Naˍhunˍ li‸ 3
3
1Heˍ puiˉ leh shu hta‸ tiˇ pehˍ ve venˇ lehˬ, gʼa luˬ gʼa sheˆ tuˬ yoˬ.
Shu geh hiˉ yuˬ lu yuˬ veu laˇ ve mawˇ jeˬ teˇ hpaˍ, nawˬ geh lo biˇ sheˆ chehˇ ve yoˬ.
2Aˉ caˆ hkeh jaw‸ chehˇ ve awˬ hkawˇ,
iˉ mvuhˇ teˇ hpaˍ gʼuiˇ toˇ chehˇ ve awˬ hkawˇ leh,
iˉ mvuhˇ lawˬ teˇ hpaˍ te toˇ chehˇ ve awˬ hkawˇ hta‸ na sheˍ.
3Iˉ mvuhˇ ciˇ ve ma‸ yaˇ teˇ hpaˍ kuˬ chehˇ leh,
yawˇ hui ve aˉhtaw leh gehˇ teˇ hpaˍ awˬ gʼeuˆ ba chehˇ ve yoˬ.
Suh taˍ ve awˬ to teˇ hpaˍ gʼaw maˇ peuˬ htaˇ hkʼa gaˬ maˇ jaˇ leh,
chaw yaˇ teˇ hpaˍ lehˬ suh taˍ ve chaw oˇ ve teˇ hpaˍ hta‸
hkui htiˇ poˬ toˇ chehˇ ve yoˬ.
4Meh maˬ lanˉ hkʼa shuˍ hpeh‸ ve Niˇnaˍveˍ venˇ lehˬ,
ciˍ yanˍ ve hta‸ gʼa hkanˍ peuˬ. Yawˇ lehˬ da‸ jaˇ nyi sha jaˇ leh,
awˬ nu ve chaw ceuˬ teˇ hpaˍ hta‸ venˇbaˆ te piˇ lawˬ ve yoˬ.
5Kanˇ paˆ uiˍ ve Jawˇmawˇ Gʼuiˬsha kʼoˆ ve,
Niˇnaˍveˍ venˇ-oˬ, ngaˬ nawˬ hta‸ ciˍ yanˍ laˇ tuˬ yoˬ.
ngaˬ nawˬ hta‸ awˬ kʼu nyi hpeh‸ la piˇ lawˬ leh,
nawˬ lehˬ hkʼaˬ ma ya‸ taw tuˬ cawˬ ve
awˬ nu ve chaw ceuˬ teˇ hpaˍ hta‸ mawˬ tcuh piˇ tuˬ yoˬ.
6Ngaˬ nawˬ hta‸ ya‸ taw piˇ lawˬ leh,
nawˬ ve awˬ me‸ awˬ hponˇ hta‸ te luˬ laˇ tuˬ yoˬ.
Chaw yaˇ teˇ hpaˍ nawˬ hta‸ chiˇ nyi leh kawˆ jaˇ tuˬ yoˬ.
7Nawˬ hta‸ hkʼa gʼa mawˬ ve chaw hkʼa peu-eˬ hkʼaw‸ nawˉ paˉ lo jiˆ kʼo‸-e leh,
Niˇnaˍveˍ venˇ lehˬ luˬ kʼai peuˬ.
Venˇ chi awˬ pon a shu teˇ gʼaˇ dawˇ haˍ tuˬ le, teh‸ kʼoˆ tuˬ yoˬ.
Chaw teˇ gʼaˇ ka‸ nawˬ hta‸ dawˇ sha tuˬ te laˇ tuˬ ve maˇ heˆ, teh‸ Gʼuiˬsha kʼoˆ ve yoˬ.
8Niˇnaˍveˍ venˇ-oˬ, nawˬ lehˬ Teˍbehˆ venˇ a‸ kehˉ da‸ leuˉ ve laˇ. Niˍlaˆ iˉ kaˆ lawˬ lehˬ lanˇ venˇ hkʼa shuˍ, venˇ oˇ ve hta‸ ha‸ shaˉ piˇ taˍ ve yoˬ. 9Teˍbehˆ venˇ lehˬ Ehˇtaˍyawˇpiˆ leh Eˇjiˇtu‸ mvuhˇmiˬ hta‸ uˉ peunˍ chehˇ leh, yawˇ ve kanˇ paˆ lehˬ awˬ leh meuˇ maˇ cawˬ. Liˆbyaˇ mvuhˇmiˬ lehˬ yawˇ ve awˬ chawˇ hpeh‸ ve yoˬ. 10Ya‸ hkʼaˇ, Teˍbehˆ venˇ yaˇ teˇ hpaˍ lehˬ shu mvuhˇmiˬ lo hpeh kʼai ve hta‸ gʼa hkanˍ ve yoˬ. Yawˇ hui ve yaˇ ehˉ teˇ hpaˍ lehˬ, ya‸ kʼaw teˇ caˆ le le awˬ hkʼoˆ lo shu tiˇ pehˍ ve hta‸ gʼa hkanˍ ve yoˬ. Yawˇ hui ve chaw uiˍ chaw mvuh teˇ hpaˍ htawˇ, shu hpeh leh pehˬ yuˬ ve hta‸ gʼa hkanˍ ve yoˬ.
