Miˆhkaˍ li‸ 7
7
Iˉsaˍreˍlaˆ chaw hui luˬ kʼai sheˆ kʼai chehˇ ve
1Ngaˬ lehˬ dawˇ haˍ jaˇ hpeh‸ bawˬ jaˇ ve yoˬ. Ngaˬ lehˬ iˉ shiˍ cehˬ hkʼoˆ lo iˉ shiˍ teˇ shiˍ ka‸ ca maˇ mawˬ ve chaw, leh a pehˉ meuˇ te hkʼoˆ lo a pehˉ meuˇ shiˍ ca maˇ mawˬ ve awˍ meu‸ jaˇ chehˇ ve chaw teˇ gʼaˇ hkʼa shuˍ hpeh‸ ve yoˬ. A pehˉ meuˇ shiˍ leh, mehˬ jaˇ ve maˉ nawˆ shiˍ hkʼa peu-eˬ hta‸ shu shaˉ kʼai peuˬ. 2Mvuhˇmiˬ hkʼaw hteˇ ve cawˇ ve chaw teˇ gʼaˇ ka‸ maˇ cawˬ leh, Gʼuiˬsha hta‸ ka ti‸ yeˬ chehˇ ve chaw teˇ gʼaˇ ka‸ maˇ cawˬ. Chaw teˇ gʼaˇ le le shu hta‸ tiˇ pehˍ tuˬ da‸ ve awˬ yanˇ hta‸ law chehˇ taˍ ve yoˬ. Chaw teˇ gʼaˇ le le a shu yawˇ ve awˬ chawˇ awˬ paˆ teˇ hpaˍ hta‸ gʼa‸ yuˬ chehˇ taˍ ve yoˬ. 3Yawˇ hui lehˬ, haiˬ ve kanˉ hta‸ te puiˉ jaˇ ve chaw hpeh‸ ve yoˬ. A ma‸ lonˉ leh suhˉ jehˬ shehˍ hpaˇ teˇ hpaˍ lehˬ, shu geh la‸ shawnˍ lawˬ yuˬ chehˇ ve yoˬ. Awˬ me‸ awˬ hponˇ cawˬ ve chaw lehˬ, yawˇ heuˆ gaˇ ve awˬ ceuˬ yawˇ hui hta‸ hto piˇ leh, yawˇ hui teˇ geh jehˬ da‸ chehˇ ve yoˬ. 4Yawˇ hui awˬ hkʼaw lo da‸ jaˇ leh, hteˇ jaˇ cawˇ jaˇ ve chaw hui htawˇ, mvuh‸ hkʼa shuˍ te‸ chiˉ awˬ hpfuhˇ maˇ cawˬ ve chaw hpeh‸ ve yoˬ.
Tcuh kaˍ paˍ teˇ hpaˍ hta‸ cuˇ leh Gʼuiˬsha shaˍ ti‸ piˇ taˍ ve hkʼe, yawˇ hui hta‸ ciˍ yanˍ piˇ tuˬ ve awˬ yanˇ gaˬ la peuˬ ve yoˬ. Chi beu‸ yawˇ hui dawˇ maˇ tawˆ te chehˇ ve yoˬ. 5Nawˬ awˬ paˇ awˬ kui chehˇ ve chaw hui hta‸ taˇ yonˍ. Nawˬ ve awˬ chawˇ hta‸ htawˇ gʼaˇ taˇ va. Nawˬ miˇ ma hta‸ tawˇ yaw htaˇ htawˇ shaˍ ti‸ taˍ. 6Chi hkʼe ve awˬ yanˇ awˬ hkʼaw lo, yaˇ teˇ hpaˍ lehˬ a shu yawˇ ve awˬ pa hta‸ chaw gʼuˇ hkʼe shawˍ leh, yaˇ miˇ teˇ hpaˍ lehˬ a shu yawˇ ve awˬ e hta‸ tawˍ da‸ tuˬ yoˬ. Awˬ hkuiˇ ma teˇ hpaˍ a shu yawˇ ve awˬ pi ma hta‸ ya‸ da‸ leh, a shu yawˇ ve canˇ paˍ lehˬ, a shu yawˇ ve yehˬ yaˇ kʼa yaˇ teˇ hpaˍ hpeh‸ tuˬ yoˬ.
