Mak 15
15
Zozii ‑kʋ Pilatɩ ‑deliin
(Mat 27.1-2,11-14; Luk 23.1-5; Zan 18.28-38)
1‑Zʋkpasa 'pɩɩ, ‑teyiyinyaa tocɩa maya ncaakpasɩa, ‑jlɩmaazienyaa* ɩya 'tɩtɩplakandea 'fɩan ya cɩzʋlʋ. Ma ya Zozii gʋa, ma yɔɔ 'ma 'nyɩ ma yɔɔ Pilatɩ ‑deliin fa. 2Pilatɩ yɔɔ neencla lebhe: «‑Mɔ ‑glɩ 'lɛ Zifʋnyaa* 'la nyɩbhɛlʋa bha?» Zozii yɔɔ 'cla lebhe: «Sɛɛ ‑n 'bhli 'lɛ 'kʋ!» 3‑Teyiyinyaa tocɩa gɩa 'mɔɔ wɔɔbhutukpa 'kʋ. 4Pilatɩ ya ‑awlɛɔ neencla lebhe: «‑Mɔ 'titi ‑n ‑ŋlɛ wɔɔbhutukpaa ma gɩɔ 'lɛ 'kʋ na! ‑N nyɩtɛmʋ 'ta ‑naa da bha?» 5‑Ma Zozii 'tanɩ wɔlɩ ‑ylɛylɛ nesa. Ka ‑tɛɛ ɩ kla Pilatɩ ne.
Zozii 'la 'bhlawɔlɩa ya kpokʋzʋɔ
(Mat 27.15-26; Luk 23.13-25; Zan 18.39—19.16)
6Zifʋnyaa* 'la geyliinwlʋfɛtlɩa* ‑ka ‑azla ŋeni na, Pilatɩ 'talɩa ‑palʋʋnpapanyɔa ma 'clalɩa 'mɔɔ 'lɛ na 'cin 'nyɩ ɔ nyɩa maa. 7Na nclɔɔa ma laa 'lɛ Balabasɩ na, ɔya ɔ 'ye ‑kʋa ‑palʋʋnpapalʋ ‑zɔn, sa ma ya nclɔɔ 'bhla daa ma mʋnʋa 'lɛ ‑kwletocɩa gbatlɩ na. 8‑Alawleea ya Pilatɩ 'bhlɩ mʋ 'nyɩ a yɔɔ ɩmɩa ɔ nʋ ‑azla 'lɛ 'nyɩ ɔ nyɩ 'lɛ maa na, 'clalɩ. 9Pilatɩ ya maa 'cla lebhe: «A ‑wa lebhe n 'talɩ Zifʋnyaa 'la nyɩbhɛlʋa 'cin ɩya n 'nyɩ anyɩ bha?» 10Sa, ɔ ‑cia sɛɛ lebhe wozisa ‑teyiyinyaa tocɩa ‑saa 'mɔɔ 'lɛ na. 11‑Ma ‑teyiyinyaa tocɩa ya ‑alawleea gbɩzʋ le a 'cla lebhe ɔ 'talɩ Balabasɩ 'cin ɩya ɔ 'nyɩ maa. 12Pilatɩ ya ‑awlɛ maa neencla lebhe: «Ɔmɔa a la 'lɛ Zifʋnyaa 'la nyɩbhɛlʋa na, wɔɔsaa 'titi a ‑wa 'lɛ lebhe n nʋɔ cɩ bha?» 13Ma ya ‑awlɛ nɩkplaan ‑gaa 'nyɩ ma ya 'cla lebhe: «Bhoo dabhlalɩsu 'ciin!» 14Pilatɩ ya maa 'cla lebhe: «Gbanyinyi saa 'titi ɔ nʋa 'lɛ bha?» Ma ‑gaanɩa nɩkplaan ‑gbɔɔn 'nyɩ ma claa lebhe: «Bhoo dabhlalɩsu 'ciin!» 15Pilatɩ ‑waa 'lɛ lebhe ɔ 'kaa ‑alawleea 'la pɔɔsa nʋ na, ɔ ya Balabasɩ 'cintalɩ ɔ ya maa 'nyɩ, ɔ ya gba, ma ya Zozii ‑ngblieen bhutili 'fɩɔn, 'nyɩ ɔ yɔɔ 'lɛ maa 'nyɩnɩ le ɔ 'ka dabhlalɩsua 'ciin ‑bhoo.
