇmawˇ Yeˍsuˆ ve kanˉ hta‸ gʼaˇ hte‸ te chehˇ ve ngaˬ ha‸ ve Peˍraˍsiˆ hta‸ maˇ kʼoˆ, ngaˬ dawˇ nawˇ chehˇ ve yoˬ teh‸ hto piˇ-oˆ. 13Jawˇmawˇ Yeˍsuˆ awˬ hkʼaw lo leuˆ yuˬ taˍ ve Ruˇhpuˆ leh ngaˬ ve awˬ e hkʼa shuˍ shuˍ shawˍ taˍ ve, yawˇ ve awˬ e yawˇ huiˉ maˬ hta‸ ngaˬ dawˇ nawˇ chehˇ ve yoˬ teh‸ hto piˇ-oˆ. 14Aˍsoˍkaˍreˆ, Hpaˍleˍgoˍ, Heˍraˍmeˍ, Paˇrawˇbaˆ, Heˍraˍmaˆ leh, yawˇ hui geh chehˇ ve awˬ viˉ awˬ nyi teˇ hpaˍ hta‸ ngaˬ dawˇ nawˇ chehˇ ve yoˬ teh‸ hto piˇ-oˆ. 15Hpiˇlawˇluˆ, Yuˇliˆ, Neˍruˆ leh Neˍruˆ ve awˬ nyi ma Awˇloˍpaˆ leh, yawˇ hui geh chehˇ ve Hkri‸ yaˇ hkʼa peu-eˬ hta‸ ngaˬ dawˇ nawˇ chehˇ ve yoˬ teh‸ hto piˇ-oˆ.
16Nawˬ hui teˇ gʼaˇ leh teˇ gʼaˇ da‸ ve kehˬ ve awˬ hkʼaw lo boˆ nu da‸ leh la‸ sheh caˉ da‸-o‸. Hkri‸ yaˇ awˬ moˍ hkʼa peu-eˬ nawˬ hui hta‸ dawˇ nawˇ chehˇ ve yoˬ teh‸, tawˇ shanˍ feu laˇ ve yoˬ.
17Awˬ viˉ awˬ nyi teˇ hpaˍ-oˬ, nawˬ hui gʼa henˇ peuˬ ve maˍ laˇ ve tawˇ hkawˇ teˇ hpaˍ hta‸ maˇ hawˍ ve, hpaˆ da‸ tuˬ te puiˉ ve, shu ya‸ kʼai tuˬ te puiˉ ve chaw teˇ hpaˍ hta‸ hkʼa deh‸ nyi leh jaw kʼai-o teh‸, ngaˬ nawˬ hui hta‸ lawˬ hkawˉ ve yoˬ. 18Awˬ lawn kʼo, chi hkʼe ve chaw teˇ hpaˍ lehˬ, ngaˬ hui ve Jawˇmawˇ Hkri‸ awˬ pon kanˉ te ve maˇ heˆ. A shu yawˇ ve gʼoˇ peˬ awˬ pon ceh kanˉ te ve yoˬ. Yawˇ hui lehˬ, na sha ve tawˇ leh chiˇ mvuh ve tawˇ hkawˇ hta‸ yehˇ leh, da‸ ve chaw teˇ hpaˍ hta‸ heˍ yuˬ puiˉ ve yoˬ. 19Nawˬ hui na yuˬ puiˉ ve awˬ lawn lehˬ, chaw hkʼa peu-eˬ gʼa kaˇ ve pa taw, ngaˬ ha lehˬ chehˇ ve yoˬ. Ya‸ hkʼaˇ, nawˬ hui lehˬ da‸ ve awˬ ceuˬ hta‸ shiˍ puiˉ leh, nyi ma awˬ hkʼaw lo haiˬ ve awˬ ceuˬ a ciˉ ka‸ maˇ gʼa cawˬ tuˬ ngaˬ heuˆ gaˇ sheˍ ve yoˬ. 20Maˇ maw maw kʼo, dawˇ sha piˇ shehˍ hpaˇ Gʼuiˬsha lehˬ, nawˬ hui ve hkui taw kʼaw awˬ hawˉ lo Saˍtanˍ hta‸ naˆ nehˆ sheˬ tuˬ yoˬ.
Ngaˬ hui ve Jawˇmawˇ Yeˍsuˆ Hkri‸ ve awˬ bon awˬ shinˉ nawˬ hui geh cawˬ piˇ-oˆ.
