1 TIMOTEE 6
6
Tɔ̧ɔ̧-wen zu o bara
1O bíí lɛŋ nɛ̀ duk nɛ́ bara a̧ zɔ́k o dáa-bara kɔ‘i nɛ́ bíí nɛ‘i nyɛma mɛ́ tu̧ tɛ-wa nɛ̀ mbetɛ, wen ká nin Sɔ̧ in usamɔ k’ɛ́ɛ́ tɛ̀ɛ́ ɗaŋ. 2O bara a̧ tú̧ tɛ o dáa-bara kɔ‘i nɛ̀ kɔ̧ɔ̧ ɗɔaa; ká wa de ŋgazu e nɛ̀ wen ndé, wa nɛ́ o nya kɔ‘i na. Ɓɛɛ wa a̧ dé tom ha̧ wa nɛ̀ de-a gan kuti-a, wen o bara nɔ‘i gbak nɛ́ o nya yɛ n’ɛ̀ɛ̀ kɔ̧ɔ̧ nyɛmna nɛ̀ kɔ̧ɔ̧ ɗɔaa ha̧ Sɔ̧.
Kpasa yuu Sɔ̧
Mɔ nɛ̀ mɛ tɛ́ usi tɔ̧ nɛnɛ ha̧ bíí mɛ́ de nɛ́ mɔ‘i. 3Kà ŋma bíí úsí ŋma usamɔ nɛtɛ, kà a̧ ndáɗí in mgbák wen ko Gasa Wan k’ɛ́ɛ́ Jesu Krist, in usamɔ nyɛm nɛ̀ ɗoŋ yuu Sɔ̧ na mbɛt, 4ŋmaŋa-tɛ boma yí wi’ɛi kaɗi. A̧ nɛ́ wi nɛ̀ iŋ mɔ na, wi-zika-zu nɛ̀ aŋ nɛ́ wen a ŋgɔn, si nɛ̀ káfɛ́ tɛ́ wen nɛtɛ nɛtɛ; nɛ́ tɛ́ mɔ‘i a̧ aa-see-mɔ, kpɛri, dara, ɓira-wen-ndela, 5in zaŋa-wen nɛ̀ kaɗi na mgbara o bíí nɛ̀ taamɔ kɔ-wa ɗaŋa, tɛ́ nɛnɛ. Kpasawen bó tɛ-wa na, ɓɛɛ wa ta kɔ-wa'e yuu Sɔ̧ nɛ́ yuwar-kpaamɔ.
6Nɛ̀ mbetɛ, yuu Sɔ̧ nɛ́ yuwar-kpaamɔ wen wi nɛ̀ duk nɛ̀ desee zu mɔ n'aa a̧a̧ nɛnɛ. 7Wen bó nɛ́ ɛ́ɛ́ baa ŋma mɔ tɛ́ nɛnɛ zaŋnu’ɛ na; kale-a mbɛt, ɛ́ɛ́ beka ba ŋma mɔ yaknɛ na. 8Ɛ́ɛ́ nɛ́ kpaa nyɔŋmɔ in laa-pi̧-tɛ-yɛ, ɛ̀ɛ̀ dúk nɛ̀ desee. 9O wi nɛ̀ kɔ̧ɔ̧ mɛ́ kpa mbɔi nɛ̀ dɔka-a, ɓan na, wa tika tɛ weamɔ nɛ̀ duk nɛ́ pɛ́r-ba-wa, in tɛ ɗaŋ wɔ-mɔ nɛ̀ bó nɛ́ kpasamɔ na. Nɛ́ mɔ‘i a̧ de ha̧ bíí mɛ́ tik yɔ nɛnɛ mbɛt. 10Tugun ɗaŋmɔ nɛtɛ nɛtɛ lɛŋ nɛ́ wɔ-sede; nɛ́ wɔ-sede a̧ dee ha̧ o ŋma bíí mɛ́ a̧r nyɛi̧ nɛ̀ kɔ̧ɔ̧ɗɔɔwen, dak nɛ̀ o mɔɔ-dita-see nɛtɛ nɛtɛ pi̧ zu wa.
