RUTH 2
2
Ruth nɛ̀ɛ̀ sar oi alkamaari kpɛɛfɔ ko Boaz
1Ŋma bíí ko wíì ko Naɔmi duka so nɛ́ ŋma gasawi nɛ̀ a̧a̧ nɛ̀ mbɔi. A̧ nɛ́ pɛ́r-nam ko Elimɛlɛk, nin-a nɛ́ Boaz. 2Ruth zɔŋa Mɔab tɔ̧ɔ̧ ha̧ Naɔmi: «Mi kɔ̧ɔ̧ mɛ nɛ̀ɛ́ sar oi alkamaari sɛn kpɛɛfɔ ko ŋma bíí nɛ̀ tɛ zɔk am nɛ̀ ko.» Ɓɛɛ Naɔmi kifi nú ha̧ a̧: «Bem kɔ‘m, mɛ̀ nɛ́ géè.»#Lev 19.9-10; Wee-ɗoŋ-he 24.19
3Ɓɛɛ a̧ nɛ́ɛ̀ ye ŋma kpɛɛfɔ ha̧ a̧ mɛ sar mɔ ɗoŋ o wi-mɔi̧-nyɔnɔ. Sɔnti-a dea, ɓɛɛ a̧ ye nɛ́ kpɛɛfɔ ko Boaz bíí nutua ko Elimɛlɛk.
4Duka, ɓɛɛ Boaz hɔ nɛ̀ Bɛtlɛhɛm; a̧ fana o wi-mɔi̧-nyɔnɔ hee mɔ'ɔ ga: «GASA WAN a̧ dúk in'nɛ̀ɛ́,» ɓɛɛ wa kifi nú ha̧ a̧: «GASA WAN a̧ tók de yoŋgo zu'nɛ́.»
5Boaz aka gasawi ko o wi-mɔi̧-nyɔnɔ kɔ‘i: «Boko-bem’ɛ nɛ́ kóò ko o?»
6Ɓɛɛ gasawi ko o wi-mɔi̧-nyɔnɔ kifi nú ha̧ a̧: «Mɛ̀ nɛ́ zɔŋa Mɔab nɛ̀ pia so nɛ̀ nú Mɔab in Naɔmi. 7A̧ tɛ̀ɛ̀ ak mɔ hɛ̧ɛ̧ mɛ tutuyɛ'ɛ mɛ sar mɔ ɗoŋ o wi-mɔi̧-nyɔnɔ, ɓɛɛ n'aa hɔɔ nɛnɛ‘i, a̧ tɛ duk nù hɔ̧ɔ̧ na.»
8Boaz tɔ̧ɔ̧ ha̧ Ruth: «Boko-bem kɔ‘m, mɛ̀ zìì, ká mɛ́ nɛ́ɛ̀ sar alkamaari sɛn ŋma gɔni kpɛɛfɔ na, ká mɛ́ yak fara’ɛ na. Mɛ̀ dúk kànà in o kó-de-tom kɔ‘m. 9Mɛ̀ zɔ́k fara nɛ̀ wa gɔn alkamaari sɛnɛ, ɓɛɛ mɛ̀ ndák pata wa. Mi tɔ̧ɔ̧ ha̧ o wi-de-tom kɔ‘m ká wa fo mɛ na. Kà wɔ-yì nɛ́ gbɛɛ mɛ, ɓɛɛ mɛ̀ nɛ́ɛ̀ nɔ yì nɛ̀ o kó-de-tom ɗuu a kɔ̧ kpánà.»
10Ruth guu yí nù, ɓɛɛ ak mɔ: «Mi dee hee ge s’ɛnɛ kɔ̧a̧‘m hegɔ nɛ̀ mi nɛ́ gɛnɛ'ɛ ge?»
11Boaz kifa nú ha̧ a̧: «Wa wee ɗoŋ mɔ lɛŋ nɛ̀ mɛ dee in for-mɛ mɛ kóò ŋgimbi nɛ̀ wíì kɔ-mɛ fee nɛnɛ hɔ kinii ha̧‘m. Mɛ ee dáà kɔ-mɛ in nàà kɔ-mɛ in nù kɔ-mɛ nɛ̀ wa kòò mɛ sɛnɛ duk, ha̧ mɛ́ mɛ́ tɛ pii ŋma nù sɛn mgbara ŋma dukbíí nɛ̀ mɛ iŋ nɛti na. 12GASA WAN a̧ dé demɔ in mɛ̀ɛ́ oi demɔ nɛ̀ mɛ dea. GASA WAN Sɔ̧ ko Israɛl nɛ̀ mɛ tɛɛ mɛ́ gu ɗoŋ-aa'i a̧ há̧ mɔɔ-oi demɔ kɔ-mɛ ha̧ mɛ.»
