RUTH 3
3
Ruth ɔɔ ɗɔɔ naŋ Boaz
1Naɔmi tɔ̧ɔ̧ ha̧ Ruth: «Bem kɔ‘m, gana so ha̧‘m mɛ kii ŋma de fara ha̧ mɛ mɛ duk sɛnɛ nɛ̀ desee ɓɔnsɛnɛ. 2Mɛ̀ zɔ́k kinii, Boaz, wi nɛ̀ mɛ nɛɛ kpɛɛfɔ in o kó-de-tom kɔ̧-a̧, nɛ́ nam ko wíì k’ɛɛ. A̧ tɛ gusi alkamaari sɛn fara-gusi-alkamaari kɔ̧-a̧ sɔsɔɔ mɛ zɛ. 3Mɛ̀ zúí yì, mɛ̀ sɔ̧́ yí-nyama tɛ-mɛ, mɛ̀ pí̧ de laa kɔ-mɛ, a̧ mɛ̀ nɛ́ fara-gusi-alkamaari. Ká mɛ e ha̧ a̧ mɛ zɔk mɛ na hɔ ŋgimbi n'aa tɛ kaɗi nyɔŋa mɔ in nɔɔ mɔ sɛ. 4Ŋgimbi n'aa tɛ si mɛ ɔ nù, mɛ tɛ iŋ fara n'aa tɛ ɔ nù sɛnɛ, ɓɛɛ mɛ̀ nɛ́ a̧ a̧ tɛ usi mbe mɔ nɛ mɛ tɛ de siti ha̧ mɛ.»
5Ruth kifa nú ha̧ for: «Mi tɛ de mɔ n’ɛnɛ tɔ̧ɔ̧ ha̧‘m lɛŋ.»
6Ruth zira si fara-gusi-alkamaari, ɓɛɛ a̧ de hee mɔ'ɔ nɛ̀ for-aa baa tɔ̧ so ha̧ a̧ ga. 7Fara nɛ Boaz nyɔŋa mɔ in n'aa nɔɔ mɔ kaɗi, a̧ yaka nɛ̀ desee ha̧ a̧ mɛ nɛ̀ɛ́ ɔ nù sɛn ká̧ tua-alkamaari. Nɛ́ mɔ'ɔ nɛ̀ Ruth ɗɔŋa mɔktɛ, ɓɛɛ zɔk ŋma be fara ɗɔɔ naŋ-a giti sɛnɛ. 8Mɛ ɗuka-zɛ, Boaz misa̧, ɓɛɛ zɔk mɔ ká̧ tɛ. Kà a̧ zɔk wó, ŋma okoo a̧ ɔ nù ɗɔɔ naŋ-a’ɛ. 9Ɓɛɛ a̧ ak mɔ: «Nɛ́ o?» Ɓɛɛ Ruth kifi nú ha̧ a̧: «Nɛ́ mi Ruth, kó-de-tom k’ɛ́nɛ́. Ɛ̀nɛ̀ gú nɛ́ gba-laa k’ɛ́nɛ́ zu'm, wen ɛ́nɛ́ nyɛma mɛ ba'm nɛ̀ kóò!»
10Boaz kifa nú ha̧ a̧: «GASA WAN a̧ tók de yoŋgo zu mɛ, boko-bem kɔ‘m. Sɔŋkur demɔ nɛ̀ mɛ dea’ɛ gana kuti-a, wen bó nɛ́ mɛ́ kia nɛ́ ŋgaiwi mɛ ba na. Kóó wa nɛ́ wanmbɔi, kóó wa nɛ́ wisan, mɛ kii kɔ-mɛ wa na. 11Boko-bem kɔ‘m, ká mɛ́ de kíì na. Mɔ nɛ̀ mɛ kɔ̧ɔ̧ lɛŋ, mi tɛ de ha̧ mɛ, wen o bíí tɛ k’ɛɛ lɛŋ iŋa mboozu kɔ-mɛ. 12Mi nyɛma mɛ gɔn zu mɛ nɛ̀ mbetɛ, ɓɛɛ mɔ kpɔk, ŋma mgbák wi-gɔn-zu nutua ko wíì kɔ-mɛ nɛ̀ gana'm a̧a̧ sɛnɛ.#Ruth 2.20 13Mɛ̀ ɔ́ nù, kà mɔ nɛ́ sa̧a̧, kà a̧ nɛ́ kɔ̧ɔ̧ mɛ gɔn zu mɛ, a̧ gɔna, a̧ kà a̧ nɛ́ kɔ̧ɔ̧ na, nɛ́ mi a̧‘m tɛ gɔn zu mɛ nɛ̀ nin GASA WAN. Mɛ̀ ɔ́ nù hɔ sa̧a̧mɔ.»
14Ruth ɔɔ nù ɗɔɔ naŋ-a hɔ gɔna ndaa-zan, ɓɛɛ Boaz kur mɛ tutuyɛ ŋgimbi nɛ̀ mɔ tɛ sa̧ hɔ̧ɔ̧ na wen ká bíí tɛɛ zɔk a̧, wen a̧ kɔ̧ ha̧ bíí mɛ iŋ‘e, kóò‘i ɔɔ fara-gusi-alkamaari kɔ̧-a̧ na. 15Boaz tɔ̧ɔ̧ ha̧ a̧: «Mɛ̀ tátí goe kɔ-mɛ mbɔɗɔnu, mɛ̀ kásí nú-a nɛ̀ de-a.» Ruth tata goe kɔ‘i mbɔɗɔnu, ɓɛɛ Boaz a kilo alkamaari ɓu-yiitoo sɛnɛ. A̧ baa a̧ e zu, ɓɛɛ Ruth si ɗoŋ saaye. 16Ŋgimbi nɛ̀ Ruth hɔɔ tɛ ko for kaɗi, for-aa aka a̧: «Dee hee ge, bem kɔ‘m?»
Ɓɛɛ Ruth we ɗoŋ mɔ lɛŋ nɛ̀ Boaz dee in a̧‘i ha̧ a̧. 17A̧ tɔ̧a̧: «A̧ ha̧a̧ kilo alkamaari ɓu-yiitoo ha̧‘m wen n'aa tɔ̧a̧, mi beka pii nɛ̀ géé er kpa nɛ̀ for-am na.»
18Naɔmi kifa nú ha̧ a̧: «Bem kɔ‘m, mɛ̀ zɛ́m mɔ nɛ tɛ de, wen mi iŋa Boaz beka ɔm tɛ sɔsɔɔ na, hɔ ŋgimbi n'aa tɛ e zu wen mɔ‘i lɛŋ sɛ.»
Currently Selected:
RUTH 3: GB11DC
Highlight
Share
Copy
Want to have your highlights saved across all your devices? Sign up or sign in
KALATA KO SƆ̧ La Sainte Bible en Langue Gbaya © L’Alliance Biblique du Cameroun, 2011.