2 TIMOTEE 2
2
Kpasa wi-biro ko Jesu Krist
1Bem kɔ‘m, mɛ̀ ŋgáí tɛ-mɛ tɛ deemɔ nɛ̀ ta-tɛ nɛ̀ a̧a̧ tɛ Jesu Krist. 2Mɛ́ yamba mɔ er-am ti o gíí wi-sedaako; mɛ̀ úsí mɔ‘i ha̧ o mgbák bíí nɛ̀ nyɛma usa-a siti ha̧ o ŋma bíí mbɛt.
3Mɛ̀ kpɛ́k war bɔnɛ kɔ-mɛ hee kpasa wi-biro ko Jesu Krist ga. 4Bíí nɛ̀ a̧a̧ tɛ tom-sooza beka ye zaŋ deemɔ ko o géé bíí na, kà a̧ nɛ́ kɔ̧ɔ̧ mɛ́ de mɔ nyɛm see wi nɛ̀ baa a̧‘i. 5Kale-a mbɛt, nɛ́ wi nɛ̀ a yaa-gan-ŋmaa nɛ̀ yuwar-a a̧ kpa mɔɔ-oi-aa. 6Nɛ́ wi-wa-fɔ nɛ̀ zɔk bɔnɛ-fɔ a̧ tɛ́ kpa nyɔnɔ-a nɛti. 7Mɛ̀ tá mɔ zu mɔ n'am tɔ̧ ha̧ mɛ‘i, ɓɛɛ nɛ́ Gasa Wan a̧ tɛ́ usi mgbara mɔ‘i lɛŋ ha̧ mɛ́.
8Tɛ-mɛ a̧ mbáŋ ɗoŋ Jesu Krist, nɛ̀ kura ŋgɔn tɛ́ fio, nɛ̀ duk nɛ́ bezaŋ David nyɛm nɛ̀ ɗoŋ De Mbe Wen n'am usi'i. 9Ndaa bɔnɛ n'am zɔk hɛ̧ɛ̧ hɔ nɛnɛ tɛ̀ hɛra'm nɛ̀ nyak-zɔɓɔ hee wi-de-ɗaŋmɔ ga'i nɛ́ mɔ‘i. Ɓɛɛ bó nɛ́ wen ko Sɔ̧ a'i hɛra na. 10Nɛ́ mɔ‘i s'am nyɔŋ nin-am tɛ́ mɔ lɛŋ wen zu o bíí nɛ̀ Sɔ̧ hoka ha̧ wa mbɛt mɛ́ kpa duka-kpasa nɛ̀ a̧a̧ tɛ Jesu Krist in gasamɔ nɛ̀ tɛ́ duk kpoo nɛ kpoo. 11Wen’ɛ nyɛma ha'i mɛ́ e nɛ̀ ta:
«K’ɛ̀ɛ̀ nɛ́ fee in a̧,
ɛ́ɛ́ tɛ́ duk kpasa in a̧ mbɛt;
12k’ɛ̀ɛ̀ nɛ́ zɔka bɔnɛ in a̧,
ɛ́ɛ́ tɛ́ ɔ wan in a̧;
k’ɛ̀ɛ̀ káf'a, a̧ tɛ́ kafi ɛ́ɛ́ mbɛt;#Mt 10.33; Lk 12.9
13ɓɛɛ k’ɛ̀ɛ̀ yór ɗoŋ ha̧a̧nú k’ɛ́ɛ́ ha̧ a̧ na,
a̧ beka e ha̧a̧nú kɔ̧-a̧ dúk na,
wen a̧ nyɛm mɛ́ kafi tɛ-a nɛ̀ tɛ-a na.»
