OSEE 13
13
Nyimsea ko Sɔ̧ zu Israɛl
1Ŋgimbi nɛ Efraim tɔ̧ so wen,
kíì dee o bíí lɛŋ sɛn Israɛl.
Nɛ mɔ'ɔ n'aa dee ɗaŋmɔ ndak nɛ ɗoŋ o géé-sɔ̧ Bal,
ɓɛɛ mɔ‘i gbɛ a̧.
2Kinii’ɛ, wa de nɛ ɗaŋmɔ siti;
wa duia gee mɔ pi̧ nù mɛ gasi,
kai nɛ bu-mbɔi kɔ-wa ɓo nɛ géé-sɔ̧ mbɛt,
nɛ duk nɛ mɔ nɛ wi-iŋ-tom dea.
Ɓɛɛ nɛ́ zu o wi nɔ‘i a̧ o bíí tɔ̧ nɛnɛ‘e,
wa ɗafi nɛ o be ndai nɛ wa ɓoa'i dui nɛ nú-wa!
3Wen zu mɔ‘i, wa tɛ ya hee kutu mɛ gɔna mɔ ga,
wa tɛ duk hee mbɛŋ nɛ duk ɓan na, ɓɛɛ aia’ɛ ga,
wa tɛ ya hee pumyulu-alkamaari
nɛ búk kai pɛsi a taŋ'ɛ ga,
kóó hee zi-wee nɛ tur nɛ woi-tua fati̧i̧ gbonɛ'ɛ ga.
4Mi nɛ GASA WAN Sɔ̧ kɔ-mɛ nɛ nú Egiptɛ mɛ tɛnɛ;
ŋma sɔ̧ nɛ mɛ iŋa gan am bo na;
ŋma wan-kpasi mɛ yak zu'm bo na mbɛt.
5Mi iŋa mɛ́#13.5a Mi iŋa mɛ́: o ŋma texte tɔ̧a: mi daia mɛ́. nɛ ŋga-gbárà mɛ tɛnɛ,
fara nɛ gbɛ̧ŋmɔ a̧a̧ sɛnɛ.#Wee-ɗoŋ-he 8.11-17
6Ɓɛɛ ŋgimbi n’ɛnɛ hɔɔ kpa de fara-nyɔŋ-mɔ kaɗi,
ɛnɛ nyɔŋa mɔ zaŋ‘nɛ́ sur;
ɗoŋ nɛ zaŋ‘nɛ́ sura kaɗi,
ɛnɛ dee ŋgazu, ɓɛɛ tɛ‘nɛ́ bi ɗoŋ-am!
7Hegɔ, mi tɛ kpɔr in'nɛ̀ɛ́ hee dila ga;
mi tɛ mgbuti ká̧ war hee gɔ̧ ga mɛ ba'nɛ́.
8Mi tɛ tik mgbara'nɛ́ hee ŋma nàá-koe-nam#13.8 naa-koe-nam: texte tɔ̧ɔ̧ nɛ́ ours.
nɛ‘i kai o bem kɔ̧-a̧ yaknɛ ga.
Mi tɛ ŋguɗi see'nɛ́ ŋman yinɛ;
mi tɛ nyɔŋ kpoo-tɛ‘nɛ ɓɔn kpɔk bɛɗɛ hee nana dila ga,
ɓɛɛ o boko-nam tɛ a̧k'nɛ́ a nù pɛ́sɛ́-pɛ́sɛ́.
9 Israɛl, ɛnɛ yaia kaɗi!
Nɛ́ mi kpɔk a̧ nyɛma mɛ kpasi'nɛ́ ɓɛɛ.
10Wannu k’ɛ́nɛ́ a̧ tɛ́ɛ̀ kpasi'nɛ́ sɛn saaye k’ɛ́nɛ́ gɔ!
Wannu in o gasawi n’ɛnɛ ak so mɔ‘e
a'i ha̧ h’ɛ́nɛ́ wo’ɛ a̧a̧ bɔɔ de?#1 Sam 8.5-6
11Nɛ́ tɛ ɗaŋsee a̧‘m ha̧a̧ nɛ wannu h’ɛ́nɛ́,
ɓɛɛ nɛ́ tɛ nyimsea a̧‘m ba nɛ a̧ yinɛ mbɛt.#1 Sam 10.17-24; 15.26
12Mi tɔra ɗaŋmɔ ko Efraim nɛ dama-a,
ɓɛɛ mi ba e.
13Nyimmɔ tɛ kpa kana a̧ hee nyima-zaŋ-ko-bem ga,
ɓɛɛ bem n'aa de mɛ kɔ‘i nɛ ɗaŋ mgbélé obem;
ŋgimbi hɔ̧fa̧-a̧ tik nù hɔɔ kaɗi,
ɓɛɛ a̧ kɔ̧ gboa-a kɔ̧ zaŋ nàà kɔ̧-a̧ na.
14Ɓɛɛ kɔ‘m, a̧‘m gɔn zu wa
ká wa ye fara ko o fio nde?
A̧‘m kpasi wa tɛ fio nde?
Fio, o zɛɛ-geŋa kɔ-mɛ a̧a̧ de?
Ye ko o fio, ŋga mɔɔ-gbɛ-bíí kɔ-mɛ a̧a̧ dee?
Ko bo yí‘m sitɛ wa ɓɔna!#1 Kɔr 15.55
15Efraim duk nɛ de-a mgbara o nya-a̧, ɓɛɛ gbak a̧ na,
wen mi tɛ tom búk nɛ war yiwese pii zu a̧.
Mi GASA WAN, mi tɛ de
ha̧ búk kɔ‘m mɛ yu nɛ war ŋga-gbárà,
ɓɛɛ yì tɛ ɔ̧sa̧ kor tá̧í̧-tá̧í,
hegɔ wa tɛ tɛ̀ɛ́ kai demɔ lɛŋ yaknɛ.
Currently Selected:
OSEE 13: GB11DC
Highlight
Share
Copy
Want to have your highlights saved across all your devices? Sign up or sign in
KALATA KO SƆ̧ La Sainte Bible en Langue Gbaya © L’Alliance Biblique du Cameroun, 2011.