RUTH 4
4
Boaz baa Ruth nɛ̀ kóò
1Boaz yaka si fara-ɓa-wen, ɓɛɛ duk nù hi̧i̧. Kà a̧ zɔk wó, wi-gɔn-zu-wi n'aa baa tɔ̧ so nɛnɛ‘i a̧ ɓir’ɛ, ɓɛɛ a̧ tɔ̧ ha̧ a̧: «Nyaa, ɛ̀nɛ̀ tɛ́, ɛ̀nɛ̀ dúk nù hɛ̧ɛ̧ sɛ.» Ɓɛɛ a̧ tɛ́ɛ̀ duk nù. 2Boaz hoka o bíí ɓu mgbara o gasawi saaye'i, ɓɛɛ a̧ tɔ̧ ha̧ wa: «Ɛ̀nɛ̀ yá nù hɛ̧ɛ̧!» Ɓɛɛ wa ya nù. 3A̧ tɔ̧ɔ̧ ha̧ zɔmwi kɔ̧-a̧ nɛ̀ nyɛma mɛ ba Ruth'i ndé: «Naɔmi nɛ̀ pia so nɛ̀ nú Mɔab kɔ̧ɔ̧ mɛ ɗɔr nù ko gasawi k’ɛɛ Elimɛlɛk. 4Nɛ́ mɔ‘i sa'm mbaŋ tɛ‘nɛ́, k’ɛ̀nɛ̀ nɛ́ kɔ̧ɔ̧ mɛ gɔn zu a̧, ɓɛɛ ɛ́nɛ́ ha̧a̧ nú ti o bíí saaye in o gasawi kɔ‘m nɛ̀ a̧a̧ sɛn hɛ̧ɛ̧ ŋgaɓo. Ɛ́nɛ́ nɛ́ kɔ̧ɔ̧ mɛ gɔn zu a̧, ɓɛɛ ɛ́nɛ́ gɔna. K’ɛ̀nɛ̀ nɛ́ kɔ̧ɔ̧ na, ɓɛɛ ɛ́nɛ́ tɔ̧ɔ̧ ha̧‘m, wen ŋma bíí nɛ̀ tɛ gɔn zu fɔ'ɛ yak zu'nɛ́ bo na, kànà nɛ́ ɛɛ yiitoo, ɓɛɛ ɛ́nɛ́ nɛ́ gasawi.» Ɓɛɛ zɔmwi kɔ̧-a̧ kifi nú: «Mi tɛ gɔn zu a̧.»
5Ɓɛɛ Boaz tɔ̧ siti: «Wese n’ɛnɛ tɛ gɔn nɛ̀ zu nù‘i er Naɔmi, mɛ̀ nɛ́ wese'i ɛ̀nɛ̀ tɛ ba nɛ̀ Ruth, zɔŋa Mɔab kóò ko zɔmwi k’ɛɛ nɛ̀ fea, wen ha̧ nin-a mɛ ɓɔn zu mɔɔ-oi-aa ɓɔnsɛnɛ.»
6Zɔmwi ko Boaz kifa nú: «Nɛ́ bòò hegɔ, mi beka gɔn kɔ‘m zu fɔ‘i ɓɔna, wen ká mɔɔ-oi-am yambali. Mɛ̀ gɔ́n zu-a oi nú‘m, mi kɔ̧ kɔ‘m ɓɔna.»