13Ruth kifa nú ha̧ a̧: «Dáà kɔ‘m, ɛ̀nɛ̀ dé ko ha̧‘m. Zu-a nɛ‘m nyɛm ŋmaa in kó-de-tom k’ɛ́nɛ́ kpɔk na'i, ɛ́nɛ́ dee ha̧‘m mɛ kpa nɔɔ-ŋgiɗi, ɛ́nɛ́ tɔ̧ɔ̧ de wen ha̧‘m.»
14Ŋgimbi nyɔŋa mɔ hɔa, ɓɛɛ Boaz tɔ̧ ha̧ Ruth: «Mɛ̀ ɗɔ́ŋ pii ti, mɛ̀ nyɔ́ŋ mɔ#2.14 nyɔŋ mɔ: nyɔŋmɔ kɔ-wa nɛ́ ŋma brɛt nɛ̀ wa duɓi nɛ̀ dɔ̧ɔ̧. in yɛɛ.» Ruth duka nù mgbara o wi-mɔi̧-nyɔnɔ, ɓɛɛ Boaz ha̧ hana gba̧a̧ alkamaari ha̧ a̧. A̧ nyɔŋa mɔ zaŋ-aa sur, ɓɛɛ a̧ ba oi-aa e. 15Nɛ́ mɔ'ɔ n'aa kura mɛ sar alkamaari woyo, ɓɛɛ Boaz tɔ̧ ha̧ o wi-de-tom kɔ‘i: «Boko-bem’ɛ a̧ sár mɔ mgbara o sika-alkamaari mbɛt, ɓɛɛ ká ŋma bíí kii wen in a̧ na. 16Ɛ̀nɛ̀ dé gɔn-ta e nɛ̀ ŋma zu-alkamaari duk ha̧ a̧ mɛ dɔr, ɓɛɛ ká ŋma bíí tɔ̧ wen a zu a̧ na.»
17Ruth sara mɔ kpɛɛfɔ‘i hɔ ga̧a̧mɔ, a̧ gusa zu-alkamaari n'aa sara lɛŋ, ɓɛɛ a̧ kpa nɛ̀ dɔka-a hee kilo ɓu ga. 18A̧ baa sinɛ ɗoŋ saaye, a̧ usa mɔ n'aa sara ha̧ for-aa, ɓɛɛ a̧ ba oi nyɔŋmɔ n’àá nyɔŋa gbonɛ ha̧ a̧. 19For-aa aka a̧: «Mɛ sara mɔ déè sɔsɔɔ ge? Mɛ dee tom déè? GASA WAN a̧ tók de yoŋgo zu wi nɛ̀ dee demɔ in mɛ'ɛ.»
Ɓɛɛ Ruth sa nin wan-fɔ‘i, a̧ tɔ̧a̧: «Nin wi n'am dee tom kpɛɛfɔ kɔ̧-a̧ sɔsɔɔ nɛ́ Boaz.»
20Naɔmi tɔ̧ɔ̧ ha̧ be-for: «GASA WAN nɛ́ wan-de-demɔ in o bíí nɛ̀ ya kpasa in o wan nɛ fea. A̧ a̧ tók de yoŋgo zu Boaz. A̧ nɛ́ ŋma nam ko wíì k’ɛɛ nɛ̀ nyɛma mɛ gɔn zu yɛ.»#Lev 25.25
21Ruth zɔŋa Mɔab tɔ̧a̧: «Boaz tɔ̧ɔ̧ ha̧‘m ndé, a̧‘m dúk kɔ‘m in o kó-de-tom kɔ‘i hɔ wese nɛ̀ mɔi̧a-nyɔnɔ lɛŋ tɛ kaɗi.»
22Naɔmi tɔ̧ɔ̧ ha̧ Ruth: «Bem kɔ‘m, mɛ̀ dúk in o kó-de-tom kɔ̧-a̧ siti. Ká mɛ́ ye ŋma gɔni kpɛɛfɔ na, wen ká ŋma bíí de ɗaŋmɔ in mɛɛ.» 23Nɛ́ hegɔ sa Ruth duk in o kó-de-tom ko Boaz sar nɛ̀ oi alkamaari hɔ ŋgimbi nɛ̀ mɔi̧a-nyɔnɔ lɛŋ kaɗa, ɓɛɛ a̧ ɔ ɔa-a tɛ ko for-aa.
Currently Selected:
RUTH 2: GB11DC
Highlight
Share
Copy
Want to have your highlights saved across all your devices? Sign up or sign in
KALATA KO SƆ̧ La Sainte Bible en Langue Gbaya © L’Alliance Biblique du Cameroun, 2011.