1 TIMOTEE 5
5
Yuwar tɔ̧ɔ̧-mbɔrɔ ha̧ o bíí ko Sɔ̧
1Ká mɛ́ gai sɔkawi nɛ̀ ŋgai na, ɓɛɛ mɛ̀ tɔ̧́ mbɔrɔ ha̧ a̧ hee a̧ nɛ́ dáà kɔ-mɛ ga. Mɛ̀ zɔ́k o daŋa ŋgaiwi hee o nya-mɛ ga; 2mɛ̀ zɔ́k o gasa okoo hee o nàà kɔ-mɛ ga, ɓɛɛ mɛ̀ zɔ́k o boko-bem hee o boko-nya-mɛ ga, tɛ duka-a nɛ̀ sa̧a̧-a̧.
3Mɛ̀ tú̧ tɛ o ko-gera nɛ̀ duk nɛ́ ko-gera nɛ̀ mbetɛ. 4Kà ŋma ko-gera nɛ́ bòó nɛ̀ bem in o be-koo, nɛ̀ o bem nɔ‘i a̧ yámbí yuu Sɔ̧ tɛ deemɔ nɛ̀ de-a in o mgbák bíí kɔ̧ tua kɔ-wa, kifi nɛ̀ er dee demɔ siɗoŋ ha̧ o dáà in nàà kɔ-wa. Mɔ nɛ̀ nyɛma yí Sɔ̧ nɛ̀ mbetɛ nɛ́ mɔ‘i. 5War ko mgbák ko-gera nɛ̀ duk ɛ̀nɛ̀, a̧ a̧ é ta nɛ̀ Sɔ̧, e nɛ̀ see tɛ aia-nú in kɔfa-sɔ̧ zɛ nɛ wese. 6Ɓɛɛ war ko ko-gera nɛ̀ ye kɔ‘i nɛ tɛ mɔɔ-desee, kóó a̧ duk kpasa, a̧ fee so kaɗi. 7Ɓɛɛ mɛ̀ mbáŋ tɛ o ko-gera zu mɔ‘i wen ká‘i tɛ́ɛ̀ kpa ŋma wen mɛ́ tɔ̧ zu wa. 8Wi nɛ̀ zɔk o bíí kɔ‘i nɛ̀ de-a na, gan gan o bíí kɔ̧ tua kɔ̧-a̧, wi’ɛi kafa kɔ̧ɔ̧ɗɔɔwen, a̧ ɗaŋa gan wi nɛ̀ kɔ̧ ɗɔaa na.
9Ko-gera nɛ̀ mɛ tɛ́ yɔr nin-a mgbara o dɔka-a, nɛ́ wan nɛ̀ pɛ-a ku̧naŋ ɓu-mɔɔrɔ-ɗoŋ-kpɔk yaknɛ, nɛ̀ a̧a̧ so nɛ̀ wíì kpɔk ɓɛɛ. 10A̧ tɛ duk nɛ́ okoo nɛ̀‘i iŋa wen zu dee demɔ kɔ̧-a̧: tɛ daia o bem kɔ̧-a̧, tɛ kpɛka gɛnɛ, tɛ fɔra naŋ o sa̧a̧-bíí, tɛ gbaka o wi-bɔnɛ; a̧ a̧ dúk kànà nɛ́ okoo nɛ̀ ee see tɛ dee demɔ lɛŋ.
