Mak 16
16
Zozii 'la kwɩɩnkʋbhue
(Mat 28.1-8; Luk 24.1-11; Zan 20.1-2)
1Daa Zifʋnyaa* 'la nyɔkwɛclɩɩa* 'plɩ 'lɛ na, Malii, Madalaa ŋlɔa, Malii Zakɩ 'nɔ ɩya Salomee ya 'ŋɔnɔpalɩɩ ‑pɩa le ma 'kaa 'mɩɩ Zozii 'la ‑blaanyɛkɛa 'kʋ 'pa. 2Nyamaclɩɩ ‑zʋkpaa pɩɩ, daa 'ylʋbhuoa bho 'lɛ 'kʋ na, ma ya lesua 'kʋ mʋ. 3Ma 'claclalɩa neen lebhe: «Ncaasaa ‑cɩ kaa 'lɛ ‑anyɩ lesua nekʋ 'la cokwiea 'bhisiolu bha?» 4Ma na ma bhli 'lɛ 'wlu 'kʋ na, ma ya 'lɩ lebhe cokwie 'kadie ‑naa yaa 'bhisio. 5Ma ble 'lɛ lesua nɩkplaan na, ma ya nyɩgbɩɔ bhlo 'lipasɔa 'kʋ sakʋda 'lɩ, ɔ ‑plaa lokupɔpʋɛ nɩkplaan 'nyɩ pɔlɛɛn ya maa 'wlʋ. 6Ɔ ya maa 'cla lebhe: «Pɔlɛɛn 'la 'wlʋa anyɩ. Nazalɛtɩnyɔ Zozii, ma bho 'lɛ dabhlalɩsua 'ciin na, ɔmɔ a 'matɩ 'lɛ. Ɔ 'ta ‑da ‑kʋ, ɔ ya 'kwɩɩnkʋbho. A kopeka daa ma zʋa 'mɔɔ 'lɛ na. 7A mʋ a solu ɔla gɩlɩnyaa* ɩya Pɩɛlɩ lebhe ɔ pʋ ka anyɩ 'kʋklʋʋn Galilee. 'Yɛpɩ a cɩ 'kɔɔ 'lɛ 'lɩlɩ, saa ɔ solua 'lɛ anyɩ na.» 8Ma ya lesua nɩkplaan 'wlʋ 'nyɩ ma ya 'gu, sa 'wugo ya maa 'wlu 'wlʋ 'nyɩ ma tɩtɛlɩa na. Ma 'ta nclɔɔ bhlogbɩɩ 'dɩ ‑sa, sa ŋanɔ bhlaa maa na.
Zozii ya Madalaaŋlɔ Malii 'ciinfutolu
[9Nyamaclɩɩ ‑zʋkpaa, daa Zozii ‑bho 'lɛ 'kwɩɩn 'kʋ na, ɔ ya Madalaaŋlɔ Malii, ɔmɔa ɔ saa 'lɛ 'wugwi ‑nyinyia ‑ngbɔɔsɔa nɩkplaan na, 'ciinfutolu ‑bɛɛ. 10Ɔmɔ ‑naa ya mʋ, ɔ ya maa ‑ma ‑yɔɔsɔ ‑kʋa 'lɛ 'nyɩ ‑ma ‑kʋnɩa 'lɛ ɔla 'kwɩa 'la cɩɩnkalɔɔn ɩya 'nʋgbʋtulɩɛ nɩkplaan na, 'dɩ ‑sa. 11Daa ma 'nu 'lɛ lebhe ɔ ‑kʋa, ‑ma ɔ yaa 'mɔɔ 'lɩ na, ma 'tɩɩ ‑nʋawlɛ la.
Zozii ya gɩlɩnya ‑mɔsɔ 'ciinfutolu
12'Ɩ leen, Zozii ya gɩlɩnya* ‑mɔsɔ ‑ɔ ‑kʋa 'lɛ ‑bhlide 'kʋ ‑mʋda na, 'ciinfutolu, ‑ma ɔ ‑zʋanɩa ‑buun 'klʋ. 13Ma ya cɔlɔ, ma ya ma 'yea 'dɩ ‑sa. ‑Ma ma 'ta mala wɔlɩa ‑nʋawlɛ la.
Zozii ya gɩlɩnyaa 'kʋgba bhloa 'ciinfutolu
14Bhɩalɩdaa, Zozii ya 'kʋgba bhloa 'ciinfutolu, daa ma ‑kʋa 'lɛ 'tlɔnblɩ 'kʋ na. Ɔ ya maa 'cizalalɩ, pɔɔtɛtɛa ma 'ta 'lɛ ‑ka ɩya pɔlɩa ‑ɩ ‑titlilio 'lɛ maa na, 'la gbʋ, ‑ofi lebhe daa ɔ ‑bho 'lɛ 'kwɩɩn 'kʋ 'nyɩ maa ‑ɔ 'lɩɔ 'lɛ, ‑salɩɩ 'lɛ maa 'dɩ 'kʋ na, ma 'ta mala wɔlɩa ‑nʋawlɛ la. 15'Nyɩ ɔ ya maa 'cla lebhe: «A mʋ ‑laagɔzɔan ‑tɛtɛa, a ‑sa Dɩnanɩa* ɩya a solu ncɛlɩa 'fɩan. 16Ɔmɔa ‑ɔ cɩ 'lɛ ‑nʋawlɛ la 'nyɩ ‑ɔ cɩ 'lɛ 'nyuwluzʋɔ na, ɔ cɩ gbʋʋnsalɩɛ 'lɩ. ‑Ma ɔmɔa ‑ɔ cɩ 'ta 'lɛ ‑nʋawlɛ la na, ɔ cɩ 'ku. 17'Lɩka nʋnʋgbɩa maa ‑ɔ cɩ ka 'lɛ ‑nʋawlɛ la, cɩ 'ka 'lɛ nʋlɩɛ mino na: 'Na 'ŋlɩa nɩkplaan, ma cɩ 'ka 'wugwi ‑nyinyi 'tli, ma 'ka 'bhlɩwɔlɩ ‑leli nyɩtɛ, 18ma 'ka tla wlɩɩn 'kʋbhli ɩya ka ma ‑ka lʋʋ ‑nyunyu 'mla 'titio na, ʋ 'la ka maa lʋʋ ‑ylɛylɛ nʋ. Ma cɩ 'ka guzenya sɩ 'wlugbɛ ɩya ma 'ka jabha.»
Zozii ya ‑laagɔɔn ‑gblaa
19Daa ‑Kwlenyɔ Zozii bhɩalɩ 'lɛ maa solulɩɛ na, ɔ ya ‑laagɔɔn ‑gblaa 'nyɩ ɔ ya Laagɔ 'lipasɔ 'kʋ sa kʋ. 20Maa, ma yaa daa ‑tɛtɛa, Dɩnanɩa* ‑sa ‑kaan mʋ. ‑Kwlenyɔ ‑kʋa maa 'kʋ 'nyɩ ciinzizielɩlobholi nɩkplaan ɔ glalɩa Wɔɔnyɩtʋa 'kʋ.
Currently Selected:
Mak 16: NTLD13
Highlight
Share
Copy
Want to have your highlights saved across all your devices? Sign up or sign in
Dida New Testament © Bible Society of Côte d'Ivoire, 2013.