1 YOHANA 3
3
1 YOHANA 3
1Sɔ̧ɔ̧n ha̧a̧tig gbɔɔl yɔ Baa wɛ Bɛt ha̧a̧g hi wɛya, giwɛ elik a wɛ gi waat ɔ̧ɔ̧nɛ; hi rɔbo, wɛ gi Bɛt waato. Ya̧a̧ gi dood waal du hi mɛ̄ɛ̄wɛ gɛ. Hi mɛ̄ɛ̄ Yeesu gɛ, gi nɛ an hi mɛɛwɛ ri nɔ? 2Saam mi rɔbɛ wɛ, ɓɔri wɛ gi Bɛt waat ma. Yɛrɛ hinyɔ gɔ wɛ wɛɛ hinɔ midir kɛn gɛ. Yɛrɛ wɛ mɛɛmɛ a Kristu, Masihu bɔ gɔ gi midza, wɛ gbɛnige anyɔ giro, anbɔ, wɛ́ riitin hi giya. 3Za̧a̧nyɔ gi ook hinyɔ Kristu gɔ gi woosig anbɔ, gi wɛɛnik kpoosɔ gaati an Kristu yɔ gi Doo gaat be.
4Za̧a̧nyɔ gi wook hinha̧a̧lɛ gi ɗa̧a̧k Bɛt maakdɔglɔ gig wɛɛnik tɔsyɔ. Hinha̧a̧l bɔ wookɔ gi Bɛt maakɗa̧a̧kyɔ. 5Yɛrɛ nɛ mɛɛ a Kristu midz an gi ha̧s hinha̧a̧lɛ; gii ɔnɛ hinha̧a̧l taa a ge. 6Za̧a̧nyɔ gi waak ɔks hi giya, taa hinha̧a̧l wooko. Za̧a̧nyɔ gi wook hinha̧a̧l be gbɛndir Yeesu kɛn gɛ, wɛɛ mɛ̄ɛg gɛ hɛw. 7Waat mi hatil wɛ, bɔnɛ ɔɔ doo za gi maatinɛ. Za̧a̧nyɔ gi wook hinyɔ rii gi doo riityɔ anyɔ Kristu gi doo riit be.
8Za̧a̧nyɔ gi wook hinha̧a̧lɛ gi loorɛha̧a̧l doo ɔ̧ɔ̧nɛ. Loorɛ-ha̧a̧l gi gbosig hinha̧a̧l wooki, yɛɛl a waalyɛɛliki tuur ɓɔryɔ. Yɔ gi nɛ an Bɛt waa bɔ gi ha̧tir loorɛha̧a̧l woosɔ wɔ gii gi midza wɛ tees du. 9Za̧a̧nyɔ mɔɔy a Bɛt ge gi Bɛt waayɔ, taa hinha̧a̧l wooko, ya̧a̧nɛ Bɛt dɔ̧ɔ̧tɔ za̧a̧tig seg bɔ Bɛt gaage, gi waak a gi kpoos du. Anyɔ mɔɔy a Bɛt ge, ɗɛ̄ɛ̄ an gi waa hinha̧a̧l wook ma gɛ.
10Hinyɔ gi gɛ̧ɛ̧k Bɛt waatɔ hi loorɛha̧a̧l waatɔ gɛrɛ: Za̧a̧nyɔ taa hin riit wooko, zaabe gɔ gi hā̧ā̧ge a naaza Yeesu fɔkya muul gɛ, taa Bɛt waaɔ. 11Dɔgl yɔ nɛ kɛm gi yɛɛl a biitirnaandu gɛrɛ a yɛnɛ gi ha̧a̧tin wɛ. 12Bɔwɛ riitin an za̧a̧n bɔ nuŋgɔ a Kaynu, yɔ gi Saydanu za̧a̧n bɔbtin bɔ doo ɔnɛ gi lɛbr yɛ̧ɛ̧tɔ yɔ hi mɔɔtinihi buu gbun du. Gbɔŋg a nɔ dɔŋg nɔ? Gbɔŋg a hinriit yɔ gi wook gi dɔŋgo, anyɔ hinwɔ gii gi wook ha̧a̧lɔ.
