Miˆhkaˍ li‸ 6
6
Iˉsaˍreˍlaˆ chaw hui hta‸ Gʼuiˬsha kʼoˆ piˇ ve tawˇ
1Iˉsaˍreˍlaˆ chaw hui hta‸ Gʼuiˬsha kʼoˆ piˇ tuˬ cawˬ ve tawˇ hta‸ na taˍ sheˍ.
Jawˇmawˇ-oˬ, tu la leh nawˬ kʼoˆ tuˬ cawˬ ve tawˇ hta‸ kʼoˆ maˍ laˇ-oˆ. Nawˬ kʼoˆ chehˇ ve tawˇ hta‸ hkʼaw pui teˇ hpaˍ htawˇ gʼa kaˇ piˇ-oˆ.
2Hkʼaw pui teˇ hpaˍ leh aˬ sho-eˬ htaˇ ka‸ cawˬ taˍ ve miˬguiˬ-oˬ, Gʼuiˬsha kʼoˆ chehˇ ve tawˇ hta‸ na sheˍ. Gʼuiˬsha lehˬ yawˇ ve chaw teˇ hpaˍ hta‸ tawˇ yaw piˇ tuˬ cawˬ ve yoˬ. Yawˇ lehˬ Iˉsaˍreˍlaˆ chaw hui hta‸ venˇbaˆ taˍ kuiˬ teˇ kaˬ cawˬ ve yoˬ.
3Gʼuiˬsha kʼoˆ ve, Ngaˬ ve chaw teˇ hpaˍ-oˬ, ngaˬ nawˬ hui hta‸ hkʼaˬ hkʼe te laˇ taˍ peuˬ ve le. Ngaˬ nawˬ hui hta‸ hkʼaˬ hkʼe te tu‸ hkanˍ piˇ lawˬ ve le. Ngaˬ hta‸ kʼaw‸ yaw hkʼaw‸ laˇ-oˆ. 4Ngaˬ nawˬ hui hta‸ Eˇjiˇtu‸ mvuhˇmiˬ hkʼaw shiˍ tawˆ laˇ taˍ ve yoˬ. Shu ceˬ shu hpfuhˆ te chehˇ kuiˬ lo ngaˬ nawˬ hui hta‸ htaiˍ hkʼaw‸ laˇ taˍ ve yoˬ. Nawˬ hui hta‸ sheh kʼai laˇ tuˬ Moˉseˍ, Aˍronˍ leh Meˇriˆanˍ hui hta‸ ngaˬ peu laˇ taˍ ve yoˬ. 5Ngaˬ ve chaw teˇ hpaˍ-oˬ, Mawˇbaˆ mvuhˇmiˬ ve jawˇmawˇ Baˍlaˆ nawˬ hui hta‸ hkʼaˬ hkʼe te laˇ tuˬ dawˇ nyi chehˇ ve awˬ lawn, leh Baˍraˆ ve yaˇ paˍ Baˍlanˍ yawˇ hta‸ hkʼaˬ hkʼe kʼaw‸ yaw hkʼaw‸ piˇ ve awˬ lawn hta‸ dawˇ nawˇ-oˆ. Aˍhkeˇshaˍ venˇ lo te leh Giˇlaˍgaˍ venˇ lo hkʼa gaˬ, ya‸ kʼaw kʼaˉ lo hkʼaˬ hkʼe hpeh‸ taˉ peuˬ ve awˬ lawn teˇ hpaˍ hta‸ htawˇ dawˇ nawˇ-oˆ. Oˇ hkʼe te ve kʼo, nawˬ hui hta‸ ponˬ laˇ tuˬ ngaˬ hkʼaˬ hkʼe te taˍ peuˬ ve hta‸ nawˬ hui gʼa shiˍ tuˬ yoˬ.
Gʼuiˬsha heuˆ gaˇ ve awˬ ceuˬ
6Mvuhˇ naw ma Gʼuiˬsha hta‸ ngaˬ oˉ kʼoˍ ca pui la htaˇ, yawˇ hta‸ aˬ hto‸ ma gʼa yuˬ veu laˇ piˇ tuˬ le. Yawˇ hta‸ tuˉ tanˇ piˇ tuˬ, da‸ jaˇ ve nuˇ ehˉ hta‸ ngaˬ gʼa yuˬ veu laˇ tuˬ laˇ. 7Ngaˬ yawˇ geh lo yawˬ ehˉ awˬ hinˉ hkeh, maˇ heˆ kʼo, maˇ jaˇ ve shaˍlonˍ awˬ chu yuˬ veu laˇ ve hta‸ yawˇ nyi hkʼaˇ suh tuˬ ve laˇ. Ngaˬ ve venˇbaˆ gʼa ponˬ tuˬ, ngaˬ ve yaˇ paˍ uiˍ hta‸ gʼa tanˇ piˇ tuˬ ve laˇ. 8Maˇ heˆ. Gʼuiˬsha lehˬ da‸ ve awˬ ceuˬ ngaˬ hui hta‸ kʼoˆ maˍ laˇ taˍ peuˬ. Yawˇ heuˆ gaˇ ve awˬ ceuˬ lehˬ chi hkʼe yoˬ. Hteˇ ve cawˇ ve hta‸ te ve, ha‸ pehnˇ ve, leh nuˇ nehˬ ve awˬ hkʼaw lo Gʼuiˬsha ve tawˇ hkawˇ hta‸ na yuˬ ve awˬ ceuˬ chi teˇ hpaˍ yoˬ.
