2 TIMOTEE 4
4
Mɛ̀ tɔ̧́ wen ko Sɔ̧
1Mi ee mɛ́ in Sɔ̧ in Jesu Krist nɛ̀ tɛ́ tɛ̀ mɛ́ gɔn kita zu o bíí nɛ̀ ya kpasa in nɛ̀ fea, in nɛ̀ nin pia-ɗoŋ in ɔɔ-wan kɔ̧-a̧: 2mɛ̀ tɔ̧́ wen ko Sɔ̧ tɛ̀ de ŋgimbi kóó tɛ̀ ɗaŋ ŋgimbi mbɛt, mɛ̀ kímíí o bíí, gai nɛ̀ wa, ha̧ nɛ̀ nɔɔ-ŋgiɗi ha̧ wa, usi nɛ̀ mɔ nɛ̀ munyal ɓɔnsɛnɛ. 3Ŋgimbi tɛ́ hɔ nɛ̀ o ŋma bíí beka kɔ̧ zia kpasa usamɔ ɓɔna, wa tɛ́ ndak nɛ́ ɗoŋ o wɔ-mɔ kɔ-wa; hegɔ wa tɛ́ hok o gíí wi-usi-mɔ nɛ̀ tɛ́ usi nɛ́ mɔ nɛ̀ wa kɔ̧ɔ̧ mɛ́ zii. 4Wa tɛ́ kpe zer-wa tɛ kpasawen zik nɛ̀ tɛ-wa mɛ́ zii nɛ́ o géé to. 5Ɓɛɛ kɔ-mɛ, mɛ̀ kásí zu-mɛ tɛ mɔ lɛŋ, mɛ̀ nɔ́ ŋgiɗi tɛ bɔnɛ, ɓɛɛ mɛ̀ dé nɛ́ tom tɔ̧ɔ̧ De Mbe Wen, e nɛ̀ see-mɛ tɛ tom nɛ̀ Sɔ̧ ha̧a̧ ha̧ mɛ́.
Ŋgimbi yaka-a kɔ‘m hɔɔ kaɗi
6Kinii, mi nɛ́ zɛzɛ nɛ̀‘i tɛ́ a, wen ŋgimbi yaka-a kɔ‘m hɔɔ kaɗi. 7Mi bìí kpasa biro, mi maa yì hɔ nduti-a, mi kasa kɔ̧ɔ̧ɗɔɔwen. 8Mɔ nɛ̀ pɛm am kinii nɛ́ laasɔ̧i̧-wan oi deemɔ nɛ̀ yuwar-a nɛ̀ Gasa Wan, wi-gɔn-kita nɛ̀ yuwar-a, tɛ́ ha̧ ha̧‘m Wese'i; bó nɛ́ ha̧‘m ɛ̀n'am ɓɛɛ na, ɓɛɛ ha̧ o bíí lɛŋ nɛ̀ pɛm pia-ɗoŋ kɔ̧-a̧ nɛ̀ desee.
Sɔŋkur wen
9Mɛ̀ kíí yuwar mɛ́ tɛ̀ɛ́ zɔk am nɛ̀ haya-a, 10wen Demas ea'm duk, wen n'aa kɔ̧ɔ̧ mɔɔ-zaŋnu wan mɛ́ kinii. A̧ yaka si Tesalonik, Kresaŋ yaka si Galatii, ɓɛɛ Titɛ yak kɔ‘i si Dalmatii mɛ̀.#Kol 4.14; Film 24; 2 Kɔr 8.23; Gal 2.3; Tite 1.4 11Nɛ́ Luk kpɔk a̧ duk in am ɓɛɛ. Mɛ̀ mgbɔ́ Mark tɛnɛ in mɛ̀ɛ́ wen a̧ nɛ́ mgbák wi-gbak-am tɛ́ tom.#Kol 4.14; Film 24; Tom 12.12,25; 13.13; 15.37-39; Kol 4.10 12Mi toma Tikik si Efɛz mɛ̀.#Tom 20.4; Ef 6.21-22; Kol 4.7-8 13Ŋgimbi nɛ̀ mɛ́ be tɛ̀ɛ́ tɛ̀, mɛ̀ bá gba-laa kɔ‘m n'am ee tɛ ko Karpas sɛn Troas tɛnɛ ha̧‘m in o kalata kɔ‘m mbɛt, gana gan o kalata-ndàrá.#Tom 20.6
14Alɛkzandrɛ, wi-dui-ndɛrɛ dee ɗaŋmɔ in am nyɛmna, ɓɛɛ Gasa Wan tɛ́ kifi er ha̧ a̧ nyɛm nɛ̀ ɗoŋ tom kɔ̧-a̧.#1 Tim 1.20; Gima 62.13; Rɔm 2.6 15Mɛ́ mbɛt, mɛ̀ zɔ́k tɛ-mɛ nɛ̀ a̧, wen a̧ sɛna so wen k’ɛ́ɛ́ nyɛmna.
16Tɛ́ kuti ɓaa wen kɔ‘m, ŋma bíí mɛ́ yor katɛ‘m bo na; wa pɛsa lɛŋ e'm ɛ̀n'am, ɓɛɛ ká Sɔ̧ é mɔ‘i zu wa na. 17Nɛ́ Gasa Wan a̧ yora katɛ‘m, ha̧ nɛ̀ ŋgai ha̧‘m, wen ha̧‘m mɛ́ tɔ̧ wen ko Sɔ̧ nɛ̀ oi-aa lɛŋ ha̧ o gɔni-dùk mɛ́ zii dam ŋmaa. Gasa Wan kpasa'm kɔ̧ nú dila. 18Gasa Wan tɛ́ gbo'm yinɛ tɛ́ ɗaŋmɔ lɛŋ, a̧ tɛ́ kpas'am ha̧‘m mɛ́ ye tɛ́ Wan kɔ̧-a̧ yiwese mɛ̀. Gasamɔ a̧ dúk nɛ́ kɔ̧-a̧ kpoo nɛ kpoo! Aamɛn.
Sɔŋkur fanamɔ
19Mɛ̀ fán Priska, Akilas in o bíí kɔ̧ tua ko Onesifɔr.#Tom 18.2; 2 Tim 1.16-17 20Ɛrast ɓɔna Kɔrint mɛ̀. Mi ee Trofim nɛ̀ zɛ́ɛ́ ɓɔn Milɛt.#Tom 19.22; Rɔm 16.23; Tom 20.4; 21.29 21Mɛ̀ kíí yuwar mɛ́ hɔ hɛ̧ɛ̧ sɛka ɓar dea.
Eubul, Pudɛns, Lin in Klodia fana mɛ́ ká bá nɛ̀ o nya-ɛɛ lɛŋ.
22Gasa Wan a̧ dúk in mɛ̀ɛ́.
Deemɔ nɛ̀ ta-tɛ ko Sɔ̧ a̧ dúk in'nɛ̀ɛ́ lɛŋ.
Currently Selected:
2 TIMOTEE 4: GB11DC
Highlight
Share
Copy
Want to have your highlights saved across all your devices? Sign up or sign in
KALATA KO SƆ̧ La Sainte Bible en Langue Gbaya © L’Alliance Biblique du Cameroun, 2011.