7Ya‸ hkʼaˇ, ngaˬ lehˬ Gʼuiˬsha hta‸ ceh tiˉ law nyi tcuhˉ taˍ tuˬ yoˬ. Ngaˬ hta‸ ponˬ laˇ tuˬ ve Gʼuiˬsha hta‸ ceh tiˉ ngaˬ nyi ma yeˬ chaweh taˍ leh law nyi tcuhˉ taˍ tuˬ yoˬ. Ngaˬ ve Gʼuiˬsha lehˬ ngaˬ kuˬ hkawˇ hta‸ na yuˬ laˇ tuˬ yoˬ.
Gʼuiˬsha htaiˍ hkʼaw‸ piˇ tuˬ
8Ngaˬ hui ve canˇ paˍ teˇ hpaˍ lehˬ, ngaˬ hui awˬ hkʼoˆ hta‸ gʼa kʼaw‸ ha lehˬ chehˇ tuˬ ve maˇ heˆ. Ngaˬ hui lehˬ paiˍ peuˬ ve htawˇ, teˇ pawˆ kʼaw‸ tu la tuˬ yoˬ. Chi beu‸ ngaˬ hui lehˬ naˆ ho‸ ve hkʼaw chehˇ taˍ ve yoˬ. Ya‸ hkʼaˇ, Gʼuiˬsha ngaˬ hui hta‸ awˬ gʼeuˆ piˇ laˇ tuˬ yoˬ. 9Ngaˬ hui lehˬ Gʼuiˬsha hta‸ te ya‸ peuˬ. Chi hta‸ pa taw, ngaˬ hui teˇ hkui teˇ yanˇ yawˇ nyi ma zuhˆ ve hta‸ gʼa hkanˍ tuˬ yoˬ. Ya‸ hkʼaˇ, awˬ leh meuˇ gaˬ kʼo, yawˇ ngaˬ hui hta‸ ha‸ shaˉ laˇ leh, ngaˬ hui hta‸ te laˇ ve maˇ cawˇ ve awˬ ceuˬ hta‸ cawˇ ve awˬ ceuˬ kʼaw‸ hpeh‸ la piˇ tuˬ yoˬ. Yawˇ ngaˬ hui hta‸ awˬ gʼeuˆ cawˬ kuiˬ lo shiˍ tawˆ laˇ leh, yawˇ ngaˬ hui hta‸ ponˬ laˇ ve hta‸ ngaˬ hui gʼa mawˬ tuˬ yoˬ. 10Oˇ htaˇ ngaˬ hui ve canˇ paˍ teˇ hpaˍ awˬ ceuˬ chi hta‸ gʼa mawˬ leh, awˬ me‸ awˬ hponˇ luˬ kʼai tuˬ yoˬ. Yawˇ hui lehˬ, Nawˬ hui ve Jawˇmawˇ Gʼuiˬsha hkʼaˬ lo le, teh‸ ngaˬ hui hta‸ maˇ shawˍ maˇ caˆ te leh na nyi laˇ chehˇ ve yoˬ. Yawˇ hui shonˇ kʼai leh, ya‸ kʼaw hkʼoˆ lo cawˬ ve je‸ nehˆ hkʼa shuˍ, shu naˆ toˇ ve hta‸ gʼa hkanˍ tuˬ yoˬ.
11Yeˍruˆsaˍlehnˍ venˇ yaˇ teˇ hpaˍ-oˬ, lanˇ venˇ hta‸ kʼaw‸ tanˬ kawˍ tuˬ awˬ yanˇ gaˬ la chehˇ ve yoˬ. Oˇ htaˇ gaˬ kʼo, nawˬ hui ve mvuhˇmiˬ kʼehˬ la tuˬ yoˬ. 12Hkʼaˬ hpawˇ chi hpawˇ lo chehˇ taˍ ve nawˬ hui ve chaw teˇ hpaˍ, nawˬ hui geh kʼaw‸ la tuˬ yoˬ. Mvuhˇ nyi tawˆ hpawˇ Aˍsuˇriˆ mvuhˇmiˬ hkʼaw chehˇ taˍ ve chaw teˇ hpaˍ maˇ kʼoˆ, awˬ hawˉ hpawˇ Eˇjiˇtu‸ mvuhˇmiˬ hkʼaw chehˇ taˍ ve chaw teˇ hpaˍ maˇ kʼoˆ, laˇ tsuhˇ gʼuiˬ choˬ hpawˇ oˇ hpawˇ lo chehˇ taˍ ve chaw teˇ hpaˍ maˇ kʼoˆ, hkʼaw hkʼoˆ lawˬ hkʼoˆ lo chehˇ ve chaw teˇ hpaˍ, nawˬ hui geh kʼaw‸ la tuˬ yoˬ. 13Miˬguiˬ hkʼoˆ chehˇ ve chaw teˇ hpaˍ cha‸ chiˆ jaˇ ve pa taw, miˬguiˬ chi lehˬ gawˬ cu gawˬ pehˆ hpeh‸ kʼai tuˬ yoˬ.