7A̧ kpɔ̧i̧a̧ ndárà naŋ-a yinɛ hee kanamɔ ga, wen ŋgimbi'i sɛn Israɛl, kà‘i gɔn zu mɔ, kóó kà‘i dé gɛnɛ, wi kpɔ̧i̧ nɛ́ ndárà naŋ-wi yinɛ ba ha̧ ɓii bíí kaɗi, sɛka o wi-sedaako iŋa'e, wi tɔ̧ nɛ́ kpasawen.#Wee-ɗoŋ-he 25.9
8A̧ tɔ̧ɔ̧ ha̧ Boaz: «Kànà nɛ́ mɛ'ɛ tɛ gɔn zu mɔ‘i ɛ̧!» Ɓɛɛ a̧ kpɔ̧i̧ ndárà naŋ-a. 9Boaz tɔ̧ɔ̧ ha̧ o gasawi in o bíí lɛŋ: «Ɛ́nɛ́ lɛŋ nɛ́ o wi-sedaako. Ku̧u̧naŋ-a nɛ́ sɔsɔɔ, mɔ ko Elimɛlɛk, mɔ ko Kiliɔŋ in mɔ ko Malɔŋ nɛ̀ a̧a̧ er Naɔmi lɛŋ nɛ́ kɔ‘m. 10Mi baa Ruth zɔŋa Mɔab, kóò ko Malɔŋ nɛ̀ kóò, wen ha̧ nin wan-fio mɛ ɓɔn zu mɔɔ-oi-aa siti, wen ká nin-a tɛɛ bi mgbara o nya-a̧ in mgbara o bíí saaye kɔ̧-a̧. Ɛ́nɛ́ nɛ́ o wi-sedaako mɔ‘i sɔsɔɔ.»#Wee-ɗoŋ-he 25.5-6
11Ɓɛɛ o bíí nɛ̀ yaa fara-ɓa-wen lɛŋ in o gasawi kɔ̧ ɗɔaa: «Ɛɛ nɛ́ o wi-sedaako-a.» Ɓɛɛ o gasawi tɔ̧ ha̧ Boaz: «GASA WAN a̧ dé ha̧ kóò nɛ̀ tɛ ye tua kɔ-mɛ mɛ hɔ ŋmaa in Rachɛl ká bá nɛ̀ Lea nɛ̀ kòò o be Israɛl lɛŋ. Mɛ̀ úsí ŋgai kɔ-mɛ sɛn Efrata, nin mɛ'ɛ húr sɛn Bɛtlɛhɛm.#Ku̧u̧ 29.31 12Bezaŋ nɛ̀ GASA WAN tɛ ha̧ ha̧ mɛ tɛ kóò'ɛ a̧ dúk hee o bíí ko Pɛrɛs#4.12 Pɛrɛs: nɛ́ ŋma zɔmdáa ko Boaz.#Ku̧u̧ 38.27-30 nɛ̀ Tamar kòò so ha̧ Juda ga.»
Boaz baa Ruth nɛ̀ kóò; kóó Obɛd
13Boaz duka in Ruth, ɓɛɛ GASA WAN de ha̧ a̧ mɛ ba zaŋ ko nɛ̀ be-wiwii. 14O okoo tɔ̧ɔ̧ ha̧ Naɔmi: «Zɔnamɔ a̧ dúk nɛ́ ko GASA WAN. Sɔsɔɔ a̧ dee ha̧ wa mɛ ko wi nɛ tɛ zɔk mɛ nɛ̀ de-a, nin-a a̧ hur sɛn Israɛl. 15Bem’ɛi tɛ ha̧ desee ha̧ mɛ, mɛ̀ nɛ́ a̧ a̧ tɛ zɔk mɛ ŋgimbi nɛ̀ mɛ tɛ sɔk, wen mɛ̀ nɛ́ be-for-mɛ Ruth nɛ̀ kɔ̧ɔ̧ mɛ nyɛmna a̧ dee demɔ in mɛɛ gan mɔ nɛ̀ be-wiwii mɔɔrɔ-ɗoŋ-yiitoo tɛ̀ɛ́ nyɛm so mɛ de, mɛ̀ nɛ́ a̧ a̧ koo bem’ɛ!» 16Naɔmi baa bem’ɛi, ɓɛɛ a̧ dai a̧.
17Ɓɛɛ o ko-nutua ko Naɔmi tɔ̧: «Wa koo bem ha̧ Naɔmi!» Hegɔ wa aa nin-a nɛ́ Obɛd. A̧ nɛ́ dáà ko Jɛse, ɓɛɛ Jɛse nɛ́ dáà ko David.
18Pɛ́r-nam ko Pɛrɛs nɛ́ mɔ'ɔ: Pɛrɛs koo Ɛsrɔŋ, 19Ɛsrɔŋ koo Ram, ɓɛɛ Ram ko Aminadab; 20Aminadab koo Nasɔŋ, ɓɛɛ Nasɔŋ ko Salma; 21Salma koo Boaz, ɓɛɛ Boaz ko Obɛd; 22Obɛd koo Jɛse, ɓɛɛ Jɛse ko David.
Currently Selected:
RUTH 4: GB11DC
Highlight
Share
Copy
Want to have your highlights saved across all your devices? Sign up or sign in
KALATA KO SƆ̧ La Sainte Bible en Langue Gbaya © L’Alliance Biblique du Cameroun, 2011.