11Ɓɛɛ kɔ-mɛ, bíí ko Sɔ̧, mɛ̀ yú pɛrti o mɔɔ nɔ‘i. Mɛ̀ kíí nɛ́ deemɔ nɛ̀ yuwar-a, yuu Sɔ̧, kɔ̧ɔ̧ɗɔɔwen, kɔ̧ɔ̧mɔ, nɔɔ-ŋgiɗi in ga̧a̧-see. 12Mɛ̀ bí kpasa biro kɔ̧ɔ̧ɗɔɔwen, ha̧ mɛ́ mɛ́ kpa duka-kpasa kpoo nɛ kpoo nɛ̀ Sɔ̧ saa so mɛ́ wen-aa, hee mɔ'ɔ nɛ̀ mɛ́ gbara so nɛnɛ ti o gíí wi-sedaako ga. 13Mi tɔ̧ wen’ɛ ha̧ mɛ́ sɛn ti Sɔ̧ nɛ̀ de ha̧ mɔ lɛŋ mɛ́ duk kpasa, in sɛn ti Jesu Krist nɛ̀ dee so sedaako ti Pɔns Pilat, gbar nɛ̀ kɔ̧ɔ̧ɗɔɔwen.#Jn 18.37 14Mɛ̀ kásí heembea dúk nɛnɛ nɛ̀ sa̧a̧-a̧, nɛ̀ ŋma mɔ mɛ́ tɔ̧ zu bo na, hɔ ŋgimbi nɛ̀ Gasa Wan k’ɛ́ɛ́ Jesu Krist tɛ́ pii nɛ̀ ɗoŋ. 15Tɛ́ ŋgimbi nɛ̀ Sɔ̧ gɔna, Sɔ̧ tɛ́ de ha̧ a̧ mɛ́ pii ɗoŋ:
Sɔ̧ nɛ́ Wan-desee
nɛ́ a̧ kpɔk a̧ duk zu mɔ lɛŋ;
a̧ nɛ́ Wannu ko o wannu,
Gasa Wan ko o gasa wan.
16A̧ kpɔk ɓɛɛ a̧ fe na,
a̧ duk tɛ̀ sa̧a̧mɔ nɛ̀‘i nyɛm mɛ́ hɔ sɛnɛ na;
ŋma bíí kpɔk nɛ̀ zɔka a̧ bo na,
ŋma bíí nɛ̀ tɛ́ zɔk a̧ bo na mbɛt.
Gasamɔ in ŋgayamɔ a̧ dúk nɛ́ kɔ̧-a̧ kpoo nɛ kpoo!
Aamɛn.
17Mɛ̀ tɔ̧́ mbɔrɔ ha̧ o wanmbɔi zaŋnu’ɛ ndé, ká wa gásí zu zu mbɔi na, ká wa é ta nɛ̀ kpaamɔ nɛ̀ ɓan na, ɓɛɛ kaɗa na, ɓɛɛ wa a̧ e tá nɛ̀ Sɔ̧, wan nɛ̀ ha̧ o demɔ lɛŋ nɛ̀ dɔka-a h’ɛ́ɛ́, wen h’ɛ́ɛ́ mɛ́ kpa desee sɛnɛ. 18Wa a̧ dé nɛ́ demɔ, kpaamɔ kɔ-wa a̧ dúk nɛ́ dee demɔ; er-wa a̧ hú̧í̧ tɛ̀ ha̧a̧mɔ, wa a̧ kɛ̧́ mɔ kɔ-wa in o ŋma bíí. 19Hegɔ wa tɛ́ mɔi̧ de kpasa mbɔi wen wa nɛ̀ tɛ-wa wen ŋgimbi siti ha̧ wa mɛ́ kpa mgbák duka-kpasa.
Sɔŋkur fanamɔ
20Timotee, mɛ̀ zɔ́k mɔ nɛ̀‘i ee er mɛ́‘i nɛ̀ de-a. Ká mɛ́ ndak ɗoŋ ɗaŋ géé bura-wen in sii-kafɛ-ndela nɛ̀ wa ta'e nɛ́ iŋamɔ na. 21O ŋma bíí yora ɗoŋ taamɔ nɔ‘i, ɓɛɛ a̧r tɛ kɔ̧ɔ̧ɗɔɔwen.
Deemɔ nɛ̀ ta-tɛ ko Sɔ̧ a̧ dúk in'nɛ̀ɛ́!
Currently Selected:
1 TIMOTEE 6: GB11DC
Highlight
Share
Copy
Want to have your highlights saved across all your devices? Sign up or sign in
KALATA KO SƆ̧ La Sainte Bible en Langue Gbaya © L’Alliance Biblique du Cameroun, 2011.