Zozii 'la 'kʋkɔtɔlʋlɩɛ
(Mat 27.27-31; Zan 19.2-3)
16'Sojaa ya Zozii goonvlaslea nɩkplaan fa 'nyɩ ma ya ma 'yea 'fɩan 'wluwlalɩ. 17Ma yɔɔ lokwi ‑zalɛ nɩkplaan ‑pla, ma ya 'ŋuglipie ca 'nyɩ ma yɔɔ 'wlu zʋ. 18Ma paa 'mɔɔ ‑ayo 'nyɩ ma claa lebhe: «‑Ayoka, Zifʋnya* 'la nyɩbhɛlʋ!» 19Ma 'sɛpɛlɩa 'mɔɔ 'dʋkɔlʋ 'wlu, ma 'ŋwla 'mɔɔ ‑daadʋ 'ciin, ma slaa 'mɔɔ ‑deliin ‑kukoonkplii sa 'nyɩ ma gɩa 'wlu sa ma nyɩa 'mɔɔ. 20Ma bhɩalɩɔ 'lɛ 'kʋkɔtɔlʋlɩɛ na, ma yɔɔ lokwi ‑zalɛa nɩkplaan ‑sa, ma yɔɔ ɔla lokua nɩkplaan ‑pla 'nyɩ ma ‑yɔɔsɔ ya ‑jlua 'kʋ kwli le ma 'kaa 'mɔɔ dabhlalɩsua 'ciin bhokan mʋ.
Zozii ya dabhlalɩsua 'ciin ‑bhoo
(Mat 27.32-44; Luk 23.26-43; Zan 19.16-24)
21Ma ya 'plɩplɩnyɔ bhlo, ɔ wlʋa 'lɛ 'kwlaan na, 'kʋbhli le ɔ 'ka Zozii 'la dabhlalɩsua bhɛ. Ma laa 'mɔɔ Simɔɔn, ɔ 'wlʋlʋ 'dua ma la 'lɛ Silɛnɩ na 'kʋ. Ɔmɔ ‑ɔ ‑glɩ 'lɛ Alɛzandlɩ ɩya Ghlufusʋ to. 22Ma ‑ya Zozii daa ma la 'lɛ Gɔlʋgotaa, ‑ɩ sa 'lɛ ‑zɔn lebhe 'wlukokloo 'la daa na, fa. 23Ma ya wabha lebhe ma 'kaa 'mɔɔ ‑diinvɛɛan ‑ɛ 'cakalɩɔ 'lɛ ‑piti ‑nyinyi na 'nyɩ, ‑ma ɔ 'tɛɛ 'mla. 24Ma yɔɔ dabhlalɩsua 'ciin bho, ma ya ‑gɔjɩma ghla le ma 'ka ɔla lokua polisa cibhlili, 'nyɩ ma yɩɩ poli. 25‑Zʋkpasa 'la 'ŋwacɩ ‑nvɔɔna ma bhoa 'mɔɔ 'lɛ dabhlalɩsua 'ciin. 26Wɔlɩa 'la gbʋa ɔ 'ku 'lɛ na, ɩ ‑zieo kpluukpaakpʋ 'kʋ, 'nyɩ ɩ claa lebhe: «Zifʋnyaa* 'la nyɩbhɛlʋ.» 27Ɔya ncaabhlanya ‑mɔsɔɔ ma bho 'lɛ dabhlalɩsia 'ciin: Bhlo ‑kʋa 'mɔɔ 'lipasɔ 'kʋ 'nyɩ bhlo ‑kʋɔ 'lɛ 'daba 'kʋ. [28]#15.28 ‑Godogodofluwia ‑anɩ ya wɔɔkle ‑naa Zieziewɔlɩa nɩkplaan ‑pla: «’Lɩka ‑sa wɔɔnyɩtʋa ‑ʋ cla ’lɛ lebhe ma yɔɔ nyinyinʋnya sidiin zɛlɩmʋ na, glalɩ ’lɛ ’kʋ.»
