Mak 14
14
Ma ya Zozii 'la 'bhlawɔlɩ gʋa
(Mat 26.1-5; Luk 22.1-2)
1‑Ɔ ‑toanɩa clɩɩ ‑mɔsɔ ɩya Zifʋnyaa* 'la geyliinwlʋfɛtlɩa* ɩya 'flawua ‑ɩ 'ta 'lɛ 'zɩɩn ‑ka na, 'la 'fɛtlɩa 'kaanɩa ‑lio. ‑Teyiyinyaa tocɩa ɩya ‑jlɩmaazienyaa* 'matɩa dɩgalɩa ma cɩ 'kaa 'lɛ 'lɩ, ma 'kaa 'lɛ Zozii ziziekoteen 'kʋbhli ɩya ma 'kɔɔ 'lɛ 'bhla na. 2Sa ma claa lebhe: «Ɩ 'la 'plɩlɩa 'fɛtlɩa nɩkplaan, ‑wuyuwuyu 'la kasɛ ‑alawleea sidiin bhili.»
'Ŋlɔ bhlo ya Zozii ‑asʋnbanyɩ 'wlu 'kɔsɔ
(Mat 26.6-13; Luk 7.36-50; Zan 12.1-8)
3Zozii ‑kʋa Betanii, Simɔɔn, ma la 'lɛ kokobhebhlanyɔa na, ɔ 'bhisleen. Daa ɔ ‑kʋa 'lɛ 'tlɔnblɩ 'kʋ na, 'ŋlɔ bhlo ya ble, ɔ bhɛɛa ‑alɩbatlɩkpalɩwa ‑a ‑ka 'lɛ 'pɛlʋtɛtʋ ‑asʋnbanyɩ 'titi nɩkplaan na. Ɔ ya 'kpalɩwaa nesa 'nyɩ ɔ ya ‑asʋnbanyɩa Zozii 'wlu 'kɔsɔ. 4Ɩ lilia bhloonbhloon pɔlɛɛn 'nyɩ ma claa macɩ nɩkplaan lebhe: «'Lɩsaa 'la gbʋ 'pɛlʋtɛtʋ ‑asʋnbanyɩ ‑naa, ɛ gbɩɔa 'lɛ ‑sa 'kpɔkpɔ bha? 5‑Asʋnbanyɩ ‑naa, ‑a cɩa mino ‑a cɩa 'mɛɛ 'pɛlʋ zʋ, ‑a cɩa 'dala ‑bhutukpa 'lɩ 'nyɩ ‑a cɩa 'maa ŋaazɩnya 'nyɩ.» 'Nyɩ ma 'manɩa 'ŋlɔa dɔgbɛ 'kʋ. 6‑Ma Zozii ya 'cla lebhe: «A 'talɩɔ 'cin, 'lɩsaa 'la gbʋ a bhɩɔɔ 'lɛ 'kwlɩ bha? Nʋnʋgbɩ 'nanɩ ɔ wlʋʋn 'lɛ cɩ nʋda. 7‑Ghɛɛ, ŋaazɩnyaa, a ‑ya maasɔ ‑kʋ ka sa 'lʋkʋlʋkʋ 'nyɩ daa a ‑walɩ 'lɛ na, a cɩ mino, a cɩ maa 'nanɩ nʋ. ‑Ma ‑amʋ, a 'taan 'lʋkʋlʋkʋ ‑ka. 8Ɔla saa ɔ cɩa 'lɛ mino na, sɛɛ ɔ ya 'lɛ nʋ. Ɔ ya 'kʋklʋʋn pʋ, ɔ ya 'na 'nyɛkɛa ‑asʋnbanyɩ 'kʋ 'pa 'fɩɔn, ɛla ‑gluuzʋdaa 'ka ŋeni. 9N solui anyɩ, ɩ ‑glɩ ‑nʋawlɛ, ‑laagɔzɔnbhuoa, daa ‑tɛtɛa Dɩnanɩa* cɩ 'ka 'lɛ ‑sɔɔ na, ɩmɩa ŋlɔɔ ‑naa ya 'lɛ nʋ na, ma cɩ 'kɩɩ 'dɩkʋsalɩ, ɔla luolilɩɛ 'la gbʋ.»
