1 YOHANA 4
4
1 YOHANA 4
1Sa̧a̧m mi rɔbɛ wɛ, bɔnɛ ɗɔbs mɔkil wɔ sɛw. Goonɛhi kɛnɛ an nɛ mɛɛhi hi rɔbo a kinsa hi fu̧u̧z a Bɛt ge. Ya̧a̧nɛ Bɛt ya̧a̧kɛŋkya ya̧a̧gɔ̧ɔ̧nyaadɛ kittɔnɔ hi ɛmbik a waali du. 2Hinyɔ gɔ nɛ mɛɛn Bɛt Mɔkilɔ gɛrɛ: za̧a̧nyɔ raahi n gaattɔnɔ a dood muutdu a be ta̧a̧ a Yeesu Kristu wɛɛ dooyɔ, gi zaa a waal du, gii gin Bɛt Mɔkilɔ. 3Wɛɛ za̧a̧nyɔ raahi n anbɔ a Yeesu zulha gɛ taan Bɛt Mɔkilɔ. Mɔkil bɔrɔ lab gi za̧a̧nyɔ gi hɛ̧ɛ̧nik Kristu lɔl ɔ̧ɔ̧nɛ. Nɛ kɛm nɛ a gi zaako, yɛrɛ zaaza a waal du ma.
4Waat mi hatil wɛ, nɛnɛ nɛ fu̧u̧ a Bɛt ge, nɛ ɗɛɛ Bɛtya̧a̧kɛŋkya ya̧a̧gɔ̧ɔ̧nyaadɛ ɗɛɛ, ya̧a̧nɛ, za̧a̧nyɔ gi a nɛ kpoos du gin tɛŋk daar Saydanu yɔ gi a waal du daarɔ. 5Bɛtya̧a̧kɛŋkya ya̧a̧gɔ̧ɔ̧nya wɔrɔ labɔ hi fu̧u̧z a waal du. Yɔ anbɔ hi book waal dɔglɛ, wɛɛ waal gisihi kɛŋk be. 6Wɛnɛ wɛ gi Bɛt waato, wɛ fu̧u̧z a Bɛt ge. Za̧a̧nyɔ mɛɛ Bɛto gisɛ kɛŋko; wɛɛ za̧a̧nyɔ taa Bɛt waaɔ gɛ, fū̧ū̧ a Bɛt ge gɛ, taasɛ kɛŋko. Hinɔ anbɔ ro wɛ mɛɛn mɔkil rɔbo hi mɔkil a̧a̧bi.
7Saam mi rɔbɛ, yɛnɛ gi ha̧a̧tinwɛ. Yɔ anbɔ, ha̧a̧tig fu̧u̧z a Bɛt ge, wɛɛ za̧a̧nyɔ gin hat gi kpoos du gi Bɛt waayɔ, hi mɔɔg a Bɛt ge, wɛɛ mɛɛ Bɛt hɛw. 8Za̧a̧nyɔ ha̧a̧g Bɛto hi dooɗ gɛ ɔnɛ mɛ̄ɛ̄ Bɛt gɛ; anyɔ Bɛt gi hato. 9Hinyɔ Bɛt zunsin wɛ gaattɔnɔ a ha̧a̧be wɛya: gɛ a yaaz waaɔ gbunsim a waal du an wɛ za̧a̧ gi dɔŋgo.
10Hinyɔ wɛ mɛɛn a Bɛt ha̧a̧g wɛɛ gɛrɛ: taa an ha̧a̧ wɛɛ Bɛto, yɛrɛ ha̧a̧ gii a wɛɛge gi yaaz waaɔ an gi wɛɛ hinha̧a̧l wɛ naandɛmsɛ. 11Saam mi rɔbɛ, Bɛt gi ha̧a̧g wɛɛ labɔ, wɛɛ hɛw yɛgi ha̧a̧tinwɛ. 12Doo za gbɛ̄ndir Bɛt gɛ, yɛrɛ gi giwɛ ha̧a̧tingo, Bɛt gi waak ɔksig gbun hi wɛya, wɛɛ waabil wɛ zuun a Bɛt ha̧a̧tig tɔɔ da̧a̧da̧ wɛ kpoos du.
13Anyɔ Bɛt gɛ̧ɛ̧sɛ Mɔkil ɔnɛ, wɛ mɛɛn gɔ a wɛ waak ɔksig gbun hi giya, gii be gi waak ɔksig gbun hi wɛya. 14Winɛ wi gbɛɛnɔ a Baa wɛ Bɛt yaaz waaɔ an za̧a̧sigya a waal du, wi wɛɛ wi gi dɔglɔ gii raako. 15Za̧a̧nyɔ raahi n gaattɔnɔ a dood muutdu a be ta̧a̧ a Yeesu gi Bɛt waayɔ, yɔ anbɔ Bɛt gi waak ɔksig gbun hi giya, gii be gi waak ɔksig gbun hi Bɛto. 16Wɛnɛ wɛ mɛɛmɛ, wɛ ɗɔbs a Bɛt ha̧a̧g hi wɛya, Bɛt gii gi hato. Za̧a̧nɔ gi ha̧a̧g Bɛt hi doodɛ, gi waak ɔksig gbun hi Bɛto, Bɛt be gi waak ɔksig gbun hi giya.
17Hinyɔ gi zuunik a Bɛt ha̧a̧tigɔ tɔɔ da̧a̧da̧ a wɛ kpoos du gɛ: a anyɔ ɛmbil wɛ gi a waali du an Yeesu ɔnɛ be, wɛ mɛɛ a wɛ gin kpoos saŋtum a ɔ̧tyɔ Bɛt gɔ gi gbaas dood dɔgl gedu. 18Hat ɔks hi hoob gɛ. Bɛt ha̧a̧tigɔ yɔ tɔɔ gi da̧a̧ a wɛ kpoos du nin hoob ninɔ, an yɔ hoob fu̧u̧ a ya̧a̧rhantyɔ Bɛt gɔ gi gaa dood gedu. Za̧a̧nyɔ hoobha̧a̧ge, Bɛt ha̧a̧tigɔ tɔ̄ɔ̄ dā̧ā̧ gi kpoos du gɛ.
19Bɛt ha̧a̧ge a wɛɛge doos ro, ya̧a̧nɛ gi ha̧a̧wɛ a ge hi doodɛ. 20Za̧a̧n za gi dɔg a ha̧a̧b Bɛto, gi wɛɛ gigi naazaza lɔlhɛ̧ɛ̧nuko, gi ya̧a̧gɔ̧ɔ̧nyayɔ. Za̧a̧nyɔ hā̧a̧g naaza yɔ gi gbɛnik gɛ rɛ, ɗɛɛ an gi ha̧a̧ge Bɛt yɔ gbɛnig gɛ ri ma nɔ? 21Dɔgl yɔ Yeesu raawɛ: gɛ a za̧a̧nɔ gi ha̧a̧g Bɛto gi ha̧a̧g naaza hɛw.
Currently Selected:
1 YOHANA 4: NTD
Highlight
Share
Copy
Want to have your highlights saved across all your devices? Sign up or sign in
Doyayo New Testament © Bible Society of Cameroon, 1991.