1 TIMOTEE 4
4
O usamɔ ndela
1Sa̧a̧ Ɔmi tɔ̧ɔ̧ nɛ̀ sa̧a̧-a̧‘e: tɛ́ sɔŋkur ŋgimbi o ŋma bíí tɛ́ bɛ̧ kɔ̧ɔ̧ɗɔɔwen mɛ́ ndaɗi in o taamɔ-ɔr-mɔ in usamɔ ko o ɗaŋ-sɔ̧. 2Wa tɛ́ a̧r wen zu dee mɔɔ-see-yiitoo ko o wi-ndela nɛ̀ ndɔla-ɗaŋmɔ dira see-wa hee wee-boi ga. 3O wi nɔ‘i tɛ́ dor o bíí tɛ baa-ŋmaa, in tɛ nyɔŋa o ŋma nyɔŋmɔ, ɓɛɛ nɛ́ Sɔ̧'ɔ̧ dee o nyɔŋmɔ nɔ‘i ha̧ o wi-mbo-zu ha̧ a̧, nɛ̀ iŋa mgbák kpasawen mɛ́ nyɔŋ, de nɛ̀ osoko-a. 4Wen mɔ lɛŋ nɛ̀ Sɔ̧ dea nɛ́ demɔ; mɔ nɛ̀‘i dee osoko ha̧ Sɔ̧ zu-a kaɗi, wi beka bɛ̧ na. 5Wen ko Sɔ̧ in kɔfa-sɔ̧ ɗafa war nyɔŋmɔ‘i kaɗi.
Kpasa wi-de-tom ko Jesu
6Mɛ̀ wé ɗoŋ mɔ‘i lɛŋ ha̧ o nya-mɛ; hegɔ mɛ́ tɛ́ duk nɛ́ kpasa wi-de-tom ko Jesu Krist, nɛ̀ dai tɛ̀ nɛ̀ wen nɛ̀ a̧a̧ tɛ kɔ̧ɔ̧ɗɔɔwen in de usamɔ nɛ̀ tɛ-mɛ haia so sɛnɛ tɛ yamba-a. 7Ká mɛ́ tɔ̧ faɓa nyɛrɛ hee to ko o sɔka okoo ga na, ɓɛɛ mɛ̀ é see-mɛ́ tɛ yuu Sɔ̧. 8Ŋmasa tɛ-wi ha'i mɛ́ kpa ŋgai gbak wi gbak tɛ́ mɔ tikiɗi; ɓɛɛ yuu Sɔ̧ gbak wi tɛ́ mɔ lɛŋ. Bó nɛ́ yuu Sɔ̧ a̧a̧ nɛ̀ ha̧a̧nú wen duka-a, wan mɛ́ kinii, in wan mɛ́ siti mɛ mbɛt na nde? 9Wen’ɛ nɛ́ wen-e-nɛ-ta, nɛ̀ nyɛma ha̧ bíí lɛŋ mɛ́ kpɛk war kpɔk. 10Kóó ɛ́ɛ́ zɔk nɛ́ bɔnɛ bi nɛ̀ biro tɛ yuwar'i, mɛ̀ nɛ́ wen n’ɛ̀ɛ̀ ee ta nɛ̀ Sɔ̧ nɛ̀ duk kpasa, Wan-kpasi o bíí lɛŋ, gan gan o wi nɛ̀ kɔ̧ɔ̧ ɗɔaa.
11Mɔ nɛ̀ mɛ tɛ́ usi tɔ̧ nɛnɛ ha̧ bíí mɛ́ de nɛ́ mɔ‘i. 12Hee mɔ'ɔ nɛ̀ mɛ́ nɛ́ be-ŋgaiwi ga, ká mɛ́ e ha̧ ŋma bíí mɛ́ e mɛ́ tɛ geemɔ na. Ɓɛɛ o wi nɛ̀ kɔ̧ɔ̧ ɗɔaa a̧ zɔ́k ɗoŋ mɔ tɛ̀ mɛ́, tɛ tɔ̧ɔ̧-wen, tɛ deemɔ, tɛ kɔ̧ɔ̧mɔ, tɛ kɔ̧ɔ̧ɗɔɔwen in tɛ duka-a nɛ̀ sa̧a̧-a̧. 13Mɛ̀ é see-mɛ tɛ tɔra wen ko Sɔ̧ ha̧ o bíí, tɔ̧ nɛ̀ mbɔrɔ, usi nɛ̀ mɔ ha̧ wa hɔ ŋgimbi n'am tɛ́ hɔ. 14Ká mɛ́ e ha̧a̧mɔ nɛ̀ ta-tɛ ko Sɔ̧ nɛ̀ duk tɛ-mɛ ha̧ mɛ́ duk géè na, wen mɛ̀ nɛ́ tɛ̀ tɔ̧ɔ̧ wen ko o wi-tɔ̧-wen oi nú Sɔ̧ in tɛ̀ ee er zu mɛ́ ko o kuti-wi á̧ mɛ́ kpaa nɛnɛ. 15Mɔ nɛ̀ mɛ tɛ́ kasi kɔ̧ see-mɛ́ in mɔ nɛ̀ mɛ tɛ́ yor zu-a nɛ́ mɔ‘i; hegɔ, o bíí lɛŋ tɛ́ zɔk'e mɛ́ nɛ́ nɛ̀ɛ́ siti. 16Mɛ̀ zɔ́k tɛ-mɛ́ nɛ̀ de-a in yuwar usamɔ kɔ-mɛ mbɛt. Mɛ̀ é see-mɛ́ sɛnɛ. Kà mɛ nɛ́ dee hegɔ, ɓɛɛ mɛ́ tɛ́ kpasi tɛ-mɛ nɛ̀ tɛ-mɛ in o bíí nɛ̀ zii wen kɔ-mɛ mbɛt.
Currently Selected:
1 TIMOTEE 4: GB11DC
Highlight
Share
Copy
Want to have your highlights saved across all your devices? Sign up or sign in
KALATA KO SƆ̧ La Sainte Bible en Langue Gbaya © L’Alliance Biblique du Cameroun, 2011.