Ma ya Zozii 'pɛlʋ zʋ
(Mat 26.14-16; Luk 22.3-6)
10Zuda Iskalɩɔtʋ, 'kʋgba ‑mɔsɔa nɩkpaan bhlo, ɔ ya ‑teyiyinyaa tocɩa 'bhlɩ mʋ le ɔ 'ka Zozii ‑sa. 11Daa ma 'nu 'lɛ dɩɩ ‑naa na, ma ya ‑pɔpʋɛ nʋ 'nyɩ ma ya zʋ le ma cɩa 'mɔɔ 'dala 'nyɩ. 'Nyɩ Zuda 'matɩanɩa saa ɔ cɩ 'kaa 'mɔɔ 'lɛ ‑sasalɩ na.
Geyliinwlʋfɛtlɩa 'la bhɔsʋalɩɛ
(Mat 26.17-19; Luk 22.7-13)
12'Flawia ‑ɩ 'ta 'lɛ 'zɩɩn* ‑ka na 'la 'fɛtlɩa 'la ‑bɛka clɩɩa 'kʋ, daa ma bhlaa 'lɛ geyliinwlʋfɛtlɩa* 'la 'bhlabhlɛa na, Zozii 'la gɩlɩnyaa* yɔɔ 'cla lebhe: «'Ndagbazɩ ‑n ‑waa 'lɛ lebhe ‑a mʋ, ‑a bhɔsʋalɩa geyliinwlʋfɛtlɩa ɩya ‑n kɩɩ li bha?» 13Ɔ ya ɔla gɩlɩnya ‑mɔsɔ lobhu 'nyɩ ɔ ya maa 'cla lebhe: «A ble 'dua nɩkplaan, a ‑ya nclɔɔ bhlo cɩ 'ka 'cɩlɩ, ɔ bhɛɛ 'nyukpala. A gɩlɩɔ 14ɩya 'slea nɩkplaan ɔ cɩ 'ka 'lɛ ble na, a 'cla 'sletoa lebhe: Canyɔa nabhe: 'Nda ‑palʋa ‑zɔan n ‑ya 'na gɩlɩnyaa cɩ 'ka 'lɛ geyliinwlʋfɛtlɩa 'la nyɩa lili na, ‑kʋlʋa 'lɛ bha? 15Ɔ cɩ 'ka anyɩ 'wlukupalʋa da pala, ʋ ‑lɛlɩɔ neen, lɩɩa ‑tɛtɛa ‑kʋʋ nɩkplaan 'kplookʋ. 'Yɛpɩ a cɩ 'ka 'lɛ ‑ala bhɔsʋalɩɛa nʋnʋ.» 16Gɩlɩnyaa ya mʋ. Ma ya 'dua nɩkplaan ble. Ma ya ɩmɩa 'fɩan, saa ɔ solua 'lɛ maa na, 'lɩ 'nyɩ ma ya geyliinwlʋfɛtlɩa bhɔsʋa.