21Ngaˬ geh teˇ geh kanˉ te shehˍ hpaˇ Tiˆmoˉseˍ leh, ngaˬ ve awˬ ceuˬ awˬ hkʼaˇ Luˇkiˆ, Yaˍsonˍ leh Sawˇsiˇpaˍtaˆ hui lehˬ, nawˬ hui hta‸ dawˇ nawˇ chehˇ ve yoˬ teh‸ tawˇ shanˍ feu laˇ ve yoˬ.
22Ngaˬ lehˬ, li‸ chi bvuh‸ shehˍ hpaˇ Teˍraˍtiˆ yoˬ. Ngaˬ htawˇ Jawˇmawˇ Yeˍsuˆ awˬ hkʼaw lo nawˬ hui hta‸ dawˇ nawˇ chehˇ ve yoˬ teh‸ tawˇ shanˍ feu laˇ ve yoˬ.
23Ngaˬ hta‸ maˇ kʼoˆ, Hkri‸ yaˇ teˇ moˍ hkʼa peu-eˬ hta‸ maˇ kʼoˆ, ha‸ yuˬ leh caˍ laˇ taw laˇ shehˍ hpaˇ Gaˍyuˆ lehˬ, nawˬ hui hta‸ dawˇ nawˇ chehˇ ve yoˬ teh‸ tawˇ shanˍ feu laˇ ve yoˬ. Venˇ chi awˬ hkʼaw hpu ha‸ shaˉ shehˍ hpaˇ Eˇraˍtuˆ leh awˬ viˉ awˬ nyi Kawˍtuˆ htawˇ, nawˬ hui hta‸ dawˇ nawˇ chehˇ ve yoˬ teh‸ tawˇ shanˍ feu laˇ ve yoˬ.#16:23 Li‸ hpu teˇ hpaˍ hpaˍ awˬ hkʼaw lo ka nanˉ ehˉ chi teˇ maˬ cawˬ ve yoˬ. -24 Ngaˬ hui ve Jawˇmawˇ Yeˍsuˆ Hkri‸ ve awˬ bon awˬ shinˉ nawˬ hui hkʼa peu-eˬ geh cawˬ piˇ-o. A menˬ.
Awˬ leh meuˇ bon lawˬ ve hkawˇ
25Gʼuiˬsha hta‸ awˬ me‸ awˬ hponˇ cawˬ piˇ-oˆ. Yawˇ lehˬ, ngaˬ maˍ piˇ ve ha lehˬ ve bon hkawˇ leh Yeˍsuˆ Hkri‸ awˬ lawn ngaˬ bon maˍ ve hkʼa shuˍ shuˍ, nawˬ hui hta‸ yeˬ la piˇ puiˉ ve yoˬ. Ngaˬ maˍ piˇ ve bon hkawˇ chi lehˬ, tcuhˉ kuiˬ naˉ jaˇ ve tawˇ hkawˇ hpeh‸ ve yoˬ. Tawˇ hkawˇ chi lehˬ, aˬ sho-eˬ htaˇ faˉ taˍ ve htawˇ, chi beu‸ hkʼa tawˍ lehˆ tawˆ la peuˬ. 26Chaw ceuˬ hkʼa peu-eˬ yonˍ leh na yuˬ tuˬ, co co taiˍ taiˍ Gʼuiˬsha tawˇ piˇ taˍ ve hkʼe, faˉ taˍ ve oˇ ve chi beu‸ tawˆ la peuˬ leh, tcuh kaˍ paˍ hui ve li‸ hta‸ pa taw faˉ taˍ ve oˇ ve hta‸ chaw ceuˬ hkʼa peu-eˬ gʼa shiˍ ve yoˬ.
27Yawˇ teˇ gʼaˇ ceh tiˉ cuˇ yiˍ hkʼa biˇ cawˬ ve Gʼuiˬsha hpeh‸ ve yoˬ. Yeˍsuˆ Hkri‸ awˬ hkʼaw lo co co taiˍ taiˍ yawˇ hta‸ chiˇ uiˍ chiˇ mvuh piˇ-oˆ. A menˬ.
Currently Selected:
Roˉma‸ li‸ 16: LHBE
Highlight
Share
Copy
Want to have your highlights saved across all your devices? Sign up or sign in
Lahu Bible Edited © Thailand Bible Society and Bible Society of Myanmar, 2010, 2020.