Iˉsaˍreˍlaˆ chaw hui hta‸ Gʼuiˬsha ha kʼaˉ ve
14Gʼuiˬsha-oˬ, nawˬ leuˆ yuˬ taˍ ve chaw teˇ hpaˍ hta‸ a ciˉ nyi ha‸ shaˉ piˇ-oˆ. Yawˇ hui lehˬ chi beu‸ heh puiˉ hkʼaw lo chehˇ taˍ ve yoˬ. Aˬ sho-eˬ yawˇ hui te caˇ jaw muiˬ ve Baˍshanˍ leh Giˇlaˆ mvuhˇmiˬ hkʼaw cawˬ ve hkuiˇ jaˇ da‸ jaˇ ve chehˇ kuiˬ lo yawˇ hui hta‸ kʼaw‸ kʼo‸-e tcuh piˇ lawˬ-o‸.
15Gʼuiˬsha-oˬ, aˬ sho-eˬ nawˬ ngaˬ hui hta‸ Eˇjiˇtu‸ mvuhˇmiˬ hkʼaw shiˍ tawˆ la chehˇ htaˇ hkʼe, ngaˬ hui hta‸ anˇ tuˬ awˬ heˆ teˇ hpaˍ te maˍ laˇ-oˆ. 16Chaw ceuˬ teˇ hpaˍ awˬ gʼaˇ uiˍ jaˇ ve htawˇ, chi hta‸ gʼa mawˬ leh nyi ma luˬ kʼai tuˬ yoˬ. Hpeh‸ haˍ jaˇ ve hkʼaw yawˇ hui maw‸ kʼaw me‸ taˍ leh, a shu yawˇ ve naˍ paw hta‸ hoˆ taˍ tuˬ yoˬ. 17Vuiˬ hkʼa shuˍ yawˇ hui je‸ meu-e hkʼaw loˇ kʼai leh, kawˆ jaˇ ve hkʼaw yawˇ hui ve ta‸ yehˬ hkʼaw tawˆ la tuˬ yoˬ. Yawˇ hui kawˆ jaˇ leh ngaˬ hui ve Jawˇmawˇ Gʼuiˬsha geh kʼaw‸ hpfuhˆ kʼaw‸ la tuˬ yoˬ.
18Gʼuiˬsha-oˬ, nawˬ hta‸ shuˍ ve awˬ kaˍ awˬ nu gʼuiˬsha teˇ gʼaˇ ka‸ maˇ cawˬ. Nawˬ lehˬ a sha‸ te‸ chehˇ sheˍ ve nawˬ ve chaw teˇ hpaˍ ve venˇbaˆ hta‸ hpehˇ piˇ ve yoˬ. Nawˬ lehˬ co co nyi ma zuhˆ chehˇ ve maˇ heˆ. Ya‸ hkʼaˇ, nawˬ ve ha‸ pehnˇ ve teˇ ceuˬ ngaˬ hui hta‸ hpeu‸ maˍ laˇ ve yoˬ. 19Nawˬ lehˬ ngaˬ hui hta‸ teˇ pawˆ kʼaw‸ ha kʼaˉ laˇ tuˬ sheˍ ve yoˬ. Nawˬ lehˬ ngaˬ hui ve venˇbaˆ hta‸ naˆ tiˍ taˍ leh, oˇ ve teˇ hpaˍ hta‸ laˇ tsuhˇ gʼuiˬ tawˬ lo ya‸-e piˇ tuˬ yoˬ. 20Nawˬ lehˬ aˬ sho-eˬ htaˇ ngaˬ hui ve awˬ puˍ awˬ pi teˇ hpaˍ hta‸ ka ti‸ te taˍ ve hkʼe, Aˍbraˍhanˍ leh Yaˍkoˆ ve awˬ ceuˬ awˬ hkʼaˇ teˇ hpaˍ hta‸ ka ti‸ yeˬ leh, nawˬ ve ha‸ pehnˇ ve awˬ lawn hpeu‸ maˍ piˇ tuˬ yoˬ.
Currently Selected:
Miˆhkaˍ li‸ 7: LHBE
Highlight
Share
Copy
Want to have your highlights saved across all your devices? Sign up or sign in
Lahu Bible Edited © Thailand Bible Society and Bible Society of Myanmar, 2010, 2020.