Mgbák wi-de-tom
14Mɛ̀ mbáŋ tɛ̀ o bíí tɛ mɔ‘i lɛŋ tɔ̧ nɛnɛ ha̧ wa nɛ̀ sa̧a̧-a̧ ti Sɔ̧‘e, ká wa yé zaŋ sii-kafɛ tɛ wen nɛtɛ nɛtɛ na, wen o mɔɔ nɔ‘i gbak bíí na, ɓɛɛ de dee ha̧ o wi-zia-a mɛ́ yɔ. 15Mɛ̀ kíí mɛ́ duk yí Sɔ̧ hee bíí nɛ̀ nyɛma sɛnɛ ga; mɛ̀ dúk nɛ́ wi-de-tom nɛ̀ de foe-tom kɔ‘i na, nɛ̀ usi nɛ́ wen nɛ̀ duk nɛ́ kpasawen nɛ̀ de-a. 16Ká mɛ yé tɛ bura o ɗaŋ wen na, wen mɔ‘i de ha̧ o wi-tɔ̧a̧-a̧ mɛ a̧r tɛ́ mɔ ko Sɔ̧ siti. 17Wen ko wi nɔ‘i duk hee gba-da̧i̧ nɛ̀ mira nyɔŋ nɛnɛ siti ga. O pɛrti wi nɔ‘i nɛ́ Himenee in Filetos. 18Wa a̧ra̧ e kpasawen duk tɛ ta-a'e, kura-ŋgɔn tɛ fio dee kaɗi; hegɔ wa ɗaŋa kɔ̧ɔ̧ɗɔɔwen ko bíí nɛ̀ dɔka-a.
19Kóó hegɔ mbɛt, naŋ-tua nɛ̀ Sɔ̧ ea nɛ̀ ŋgaya-a a̧ duk'i, ɓɛɛ tumbal-wen-aa nɛ́ mɔ'ɔ: «Gasa Wan iŋa o bíí kɔ‘i,» in mbɛt: «Kóó o ndé nɛ̀ sa nin Gasa Wan à̧ é ɗaŋmɔ dúk.»#Tɔra-bíí 16.5
20Bó nɛ́ o nyɛk-lɔr in o nyɛk-bu-mbɔi ɓɛɛ a̧ duk kɔ̧ gasa tua na, o nyɛk-te in o wan mɛ́ gìì a̧a̧ sɛnɛ mbɛt; o ŋma nɛ́ wen dee tu̧u̧-tɛ-tom, ɓɛɛ o ŋma nɛ́ wen géé tom lɛŋ. 21Wi nɛ̀ ɗafi war-tɛ wen o ndiŋmɔ nɔ‘i tɛ́ duk nɛ́ tu̧u̧-tɛ-nyɛk: war nyɛk'i ɔ sa̧a̧-a̧, tɛ́ gbak Wan-aa, ɓɛɛ duka wen dee tom lɛŋ.
Wi-de-tom ko Gasa Wan
22Ká mɛ de wɔ-mɔ ko o ŋgaiwi na, mɛ̀ kíí nɛ́ deemɔ nɛ̀ yuwar-a, kɔ̧ɔ̧ɗɔɔwen, kɔ̧ɔ̧mɔ in duka-a tɛ ga̧a̧mɔ in o wi-sa̧a̧-see nɛ̀ sa nin Gasa Wan. 23Mɛ̀ é mgbélé sárá ndaa-wen nɛ̀ gba̧a̧-a̧ bo na dúk, wen mɔ‘i dak nɛ́ kpɛri pi̧ nù mgbara o bíí sɔɔ géè. 24Wi-de-tom ko Gasa Wan beka kpɛr na; a̧ tɛ́ duk nɛ̀ de-a in o bíí lɛŋ, a̧ tɛ́ duk nɛ́ bíí nɛ̀ nyɛma mɛ́ usi mɔ, nɛ̀ de nyimsea nɛ̀ haya-a na. 25A̧ tɛ́ usi mɔ nɛ̀ munyal ha̧ o wi-si-kafɛ; ŋmafara Sɔ̧ tɛ́ de ha̧ wa mɛ́ kpai duka-a kɔ-wa mɛ́ iŋ kpasawen, 26ɓɛɛ zu-wa tɛ pii ɗoŋ; hegɔ, wa tɛ́ gbo tɛ́ yɔk ko wan-ɗaŋmɔ nɛ̀ baa so wa nɛ̀ bara mɛ́ de mɔ n'aa kɔ̧a̧.
Currently Selected:
2 TIMOTEE 2: GB11DC
Highlight
Share
Copy
Want to have your highlights saved across all your devices? Sign up or sign in
KALATA KO SƆ̧ La Sainte Bible en Langue Gbaya © L’Alliance Biblique du Cameroun, 2011.