11War ko o ko-gera nɛ̀ ɓɔna nɛ̀ ŋgai, mɛ̀ é wa duk, wen ŋgimbi nɛ̀ dee wɔ-tɛ tɛ́ de ha̧ wa mɛ́ zik ɗoŋ e ha̧ Krist, wa tɛ́ kii mɛ́ ba mbe wíì. 12Hegɔ, kita tɛ́ tik wa, wen wa ee kuti ha̧a̧nú kɔ-wa duk. 13Woyo mbɛt, hee mɔ'ɔ nɛ̀ wa bó nɛ̀ mɔ mɛ́ de na ga, wa ya ndɛn nɛ̀ nú tua nɛnɛ; zu-a'i wa bur nɛ́ wen, dali nɛ̀ wen, tɔ̧ nɛ̀ wen nɛ̀ wa nyɛm mɛ́ tɔ̧ na. 14Mi kɔ̧ɔ̧ kɔ‘m ha̧ o ko-gera nɛ̀ ɓɔna nɛ̀ ŋgai mɛ́ ba mbe wíì, wa a̧ kó bem, wa a̧ zɔ́k tua-wíì kɔ-wa nɛ̀ de-a, wen ká o wi-kur-zu yɛ tɛ́ɛ̀ kpa yuwar mɛ́ tɔ̧ ŋma wen zu yɛ. 15O ŋma mgbara wa a̧ra̧ ndak nɛ̀ ɗoŋ Satan. 16Kà ŋma okoo nɛ̀ kɔ̧ɔ̧ ɗɔaa nɛ́ bòó nɛ̀ ko-gera mgbara o nam kɔ‘i, ɓɛɛ kóò‘i a̧ nɛ́ɛ̀ gbák wa, wen ká tɛ̀ɛ́ duk nɛ́ tui zu zuduk bíí ko Krist, wen ha̧ zuduk bíí ko Krist mɛ́ kpa fara wen gbaka o kpasa ko-gera.
17O kuti-wi nɛ̀ de tom kɔ‘i nɛ̀ yuwar-a, nyɛma ha'i mɛ́ zɔn wa batɛ, gan gan o wan nɛ̀ e see tɛ tɔ̧ɔ̧ wen ko Sɔ̧, usi nɛnɛ mbɛt. 18Nɛ́ mɔ‘i a̧ Yɔramɔ tɔ̧a̧‘e: «Mɛ́ beka hɛr nú ndai ŋgimbi n'aa duk tɛ ŋmáá gba̧a̧-nyɔnɔ na,» ɓɛɛ tɔ̧ɔ̧ woyo'e: «Wi-de-tom tɛ́ kpa kànà mɔɔ-oi-tom kɔ‘i.»#Wee-ɗoŋ-he 25.4; Mt 10.10; Lk 10.7 19Ká mɛ́ kpɛk baa wen ko bíí zu kuti-wi bee na, hɔ ŋgimbi nɛ̀ o bíí yiitoo kóó taar dee sedaako-a sɛ.#Wee-ɗoŋ-he 17.6; 19.15 20Mɛ̀ gáí o wi-de-ɗaŋmɔ ɓɔn yí bíí lɛŋ, wen ha̧ kíì mɛ́ de o dɔka-a.
21Mi ee mɛ́ in Sɔ̧, in Jesu Krist, ká bá nɛ̀ o betom mɛ yiwese nɛ̀ Sɔ̧ hoka, mɛ̀ mbo zu tɛ usamɔ nɔ'ɔ, ɓɛɛ ká mɛ́ kɛ̧ mgbara bíí na, in ká mɛ́ hok bíí hok gbak nɛ̀ wa na. 22Ká mɛ́ e er zu bíí nɛ̀ haya-a na, ká mɛ́ ye zaŋ ɗaŋmɔ ko ŋma bíí na mbɛt, ɓɛɛ mɛ̀ zɔ́k tɛ-mɛ nɛ̀ sa̧a̧-a̧.
23Ká mɛ́ nɔ́ nɛ́ yì ɓɛɛ na. Mɛ̀ nɔ́ be dɔ̧ɔ̧ tikiɗi wen zaŋ-mɛ in wen o be zɛɛ nɛ̀ de mɛ́ dɔ̧ɔ̧-dɔ̧ɔ̧‘i.
24O ŋma bíí a̧a̧ sɛnɛ nɛ̀‘i zɔk ɗaŋmɔ kɔ-wa kaɗi, sɛka'i gɔna kita zu wa; ɓɛɛ ko o ŋma, wi gɔn kita zu wa kaɗi sɛka'i zɔka ɗaŋmɔ‘i. 25O de tom mbɛt, wi zɔk kànà zɔk; ɓɛɛ wan nɛ̀‘i zɔk na beka ɓɔn nɛ̀ hu̧sa̧-a̧ ɓɔnsɛnɛ na.
Currently Selected:
1 TIMOTEE 5: GB11DC
Highlight
Share
Copy
Want to have your highlights saved across all your devices? Sign up or sign in
KALATA KO SƆ̧ La Sainte Bible en Langue Gbaya © L’Alliance Biblique du Cameroun, 2011.