11Niˇnaˍveˍ venˇ-oˬ, nawˬ htawˇ tzuhˬ bvuhˆ paˍ hkʼa shuˍ maˇ nawˇ maˇ hteh te paiˍ leh, canˇ paˍ teˇ hpaˍ ve la‸ sheh hkʼaw maˇ gʼa gaˬ tuˬ hpeˆ dawˇ tuˬ yoˬ. 12Nawˬ ve ta‸ yehˬ teˇ hpaˍ lehˬ, awˬ shiˍ meh la peuˬ ve maˉ nawˆ cehˬ hkʼa shuˍ hpeh‸ tuˬ yoˬ. Awˬ cehˬ hta‸ hiˆ piˇ ve kʼo, maˉ nawˆ shiˍ teˇ hpaˍ nawˬ ve maw‸ kʼaw hkʼaw ce lo‸ la tuˬ yoˬ. 13Nawˬ ve ma‸ yaˇ teˇ hpaˍ lehˬ, yaˇ miˇ hkʼa shuˍ hpeh‸ la leh, nawˬ lehˬ canˇ paˍ teˇ hpaˍ hta‸ tawˍ taˍ gʼa tuˬ ve maˇ heˆ. Nawˬ ve venˇ taˍ meu‸ hpe‸ teˇ hpaˍ hta‸ htawˇ aˬ miˍ to‸ baˬ tuˬ yoˬ. 14Canˇ paˍ teˇ hpaˍ nawˬ hta‸ ca hoˆ la htaˇ, nawˬ iˉ kaˆ maˇ gʼa shiˉ tuˬ iˉ kaˆ hkʼa deh‸ hkʼo taˍ leh, nawˬ ve ta‸ yehˬ teˇ hpaˍ hta‸ hkʼa deh‸ gu taˍ-o‸. Je‸ duˇ hpoˆ leh li kiˉ shiˍ teˇ hpaˍ hkʼa deh‸ te hpoˆ taˍ-o‸. 15Ya‸ hkʼaˇ, nawˬ oˇ hkʼe te taˍ ve htawˇ, nawˬ lehˬ ma‸ bawˆ kuiˬ lo tiˇ pehˍ ve, maˇ heˆ kʼo, aˬ miˍ chiˆ pehˍ ve hta‸ gʼa hkanˍ tuˬ yoˬ. Caˬ cehˬ hta‸ paˉ ce‸ tawˆ baˬ ve hkʼe, nawˬ lehˬ te luˬ te sheˆ ve hta‸ gʼa hkanˍ tuˬ yoˬ.
Nawˬ lehˬ paˉ ce‸ hkʼa shuˍ maˇ la chehˇ taˍ ve yoˬ. 16Nawˬ ve tanˇ kaˬ paˍ teˇ hpaˍ lehˬ, mvuhˇ naw ma hkʼoˆ lo cawˬ ve meu‸ keu shiˍ a‸ kehˉ maˇ jaˇ ve yoˬ. Ya‸ hkʼaˇ, paˉ ce‸ poˬ hpaw-e ve hkʼe chi beu‸ yawˇ hui mehˉ kʼai peuˬ. 17Nawˬ ve ma‸ poˍ lonˉ teˇ hpaˍ lehˬ, kaˆ jaˇ ve awˬ nyi teˇ nyi htaˇ gʼo‸ pa hkʼoˆ lo chehˇ taˍ ve paˉ ce‸ moˍ lonˉ hkʼe hpeh‸ ve yoˬ. Ya‸ hkʼaˇ, mvuhˇ nyi tawˆ la ve teˇ yanˇ yawˇ hui poˬ hpaw-e ve yoˬ. Yawˇ hui hkʼaˬ lo kʼai peuˬ ve hta‸ chaw teˇ gʼaˇ ka‸ maˇ shiˍ.
18Aˍsuˇriˆ jawˇmawˇ-oˬ, nawˬ awˬ hawˉ lo kanˉ te chehˇ ve chaw teˇ hpaˍ suh-e peuˬ leh, nawˬ ve hkunˉ teˇ hpaˍ lehˬ co co taiˍ taiˍ zuh‸ muiˉ kʼa chehˇ taˍ peuˬ. Nawˬ ve chaw teˇ hpaˍ lehˬ, hkʼaw hkʼoˆ lawˬ hkʼoˆ lo hpaˆ da‸ kʼai leh, yawˇ hui hta‸ kʼaw‸ shiˍ hkʼaw‸ veu laˇ tuˬ ve chaw teˇ gʼaˇ ka‸ maˇ cawˬ. 19Nawˬ ve naˬ kuiˬ teˇ hpaˍ htawˇ na-e la kuiˬ awˬ hkʼaˇ maˇ cawˬ. Awˬ lawn chi hta‸ hkʼa gʼa kaˇ ve chaw hkʼa peu-eˬ ha lehˬ jaˇ leh la‸ sheh hta tuˬ yoˬ. Awˬ lawn kʼo, nawˬ ciˍ yanˍ piˇ ve hta‸ maˇ gʼa hkanˍ jaw ve chaw a shu teˇ gʼaˇ cawˬ le.
Currently Selected:
Naˍhunˍ li‸ 3: LHBE
Highlight
Share
Copy
Want to have your highlights saved across all your devices? Sign up or sign in
Lahu Bible Edited © Thailand Bible Society and Bible Society of Myanmar, 2010, 2020.