Miˆhkaˍ li‸ 5
5
1Yeˍruˆsaˍlehnˍ venˇ yaˇ teˇ hpaˍ-oˬ, nawˬ hui ve ma‸ moˍ hta‸ shawˍ-o‸. Canˇ paˍ teˇ hpaˍ ngaˬ hui hta‸ caw hoˆ taˍ peuˬ. Yawˇ hui lehˬ, Iˉsaˍreˍlaˆ chaw hui ve awˬ hoˉ awˬ naˬ teˇ hpaˍ hta‸ ca bawˆ la chehˇ ve yoˬ.
Behˍlehˍhehnˍ hkʼaw jawˇmawˇ paw la tuˬ
2Gʼuiˬsha kʼoˆ ve, Behˍlehˍhehnˍ Eˇhpaˍraˆ-oˬ, nawˬ lehˬ Yuˇda‸ mvuhˇmiˬ hkʼaw lo shu a‸ kehˉ i jaˇ ve venˇ hpeh‸ ve yoˬ. Ya‸ hkʼaˇ, Iˉsaˍreˍlaˆ chaw hui hta‸ uˉ peunˍ tuˬ ve chaw teˇ gʼaˇ, nawˬ awˬ hkʼaw lo ngaˬ tawˆ la piˇ tuˬ yoˬ. Yawˇ lehˬ aˬ sho-eˬ htaˇ ve chaw teˇ gʼaˇ ve awˬ ceuˬ awˬ hkʼaˇ hpeh‸ ve yoˬ.
3Chi hta‸ pa taw, yaˇ paˍ oˇ ve teˇ gʼaˇ paw la htaˇ hkʼa gaˬ, Gʼuiˬsha lehˬ yawˇ ve chaw teˇ hpaˍ hta‸ yawˇ hui ve canˇ paˍ teˇ hpaˍ ve la‸ sheh hkʼaw lo chiˇ baˬ taˍ piˇ tuˬ yoˬ. Oˇ htaˇ, shu ve mvuhˇmiˬ hkʼaw gʼa ca chehˇ taˍ ve yaˇ paˍ oˇ ve awˬ ceuˬ awˬ hkʼaˇ teˇ hpaˍ kʼaw‸ cawˇ da‸ hawˍ da‸ la tuˬ yoˬ. 4Yaˇ paˍ oˇ ve tawˆ la ve teˇ yanˇ, yawˇ lehˬ Gʼuiˬsha geh gʼa ve awˬ gʼaˇ awˬ shaˉ leh, Gʼuiˬsha ve awˬ me‸ awˬ hponˇ hta‸ cuˇ leh yawˇ ve chaw teˇ hpaˍ hta‸ uˉ peunˍ tuˬ yoˬ. Yawˇ ve chaw teˇ hpaˍ, gawˬ lehˍ gʼa chehˇ tuˬ yoˬ. Awˬ lawn kʼo, miˬguiˬ hkʼoˆ chehˇ ve chaw hkʼa peu-eˬ yawˇ hkʼaˬ ma uiˍ jaˇ mvuh jaˇ ve hta‸ gʼa mawˬ gʼa shiˍ tuˬ yoˬ. 5Yawˇ lehˬ, gawˬ lehˍ ve awˬ ceuˬ hta‸ yuˬ laˬ tuˬ yoˬ.
Htaiˍ hkʼaw‸ tuˬ leh ciˍ yanˍ tuˬ
Aˍsuˇriˆ chaw hui ngaˬ hui ve mvuhˇmiˬ hta‸ ca bawˆ la ve teˇ yanˇ, yawˇ hui hta‸ tawˍ taˍ tuˬ awˬ gʼaˇ uiˍ jaˇ ve ngaˬ hui ve awˬ hoˉ awˬ naˬ teˇ hpaˍ hta‸ kʼai peu tuˬ yoˬ. 6Yawˇ hui lehˬ la‸ caˉ hta‸ yehˇ leh, Aˍsuˇriˆ chaw hui hta‸ ma‸ bawˆ gʼaˇ leh, Aˍsuˇriˆ chaw ngaˬ hui hta‸ ca bawˆ la ve teˇ yanˇ, ngaˬ hui hta‸ yawˇ hui ve la‸ sheh hkʼaw ponˬ laˇ tuˬ yoˬ.