Zozii la 'pɛlʋzʋnyɔa ‑kʋmʋ 'tlɔnblɩa 'kʋ
(Mat 26.20-25; Luk 22.21-23; Zan 13.21-26)
17'Ylʋ mʋ 'lɛ na, Zozii ‑ya 'kʋgba ‑mɔsɔa ya ci. 18Daa ma ‑kʋa 'lɛ 'tlɔnblɩ 'kʋ na, Zozii ya 'cla lebhe: «N solui anyɩ, ɩ ‑glɩ ‑nʋawlɛ, anyɩ sidiin, ɔmɔa n ‑yɔɔsɔ lili 'lɛ dabhlo na, ɔ cɩ 'kaan 'pɛlʋzʋ.» 19Ma ya ‑cʋʋ 'plɩ 'nyɩ ma claa 'mɔɔ neen bhloonbhloon lebhe: «‑Amʋ bha?» 20Ɔ ya maa 'cla lebhe: «Anyɩa, 'Kʋgba ‑mɔsɔa nɩkplaan bhlo, ɔmɔa n ‑yɔɔsɔ falɩ 'lɛ ‑dakɔa nɩkplaan sɔ nebhlo na. 21‑Ghɛɛ, saa ɩ ‑zieo 'lɛ Nclɔɔa 'Cʋa* 'la 'sasʋʋn na, sɛ ɔ cɩ 'ka 'lɛ 'ku, ‑ma nclɔɔa ‑ɔ ‑cɩ ka 'lɛ Nclɔɔa 'Cʋa 'pɛlʋ zʋ na, ‑muunzue yɔɔ bho. Ɩ nanɩa 'dɛ 'la nclɔɔa 'la da lebhe ɔ 'la ‑valɩɔa!»
‑Kplɔkplɔ nyɩa
(Mat 26.26-29; Luk 22.15-20; 1 Kolt 11.23-26)
22Daa ma ‑kʋ 'lɛ lida na, Zozii ya 'flawo 'ma, ɔ ya Laagɔ bhɔlʋ, ɔ yʋʋ 'kleendɩ, ɔ yʋʋ maa 'nyɩ, 'nyɩ ɔ ya maa 'cla lebhe: «A 'ma, ‑anʋ ‑naa ʋ ‑glɩ 'na 'nyɛkɛa.» 23Ɔ ya ‑awlɛ ‑kɔbhɛ 'ma, ɔ ya Laagɔ bhɔlʋ, ɔ yɛɛ maa 'nyɩ, 'nyɩ maa 'fɩan ya 'mla. 24'Nyɩ ɔ ya maa 'cla lebhe: «Ʋmʋ ‑naa, ʋ ‑glɩ 'na ‑dolua, mɛnʋdolua ‑ʋ 'kɔsɔ 'lɛ sa ncaabhutukpa 'la gbʋ na. 25N solui anyɩ, ɩ ‑glɩ ‑nʋawlɛ, 'n cɩ 'ta kɩnɩ ‑diinvɛɛn 'mla ‑aan ɩya clɩɩa 'kʋa n cɩ 'ka 'lɛ ɛla ‑lɩɩlelea, 'yɛpɩ Laagɔ 'la Nyɩbhɛlɩdua* nɩkplaan 'mlanɩ na, ɩ 'ka ŋeni.»
Pɩɛlɩ cɩ 'ka Zozii ‑blɔ
(Mat 26.30-35; Luk 22.31-34; Zan 13.36-38)
26Daa ma bhɩalɩ 'lɛ bhlɩlɩɛ na, Zozii ɩya ɔla gɩlɩnyaa* ya ‑zɔnwlʋ 'nyɩ ma ya ‑Olivʋsikikea 'wlu mʋ. 27Zozii ya maa 'cla lebhe: «Anyɩa 'fɩan a cɩ 'ka bhli, sa ɩ ‑zieo lebhe: N cɩ 'ka mlakpanyɔa 'bhla ɩya 'bhlabhlɩa 'ka dlolu. 28‑Ma daa n cɩ 'ka 'lɛ 'kwɩɩnkʋbho na, n cɩ 'ka 'kʋklʋʋn pʋ, 'yɛpɩ Galilee.» 29Pɩɛlɩ yɔɔ 'cla lebhe: «Ka maa ‑tɛtɛa ‑ka bhli 'titio na, ‑amʋ bhlogbɩɩ ‑tɛɛ 'nyɩ ‑ɔ 'tɛɛ ‑kʋmʋ.» 30Zozii yɔɔ 'cla lebhe: «N soluo, ɩ ‑glɩ ‑nʋawlɛ, ‑mɔ, ‑yaka, dobheni ‑naa 'titi, 'fɩɔn ‑gʋgɔ 'ka 'lɛ dɩ ‑mɔsɔ 'palɩ na, ‑n ‑cɩ kaan dɩ ‑mɔta ‑blɔlʋ.» 31‑Ma, ɔmɔ ɔ 'kpafɩalɩa wɔɔnyɩtʋa 'kʋ 'nyɩ ɔ claa lebhe: «Ka ɩ ‑ka ‑kʋ lebhe n ‑yɔɔsɔ 'ku 'titio na, ‑wɔɔ, n cɩ 'tɔɔ ‑blɔ.» 'Nyɩ maa 'fɩan nyɩtɛa sɛɛ bhlogbɩɩ.
