Naˍhunˍ li‸ 2
2
Niˇnaˍveˍ venˇ luˬ kʼai ve
1Niˇnaˍveˍ venˇ-oˬ, canˇ paˍ teˇ hpaˍ nawˬ hta‸ ca bawˆ la chehˇ ve yoˬ.
Nawˬ hta‸ te luˬ tuˬ ve chaw teˇ hpaˍ laˬ chehˇ taˍ peuˬ.
Ta‸ yehˬ teˇ hpaˍ hta‸ hkʼa deh‸ gu te leh,
ya‸ kʼaw hta‸ hkʼa deh‸ shaw taˍ-o‸.
Ma‸ bawˆ tuˬ hkʼa deh gu taˍ-o‸.
2(Gʼuiˬsha lehˬ Iˉsaˍreˍlaˆ ve mvuhˇmiˬ hta‸, aˬ sho-eˬ canˇ paˍ teˇ hpaˍ maˇ te luˬ piˇ sheˍ htaˇ hkʼe kʼaw‸ hpeh‸ la piˇ tuˬ ve awˬ yanˇ gaˬ la chehˇ ve yoˬ.)
3Canˇ paˍ teˇ hpaˍ lehˬ, nyiˉ-ehˍ ve htanˬ tuˬ pfuhˇ taˍ leh,
nyiˉ-ehˍ ve veu‸ kʼaˇ veu‸ deh taˍ ve yoˬ.
Yawˇ hui lehˬ ma‸ bawˆ tuˬ hkʼa deh‸ gu taˍ peuˬ.
Yawˇ hui ve iˉ mvuhˇ lawˬ teˇ hpaˍ lehˬ, aˬ miˍ ha hkʼa shuˍ awˬ gʼeuˆ ba leh,
yawˇ hui ve iˉ mvuhˇ teˇ hpaˍ htawˇ gʼaˇ hte‸ pawˆ toˇ chehˇ ve yoˬ.
4Iˉ mvuhˇ lawˬ oˇ ve teˇ hpaˍ lehˬ,
venˇ hkʼaw lo htawˇ kʼaw‸ nawˬ kʼaw‸ te gʼuiˇ toˇ chehˇ ve yoˬ.
Yawˇ hui lehˬ aˬ miˍ ha hkʼa shuˍ awˬ gʼeuˆ ba leh,
mvuhˇ tiˉ po-e‸ hkʼa shuˍ gʼuiˇ gehˬ jaˇ ve yoˬ.
5Ma‸ poˍ lonˉ teˇ hpaˍ hta‸ kuˬ yuˬ ve yoˬ.
Ya‸ hkʼaˇ, yawˇ hui hkui htiˇ poˬ toˇ chehˇ ve yoˬ.
Ma‸ yaˇ teˇ hpaˍ lanˇ venˇ lo gʼuiˇ kʼai leh,
lanˇ venˇ hta‸ dawˆ paˆ chehˇ taˍ ve yoˬ.
6Iˉ kaˆ lawˬ paˇ lo cawˬ ve venˇ taˍ meu‸ hpe‸ hpaw baˬ sheˬ leh,
hawˉ yehˬ hkʼaw chehˇ ve chaw teˇ hpaˍ kawˆ jaˇ ve yoˬ.
7Jawˇmawˇ ma hta‸ shu hpeh yuˬ leh,
yawˇ ve awˬ ceˬ ma teˇ hpaˍ lehˬ aˉ pui kʼaˍ hkʼe hpoˆ hkʼanˇ chehˇ ve yoˬ.
Yawˇ hui lehˬ dawˇ haˍ gaˇ haˍ jaˇ ve hkʼaw, a shu yawˇ ve nyi ma pui hta‸ hta chehˇ ve yoˬ.
8Iˉ kaˆ gʼuiˬ hkʼaˇ pe‸ tawˆ la ve hkʼe,
venˇ yaˇ teˇ hpaˍ Niˇnaˍveˍ venˇ hkʼaw gʼuiˇ tawˆ-e ve yoˬ.
Taˇ gʼuiˇ hpaw-e teh‸ shu kʼoˆ piˇ chehˇ ve htawˇ,
chaw teˇ gʼaˇ ka‸ maˇ kʼaw‸ hpfuhˆ nyi.
9Hpu shi teˇ hpaˍ hta‸ hiˉ yuˬ-o‸.
Awˬ lawn kʼo, venˇ chi hkʼaw hpu shi mawˇ jeˬ hkʼa biˇ cawˬ ve yoˬ.
10Niˇnaˍveˍ venˇ luˬ kʼai sheˆ kʼai leh, gawˬ cu gawˬ pehˆ hpeh‸ la peuˬ.
Chaw yaˇ teˇ hpaˍ kawˆ jaˇ ve pa taw,
nyi ma shiˍ kuiˬ kʼai peuˬ.
Yawˇ hui ve mehˆ hpfuhˇ lehˬ chaw suh hkʼe hpeh‸ la peuˬ.
11Laˇ caˬ shiˉ ehˉ hkʼa biˇ chehˇ taˍ ve
haˉ kʼoˍ hta‸ shuˍ ve venˇ lehˬ chi beu‸ hkʼaˬ lo le.
Te luˬ te sheˆ ve hta‸ maˇ gʼa hkanˍ tuˬ,
laˇ caˬ shiˉ oˇ ve teˇ hpaˍ hkʼaˬ lo gʼa kʼai tuˬ le.
12Laˇ caˬ shiˉ lehˬ caˇ tuˬ ca veu laˇ leh,
yawˇ ve awˬ yehˇ teˇ hpaˍ awˬ pon tzuh‸ suhˍ piˇ chehˇ ve yoˬ.
Yawˇ ve hkawˆ awˬ hkʼaw lo, caˇ tuˬ shaˍ hkʼa biˇ cawˬ taˍ ve yoˬ.
13Ngaˬ lehˬ nawˬ hui ve canˇ paˍ hpeh‸ leh, nawˬ hui ve iˉ mvuhˇ lawˬ teˇ hpaˍ hta‸ tuˉ baˬ laˇ tuˬ yoˬ. Nawˬ hui ve ma‸ yaˇ teˇ hpaˍ lehˬ ma‸ bawˆ kuiˬ lo tiˇ pehˍ ve hta‸ gʼa hkanˍ leh, nawˬ hui shu geh yuˬ gʼa taˍ ve mawˇ jeˬ hkʼa peu-eˬ hta‸ ngaˬ yuˬ baˬ tuˬ yoˬ. Nawˬ hui ve tawˇ hkawˇ hta‸ awˬ hkʼaw‸ nawˉ teˇ pawˆ ka‸ gʼa kʼaw‸ kaˇ tuˬ ve maˇ heˆ, teh‸ kanˇ paˆ uiˍ ve Gʼuiˬsha kʼoˆ ve yoˬ.
Currently Selected:
Naˍhunˍ li‸ 2: LHBE
Highlight
Share
Copy
Want to have your highlights saved across all your devices? Sign up or sign in
Lahu Bible Edited © Thailand Bible Society and Bible Society of Myanmar, 2010, 2020.