9Gʼuiˬsha hta‸ kawˆ ve teˇ ceuˬ da‸ jaˇ ve yoˬ. Yawˇ venˇ hta‸ kuˬ leh kʼoˆ ve, Venˇ hkʼaw hpawnˬ da‸ chehˇ ve chaw hui-oˬ, na sheˍ. 10Haiˬve chaw hui ve yehˬ hkʼaw lo, maˇ hteˇ maˇ cawˇ ve hkʼaw ca gʼa taˍ ve hpu shi mawˇ jeˬ hkʼa biˇ cawˬ ve yoˬ. Yawˇ hui lehˬ maˇ cawˇ ve yaˍ cuˍ hta‸ yehˇ chehˇ ve yoˬ. Awˬ ceuˬ oˇ ve teˇ hpaˍ hta‸ ngaˬ canˇ ve yoˬ. 11Chi hkʼe maˇ cawˇ ve yaˍ cuˍ hta‸ yehˇ chehˇ ve chaw hui hta‸ ngaˬ hkʼaˬ hkʼe te venˇbaˆ hpehˇ piˇ hpeh‸ tuˬ le. 12Paw sha ve chaw teˇ hpaˍ lehˬ haˍ yaˇ gʼawˇ yaˇ teˇ hpaˍ hta‸ hkʼa mvuhˇ hkʼa na te piˇ leh, nawˬ hui hkʼa peu-eˬ chaw heˍ paˍ hpeh‸ ve yoˬ. 13Nawˬ hui ve venˇbaˆ teˇ hpaˍ hta‸ pa taw, chi teˇ hkui hta‸ tanˬ leh ngaˬ nawˬ hui hta‸ luˬ kʼai sheˆ kʼai piˇ tuˬ yoˬ. 14Nawˬ hui gʼa caˇ chehˇ ve htawˇ, nyi hkʼaˇ suh tuˬ ve maˇ heˆ. Nawˬ hui gʼa meu‸ jehˇ chehˇ tuˬ sheˍ ve yoˬ. Nawˬ hui mawˇ teˇ ceuˬ ceuˬ pfuhˇ tawˆ-e chehˇ ve htawˇ, oˇ ve teˇ hpaˍ hta‸ ha‸ shaˉ taˍ gʼa tuˬ ve maˇ heˆ. Nawˬ hui ha‸ shaˉ taˍ gʼa ve htawˇ, ma‸ bawˆ kuiˬ lo ngaˬ te luˬ te sheˆ piˇ tuˬ yoˬ. 15Nawˬ hui caˬ ti ve htawˇ, gʼa gʼeu‸ caˇ tuˬ ve maˇ heˆ. Nawˬ hui shaˍ lonˍ awˬ chu nyiˉ yuˬ chehˇ ve htawˇ, gʼa yehˇ tuˬ ve maˇ heˆ. Nawˬ hui a pehˉ meuˇ gʼuiˬ nyiˉ chehˇ ve htawˇ, gʼa dawˬ tuˬ ve maˇ heˆ. 16Nawˬ hui lehˬ jawˇmawˇ Awˇmaˍriˆ leh yawˇ ve yaˇ paˍ jawˇmawˇ Aˍhaˆ hkʼa shuˍ, haiˬ ve kanˉ hta‸ te tcuhˉ taˍ ve yoˬ. Nawˬ hui lehˬ, yawˇ huiˉ maˬ te ve hkʼe gʼa‸ te ve pa taw, ngaˬ nawˬ hui hta‸ luˬ kuiˬ sheˆ kuiˬ lo gaˬ piˇ lawˬ leh, chaw hkʼa peu-eˬ nawˬ hui hta‸ shawˍ baˬ tuˬ yoˬ. Hkʼaˬ hpawˇ chi hpawˇ lo chehˇ ve chaw yaˇ teˇ hpaˍ, nawˬ hui hta‸ maˇ shawˍ maˇ caˆ te laˇ tuˬ yoˬ.
Currently Selected:
Miˆhkaˍ li‸ 6: LHBE
Highlight
Share
Copy
Want to have your highlights saved across all your devices? Sign up or sign in
Lahu Bible Edited © Thailand Bible Society and Bible Society of Myanmar, 2010, 2020.