13Nɛya, yɛ̧ɛ̧dɛ be, waal gi gin lɔlhɛ̧ɛ̧nuko, bɔ hinɔ gi kɔmsin gɛrsɛ. 14Wɛnɛ wɛ mɛɛ a wɛ tuuz wɔrk du, wɛ wɛɛ wɛ gul a za̧a̧tig waal du da̧a̧da̧, wɛ mɛɛ anyɔ ha̧a̧wɛ a yɛ̧ɛ̧dɛ wɛ Yeesu fɔkya wɔ hi muulɛ, ya̧a̧nɛ. Za̧a̧nyɔ hā̧a̧g Yeesu fɔkya zaadɛ gɛ, gis a wɔrk du tɛ̧. 15Za̧a̧nyɔ gi hɛ̧ɛ̧nik naaza lɔlɛ gi zul gbɔŋkyayɔ. Nɛɛ mɛɛ a zulgbɔŋkya taan za̧a̧tig faa; za̧a̧tig bɔ ɗɛ̄ɛ̄ an gi waa gi kpoos du gɛ. 16Hinyɔ wɛ mɛɛn Bɛt ha̧a̧kɔ ha̧a̧g gɛrɛ: anyɔ Kristu ta̧a̧ an gi wɔr a wɛ dɔŋgo, gi an wɛ ta̧a̧ an wɛ wɔr a nawɛza zaadɛ wɔ hi gi a Bɛt gbɔnɔ du hi dɔŋg be.
17Yɛrɛ doo za gi gin rɔɔsɛ, wɛɛ gi gbɛn naaza gi ha̧a̧k ya̧a̧rɛ, gi tā̧ā̧ an gi mɛɛsigya̧a̧r gɛ, yɔ raa ri a ha̧a̧be Bɛt nɔ? 18Waat mi hatil wɛ, bɔgi ha̧a̧wɛ a nawɛza zaadɛ hi ya̧a̧kosɛ, ɗɛwɛ zuun hat wɛ hi woosɛ hi rɔbo. 19Gid ha̧a̧-tinwɛ, wɛ mɛɛ gɔ a wɛ gi Bɛt rɔb bɔ waat ɔ̧ɔ̧nɛ, kpoos wɛ gi saŋ gɔ ma a Bɛt muutdu. 20Kpoos wɛ gi mɔksɛ a wɛ woo hinha̧a̧lɛ, Bɛt tɔɔ daar kpoos wɛ daarɔ, wɛɛ mɛɛ hin sɛw.
21Sa̧a̧m mi rɔbɛ wɛ, kpoos wɛ gi mɔ̄ksɛ a wɛ woo hinha̧a̧l gɛ, wɛ gin kpoos saŋtum a Bɛt muutdu. 22Yɔ anbɔ, anyɔ wɛ gi dɔglɔ wɔ raa wa̧a̧ko, wɛ wɛɛ wɛ wook hinyɔ harig be, wɛ dak hinyɔ wɛ gig ɛrk sɛw a gi naan du. 23Dɔglɔ yɔ raawɛ: gɛ a wɛ ɗɔbs waaɔ Yeesu Kristu nuŋgɔ, gi wɛɛ gi ha̧a̧tinwɛ anyɔ Bɛt raawɛ be. 24Dood wɔ hi wa̧a̧k dɔglɔ wɔ, hi waak ɔksig gbun hi Bɛto, Bɛt gi waak ɔksig gbun hi hii be. Hinyɔ wɛ mɛɛn a Bɛt gi waak ɔksig gbun hi wɛɛ gɛ Mɔkil yɔ gaazɛ gisɛ raako.
Currently Selected:
1 YOHANA 3: NTD
Highlight
Share
Copy
Want to have your highlights saved across all your devices? Sign up or sign in
Doyayo New Testament © Bible Society of Cameroon, 1991.