1 YOHANA 5
5
1 YOHANA 5
1Za̧a̧nyɔ ɗɔbsɔ a Yeesu gii Masihu bɔ gi Bɛt waayɔ. Za̧a̧nyɔ ha̧a̧g a Baa wɛ Bɛt ge, ha̧a̧g waaɔ hɛw. 2Gi ha̧a̧wɛ Bɛto, wɛ wɛɛ wɛ gi wook hinyɔ giwɛ raako, anbɔ, wɛ mɛɛ gɔ a ha̧a̧wɛ Bɛt waatɔ wɔ sɛw. 3Hinyɔ raakɔ a ha̧a̧wɛ Bɛto: gɛ an wɛ wa̧a̧ dɔglɔ wɔ raawɛ an wɛ fɔbɔ. Dɔglɔ wɔ hi ɓāā gɛ. 4Ya̧a̧nɛ, za̧a̧nyɔ mɔɔy a Bɛt ge sɛw gi ɗɛɛk waal ɗɛɛ. Wɛɛ hinyɔ wɛ ɗɛɛnik waal: gɛ ɗɔbsig wɛnɛ.
5Bɔ gi ɗɛɛk waal nɔ? Doo za ɗɛ̄ɛ̄ gɛ, gɛ za̧a̧nyɔ ɗɔbs a Yeesu gi Bɛt waa kpɔd. 6Gɛ Yeesu Kristu, zaan mɛmɛ hi ga̧a̧mɛ; zāā hi mɛm bɔ gii kpɔd gɛ, zaan mɛm bɔ hi ga̧a̧m bɔ eer sɛw. Segya yɔ gisɛ hin bɔrɔ zuunuko gɛ: Bɛt Mɔkil bɔ. Mɔkil bɔ be gi rɔbo, ya̧a̧gɔ̧ɔ̧n taa a ge. 7Segyaadɛ taarɛ hi giro: 8gɛ Bɛt Mɔkil bɔ, hi mɛm bɔ hi ga̧a̧m bɔ, hin taarɛ wɔrɔ sɛw hi ɔks ya̧a̧ya̧ gbunu.
9Yɔ dood segya wɔ gɔ hi dɔk hinyɔ hi gbɛnɔ, nɛ wɛ ɗɔbs dɔglya̧ ɗɔbs ma mi? Mɛɛn a hinyɔ Bɛt gi dɔko tɔɔ daar hinyɔ dood gɔ hi dɔk daarɔ. Bɛt wɛɛ dɔg hin wɔrɔ lab sɛw hi zulɔ a waaɔ zulha. 10Za̧a̧nyɔ ɗɔ̄bs Bɛt waa bɔ mɛɛ du a hinyɔ Bɛt gi dɔko gi rɔbo. Za̧a̧nyɔ ɗɔbs hinyɔ Bɛt gi dɔk gɛ, wɛɛnig ya̧a̧gɔ̧ɔ̧n-yayɔ, anyɔ ɗɔ̄bs hinyɔ Bɛt gi dɔk a waaɔ zulha gɛ.
11Hinyɔ Bɛt dɔgsɛ gɛrɛ: Bɛt gaazɛ za̧a̧tig faa, wɛɛ za̧a̧tig bɔrɔ gi a waaɔ naan du. Za̧a̧nyɔ kpoosɔ ɔks hi waa bɔ gin za̧a̧tig faa bɔ. 12Za̧a̧nyɔ taan Bɛt waa bɔ gɛ be, taan za̧a̧tig faa bɔ hɛw.
13Nɛɛ dood wɔ nɛ ɗɔbsig Bɛt waa bɔ, mi bi̧i̧sin hin wɛrɛ sɛw an nɛ mɛɛ a nɛ gin za̧a̧tig faa. 14Wɛ gin kpoos saŋtum a zɔ̧k wɛ bɔ gedu a Bɛt muut du an yɛrɛ lɛ: wɛ mɛɛ a wɛ ɛrig hinza yɔ ha̧a̧ge, gisɛ kɛŋko.
15Wɛɛ, gid wɛ mɛɛ a gisɛ kɛŋk hinyɔ wɛ gig zɔ̧k sɛwi, yɔ anbɔ gɔ wɛ bɛɛg hinzɔ̧ko, wɛ mɛɛ a wɛ dag hinɔ da̧a̧da̧ ma. 16Za̧a̧nza gi gbɛn naaza gi wook hinha̧a̧l yɔ taa kaŋk a wɔrk du gɛ, zɔ̧bsigge Bɛto; Bɛt gi za̧a̧sige. Bɛt gi za̧a̧s wɔ hi wook hinha̧a̧l yɔ taa kaŋk a wɔrk du gɛ. Yɛrɛ hinha̧a̧l za giro, gi kaŋk a wɔrk du; mi rāā a nɛ zɔ̧b Bɛt a dood wɔ hi wook hinha̧a̧l bɔrɔ lab hi zulha gɛ. 17Hin-a̧a̧b yɔ gɔ hi wook sɛw gi hinha̧a̧lɛ; yɛrɛ hinha̧a̧l za giro, gɔ kām doo a wɔrk du gɛ.
18Wɛ mɛɛ a za̧a̧nyɔ mɔɔy a Bɛt ge taa hinha̧a̧l wooko. Ya̧a̧nɛ, Bɛt waa fu̧u̧s bɔ Yeesu , gig ooko. Yɔ anbɔ, loorɛha̧a̧lɛ yɔ gi za̧a̧n bɔbtini, ɗɛ̄ɛ̄ an gi zɛŋg ma gɛ. 19Wɛnɛ wɛ mɛɛ a wɛ gi Bɛt waato, wɛ fu̧u̧z a Bɛt ge, wɛɛ dood zaadɛ wɔ waal du sɛw hi waak a loorɛha̧a̧lɛ bɔ gi za̧a̧n bɔbtin gi naan du. 20Wɛ mɛɛ hɛw a Bɛt waa bɔ zaa waal du gogsɛ hinmɛɛki an wɛ mɛɛ Bɛt yɔ gi rɔbo, wɛ́ wɛɛ wɛ́ ɔks hi Bɛt yɔ gi rɔbo hi waaɔ Yeesu Kristu yɔ gi rɔb be. Gii Yeesu Kristu gi Bɛt rɔbo. Wɛɛ gi za̧a̧tig faa bɔ hɛw. 21Waat mi hatil wɛ, oon zul nɛ an bɔnɛ fɔb bɛt za ya̧a̧gɔ̧ɔ̧nya wɔ. Anbɔ.
Currently Selected:
1 YOHANA 5: NTD
Highlight
Share
Copy
Want to have your highlights saved across all your devices? Sign up or sign in
Doyayo New Testament © Bible Society of Cameroon, 1991.