7Maˇ suh-e leh cawˬ taˉ ve Iˉsaˍreˍlaˆ chaw teˇ hpaˍ lehˬ, chaw ceuˬ teˇ hpaˍ awˬ hkʼoˆ lo Gʼuiˬsha ce la piˇ ve ciˍ gʼuiˬ leh, mvuh‸ hkʼoˆ lo ya‸ la chehˇ ve mvuhˇ yeˬ gʼuiˬ hkʼa shuˍ, shu awˬ pon awˬ bon uiˍ ve chaw hpeh‸ tuˬ yoˬ. Yawˇ hui lehˬ Gʼuiˬsha hta‸ ceh tiˉ gʼaˇ va leh, chaw yaˇ hta‸ gʼaˇ va tuˬ ve maˇ heˆ. 8Shu mvuhˇmiˬ lo chehˇ taˉ ve chaw teˇ hpaˍ lehˬ, heh puiˉ hkʼaw lo caˇ tuˬ ca toˇ chehˇ ve laˇ caˬ shiˉ hkʼa shuˍ, hkʼa mawˬ ve yawˬ ehˉ teˇ hpaˍ hta‸ che‸ caˇ leh tzuh‸ suhˍ tuˬ yoˬ. Yawˇ hui hta‸ htaiˍ hkʼaw‸ piˇ tuˬ te maˇ gʼa. 9Iˉsaˍreˍlaˆ chaw teˇ hpaˍ lehˬ, yawˇ hui ve canˇ paˍ teˇ hpaˍ hta‸ bawˆ gʼaˇ leh, yawˇ hui hta‸ te luˬ te sheˆ piˇ tuˬ yoˬ.
10Gʼuiˬsha kʼoˆ ve, Oˇ htaˇ ngaˬ lehˬ nawˬ hui ve iˉ mvuhˇ teˇ hpaˍ hta‸ yuˬ kʼai leh nawˬ hui ve iˉ mvuhˇ lawˬ teˇ hpaˍ hta‸ te luˬ tuˬ yoˬ. 11Nawˬ hui ve mvuhˇmiˬ hkʼaw cawˬ ve venˇ teˇ hpaˍ hta‸ ngaˬ te luˬ leh, nawˬ hui ve ta‸ yehˬ teˇ hpaˍ hta‸ htawˇ ngaˬ dawˆ paˆ tuˬ yoˬ. 12Mawˉ paˍ teˇ hpaˍ hta‸ ngaˬ te luˬ piˇ leh, faˍ te puiˉ ve chaw hui hta‸ htawˇ ngaˬ teh taˉ piˇ tuˬ ve maˇ heˆ. 13Nawˬ hui oˉ kʼoˍ pui chehˇ ve da‸ kehˬ ve haˉ pui hkuiˉ daw teˇ hpaˍ leh shaˉ ho‸ teˇ hpaˍ hta‸ htawˇ, ngaˬ te luˬ tuˬ yoˬ. Nawˬ hui te taˍ ve awˬ ceuˬ teˇ hpaˍ hta‸ nawˬ hui teˇ pawˆ ka‸ oˉ kʼoˍ gʼa kʼaw‸ pui tuˬ ve maˇ heˆ. 14Nawˬ hui ve mvuhˇmiˬ hkʼaw cawˬ ve Aˍsheˍraˆ gʼuiˬsha ma ve shaˉ ho‸ teˇ hpaˍ ngaˬ gʼawˬ baˬ leh, nawˬ hui ve venˇ teˇ hpaˍ hta‸ ngaˬ te luˬ tuˬ yoˬ. 15Ngaˬ ve tawˇ hkawˇ hta‸ maˇ na yuˬ ve chaw ceuˬ hkʼa peu-eˬ ve hta‸ ngaˬ nyi ma zuhˆ jaˇ ve hkʼaw kʼaw‸ te hkʼaw‸ piˇ tuˬ yoˬ.
Currently Selected:
Miˆhkaˍ li‸ 5: LHBE
Highlight
Share
Copy
Want to have your highlights saved across all your devices? Sign up or sign in
Lahu Bible Edited © Thailand Bible Society and Bible Society of Myanmar, 2010, 2020.