29'Plɩplɩnyaa vlaa 'mɔɔ, ma 'dɩdɔa 'wluku 'nyɩ ma cla lebhe: «‑Nwoo! ‑Mɔ ‑naa, ‑ɔ gbɔlʋ 'lɛ Laagɔpaakadiea* 'nyɩ clɩɩ ‑mɔta ‑gbaaglɩɩn, ‑ɔ slʋʋ 'lɛ na, 30‑mɔ 'titi ‑sanɩ ‑ncɩ gbʋʋn na, 'wlʋ dabhlalɩsua 'ciin ɩya ‑n kwlinɩ na.» 31Sɛɛ bhlogbɩɩ, ‑teyiyinyaa tocɩa maya ‑jlɩmaazienyaa* 'kɔtɔlʋa 'mɔɔ 'kʋ, ma claa lebhe: «Ɔ ya ‑anʋa gbʋʋnsa 'nyɩ ɔmɔ 'titi mino 'ta, ɔ 'ka ɔcɩ gbʋʋnsa! 32Laagɔ 'la ‑Sasanyɔa*, Izlayɛlɩ* 'la nyɩbhɛlʋa, 'naa ɔ 'wlʋnɩ ‑pɔtɔnʋ dabhalɩsua 'ciin, ɔ kwlinɩ ‑a ka 'lɩ ɩya ‑a kanɩ ɔla pɔɔtɛtɛ kalɩ.» Maa, ma bhoa 'lɛ mayɔɔsɔ dabhlalɩsia 'ciin na, maa ‑ma, ma vlamʋa 'mɔɔ.
Zozii 'la 'kwɩa
(Mat 27.45-56; Luk 23.44-49; Zan 19.28-30)
33Daa 'ylʋa slo 'lɛ dɩdɩ na, daa ‑tɛtɛa ya 'tutu pla ‑aan 'plɩplɩylʋʋn 'la 'ŋwacɩ ‑mɔta. 34'Ŋwacɩ ‑mɔta ŋeni 'lɛ na, Zozii yaan ‑gaa 'nyɩ ɔ ya cla lebhe: «Eloyi, Eloyi ‑lama ‑sabatani?» Ɩ sa ‑zɔn lebhe: «'Na Laagɔ, 'na Laagɔ, 'lɩsaa 'la gbʋ ‑n yaan 'lɛ leen 'wlʋ bha?» 35Maa ‑ɔ ‑kʋa 'lɛ 'dɛ na, ‑anʋaa ‑ɔ 'nuo 'lɛ neen na, ma claa lebhe: «'Lɩka, ɔ la Elii!» 36Bhlo ya sɔmɩfa, ɔ ya ‑vada diinvɛɛn ‑nyinye nɩkplaan 'ŋwa, ɔ yaa 'dʋkɔlʋ 'ciin zʋ, 'nyɩ ɔ yɔɔ ma ne cɩ fa le ɔ 'kaa 'mla. Ɔ ya 'cla lebhe: «A ‑bɩɔ ka 'ciin, ‑a ka 'lɩ, ɩ ‑ka ‑kʋ lebhe Elii cɩ 'ka ci ɩya ɔ 'kɔɔ kwlee na.» 37‑Ma Zozii ya nɩkplaan ‑gaa 'nyɩ ɔ ya 'klʋsa.
