2 TIMOTEE 3
3
O sɔŋkur ŋgimbi
1Mɛ̀ íŋ mɔ'ɔ nɛ̀ de-a: mɔ tɛ́ duk nɛ̀ ŋgaya-a nyɛmna tɛ̀ o sɔŋkur ŋgimbi. 2O bíí tɛ́ kɔ̧ nɛ́ war mɔ kɔ‘i mɛ́ tɛ-wi, wa tɛ́ kɔ̧ mbɔi gan, wa tɛ́ ya nɛ́ o wi-ndikiri-wen, o wi-ŋmaŋ-tɛ, o wi-tɔ̧-ɗaŋ-wen, o wi-de-ŋgazu in dáà in nàà kɔ‘i, o wi nɛ̀ iŋ dee osoko na, in o wi-tu̧-tɛ-mɔ ko Sɔ̧ na, 3o wi-ŋga-see nɛ̀ bó nɛ̀ ko na, o wi-kai-ndaa-wi, o wi-saka-yi, o wi-de-ŋgamɔ, o wi-sɛn-demɔ, 4o wi-e-ɗɔra tɛ-wi, o wi-gɔ-tɛ, o wi nɛ̀ gasa-zu ba nɛ̀ ŋgai kɔ-wa; dee wɔ-mɔ tɛ́ duk nɛ́ sɛm kɔ-wa gan Sɔ̧. 5Wa tɛ́ usi tɛ-wa nɛ̀ zan hee o wi-yu Sɔ̧ ga; mɔ‘i hegɔ, wa bɛ̧ɛ̧ ŋgayamɔ nɛ̀ a̧a̧ tɛ̀ yuu Sɔ̧ kaɗi. Ká mɛ́ gbam in o pɛrti wi nɔ‘i na. 6O ŋma bíí mgbara o wi nɔ‘i nɛ́ o wi nɛ̀ ndɛn nɛ̀ kɔ̧ tua nɛnɛ, ɔr nɛ̀ o ziɓa okoo nɛ̀ ɗaŋmɔ gana zu wa, nɛ̀ ndak nɛ́ ɗoŋ o wɔ-mɔ nɛtɛ nɛtɛ, 7duk nɛnɛ tɛ́ yamba mɔ ɓɔnsɛnɛ, ɓɛɛ wa nyɛm mɛ́ iŋ kpasawen na. 8Hee mɔ'ɔ nɛ̀ Janɛs in Jambrɛs baa so zu dúk nɛ̀ Moisɛ ga, mɛ̀ nɛ́ hegɔ a̧ o wi nɔ‘i ba nɛ̀ zu dúk nɛ̀ kpasawen mbɛt. Wa nɛ́ o bíí nɛ̀ taamɔ kɔ-wa de na, nɛ̀ kɔ̧ɔ̧ɗɔɔwen kɔ-wa bó nɛ́ kpasamɔ na mbɛt.#Gboa-a 7.11 9Wa beka nɛ́ hɔ ti na, wen o mgbele taamɔ kɔ-wa'i tɛ́ gbo zan yí bíí lɛŋ, hee mɔ ko Janɛs in Jambrɛs ga.
10Ɓɛɛ kɔ-mɛ, mɛ́ ndaka nɛ́ ɗoŋ usamɔ kɔ‘m nɛ̀ de-a, in deemɔ kɔ‘m, mɔ n'am ta mɛ́ de, kɔ̧ɔ̧ɗɔɔwen kɔ‘m, munyal, kɔ̧ɔ̧mɔ in nyɔŋa-nin kɔ‘m, 11ká bá nɛ̀ ŋgamɔ in o bɔnɛ nɛ̀ kpaa'm sɛn Antiok, Ikonium in Listrɛ. Bɔnɛ n'am zɔka bó nɛ́ mɔɔ-tɔ̧ na, ɓɛɛ Gasa Wan kpasa'm tɛ mɔ'ɔ nɔ‘i lɛŋ.#Tom 13.14-52; 14.1-20 12Wen bíí lɛŋ nɛ̀ kɔ̧ɔ̧ mɛ́ yu Sɔ̧ tɛ Jesu Krist tɛ́ zɔk kànà bɔnɛ. 13Ɓɛɛ ko o ɗaŋwi in o wi-ɔr-wi, wa tɛ́ de kànà ɗaŋmɔ siti, ɔr nɛ̀ o bíí in tɛ-wa mbɛt. 14Ɓɛɛ nɛ̀ war kɔ-mɛ, mɛ̀ yór nɛ̀ nɔa-a tɛ́ mɔ nɛ̀ mɛ́ yamba, nɛ̀ mɛ́ kpɛka'e nɛ́ kpasawen; mɛ́ iŋa wi nɛ̀ mɛ́ yamba mɔ tɛ-a mbɛt. 15Mɛ́ iŋa sa̧a̧ Yɔramɔ nɛ̀ bem mɛ̀ tɛnɛ; ɓɛɛ nɛ́ sa̧a̧ Yɔramɔ‘i a̧ nyɛma mɛ́ ha̧ iŋa-mgbara-mɔ nɛ̀ tɛ́ mgbɔ mɛ́ tɛ yuwar-kpasa-a nɛ̀ ɗoŋ kɔ̧ɔ̧ɗɔɔwen kɔ-mɛ nɛ̀ a̧a̧ tɛ Jesu Krist. 16Yɔramɔ lɛŋ tɛ̀ɛ́ nɛ̀ tɛ́ Sɔ̧, ɓɛɛ ɔ dee wen usa-a ha̧ bíí, wen tɔ̧ɔ̧ mbɔrɔ gai nɛ̀ bíí tɛ yɔɔ-kaya, gbak nɛ̀ bíí mɛ́ de mɔ nɛ̀ yuwar-a, 17wen ha̧ bíí ko Sɔ̧ mɛ́ nyɛm sɛnɛ, dúk nɛ̀nɛ́ nɛ̀ mɔ n'aa tɛ́ de nɛ̀ de tom lɛŋ.
Currently Selected:
2 TIMOTEE 3: GB11DC
Highlight
Share
Copy
Want to have your highlights saved across all your devices? Sign up or sign in
KALATA KO SƆ̧ La Sainte Bible en Langue Gbaya © L’Alliance Biblique du Cameroun, 2011.