38Laagɔpaakadiea* ‑zɔn 'la lokwia ya 'wlu 'kʋ 'manɩ, ɛ ya 'ŋatɔ ‑aan 'nyɩ ɛ ya ‑zɔn ŋeni. 39'Soja ‑gwlɩɩ ‑ngbi toa, ‑ɔ 'nylugoa 'mɔɔ 'lɛ 'kʋklʋʋn na, ɔ 'lɩ 'lɛ saa ɔ 'kukulua 'lɛ na, ɔ ya 'cla lebhe: «‑Zaagbʋsa, nclɔɔ ‑naa, ɔ ‑glɩa Laagɔ 'la 'Cʋ.» 40'Ŋwlɛ ‑kʋmʋa 'dɛ, ma ‑kʋa 'koonko, ma 'lɩmʋa. Maa sidiin, Malii, Madalaaŋlɔa, Malii Zakɩ Co ɩya Zoze 'nɔ ɩya Salomee, 41maa ‑ɔ gɩlɩa 'mɔɔ 'lɛ 'nyɩ ma lobhoa 'mɔɔ 'lɛ, daa ɔ kʋa 'lɛ Galileebhlɩa 'kʋ na ɩya 'ŋwlɛ -bhutukpa, -mayɔɔsɔ ‑gblaa 'lɛ Zolizalɛmʋ na.
Zozii 'la zizielɩɛ
(Mat 27.57-61; Luk 23.50-55; Zan 19.38-42)
42'Ylʋ yaanɩa mʋ 'nyɩ sa ɩ ‑glɩa 'lɛ bhɔsʋaclɩɩ, Zifʋnyaa* 'la nyɔkwɛclɩɩa* 'la bhɔsʋa clɩɩ na, 43Alimateenyɔ Zozɛfʋ, 'tɩtɩplakandea nɩkplaan 'la 'klʋnyɔ ya ci. Ɔmɔ ‑ma, ɔ ‑bɛmʋa Laagɔ 'la Nyɩbhɛlɩdua* 'la cilɩɛa. Ɔ ya pɔɔtɛtɛ 'ma, ɔ ya Pilatɩ 'bhlɩ mʋ 'nyɩ ɔ yɔɔ Zozii 'la ‑blaanyɛkɛa 'clalɩ. 44Pilatɩ 'nu 'lɛ lebhe ɔ yaa tooto 'ku na, ɩ yɔɔ nikpoosla. Ɔ ya 'sojanya ‑gwlɩɩ ‑ngbi 'la ‑kwletoa la 'nyɩ ɔ yɔɔ neencla, ka ɩ ‑ka ‑kʋ lebhe ɔ ‑kaa 'lɛ 'ku ɩ ya ‑gwlɛlɩ na. 45'Sojanya ‑gwlɩɩ ‑ngbi toa ‑sɔɔ 'lɛ 'dɩ na, ɔ yaa Zozɛfʋ ‑jioli 'nyɩ le ɔ 'ma ‑blaanyɛkɛa. 46Zozɛfʋ ya 'kuocɩgʋalokwi ‑pɩa, ɔ ya gba ma ya Zozii dabhlalɩsua 'ciin ‑sa 'nyɩ ɔ yɔɔ lokwia cɩgʋa. Ɔ yɔɔ lesua ma kɔtɔlʋ 'lɛ cokwie nɩkplaan na zʋ, ɔ ya cokwie 'kadie 'bhisio 'nyɩ ɔ ya lesua kpaslɩlɩ. 47Malii, Madalaa ŋlɔa, ɩya Malii, Zoze 'nɔ 'nylugoa, ma kopea daa ma zʋa 'mɔɔ 'lɛ na.
Currently Selected:
Mak 15: NTLD13
Highlight
Share
Copy
Want to have your highlights saved across all your devices? Sign up or sign in
Dida New Testament © Bible Society of Côte d'Ivoire, 2013.