Zozii ‑kʋ Zɛtɩsemanii, ɔ bhibhie
(Mat 26.36-46; Luk 22.39-46)
32Zozii ɩya ɔla gɩlɩnyaa* ya daa ma la 'lɛ Zɛtɩsemanii na ŋeni 'nyɩ ɔ ya maa 'cla lebhe: «A kʋ ‑da sa, n 'ka bhibhiekan mʋ.» 33Ɔ ya Pɩɛlɩ, Zakɩ ɩya Zaan famʋ. Ŋanɔ ɩya pɔɔvʋ 'taa 'mɔɔ 'nanɩ ‑ka. 34Ɔ ya maa 'cla lebhe: «Cɩɩnkalɔa ‑ʋ ‑kʋʋn 'lɛ nɩkplaan na, ʋ faan 'kwɩɩn. A kʋ ‑da ɩya a bhla ‑zeli.» 35Ɔ ya 'pɛpɛ 'kʋklʋʋn mʋ, ɔ ya 'klʋ sagblii 'nyɩ ɔ bhibhiea le ka ɩ ‑ka ‑kʋ lebhe ɩ cɩa sɛɛ 'plɩ na, 'naa 'kwlɩbhɩɛ ‑naa tlʋbhalɩa 'mɔɔ cɩ da. 36Ɔ claa lebhe: «Aba! To, ‑n ‑glɩ ‑tɛtɛa 'fɩan 'la minonyɔ, tlʋbhalɩɩn ‑kɔbhɛɛ ‑naa cɩ da! 'Bhlɩmɔɔn ‑n 'ta ‑amʋ 'na saa n ‑wa 'lɛ naa, ‑ma ‑mɔɔ ‑naa saa ‑n ‑wa 'lɛ na.» 37Daa ɔ cɔlɔ 'lɛ na, gɩlɩnyaa ‑mɔtaa ŋɔmʋa. Ɔ ya Pɩɛlɩ 'cla lebhe: «Simɔɔn, ka ‑n ŋɔmʋ 'lɛ bha? ‑N 'ta 'ŋwacɩwlu 'bhebhe nɩkplaan ‑bɛlɩɛ mino bha? 38A 'la ŋɔmʋa, ‑ma a bhibhie, a 'la kasɛ gbɩɩnclalɩɛn bhlili. 'Wugoa yee 'tɛtɩ 'kʋ, ‑ma 'nyɛkɛa 'taan 'tɛ.» 39Ɔ ya ‑awlɛ maa cɩɩnwlʋlʋ 'nyɩ ɔ ya bhibhiea ‑sakasaka nʋ. 40Ɔ ya ‑awlɛ ci 'nyɩ ɔ ya maa claan ŋeni, sa mala 'cia yaanɩa 'kʋwɔbha na. 'Nyɩ maa 'lɩ 'taa wɔlɩa 'titia ma 'kaa 'mɔɔ 'lɛ solu na. 41Ɔ ya ‑mɔtada ci, ɔ ya maa 'cla lebhe: «A gɩ 'kʋ a ŋɔmʋ ɩya a nyɔkwɛnɩ! Ɩ ya 'wluko. 'Ŋwacɩa ya ŋeni: 'Lɩka Nclɔɔa 'Cʋa*, ma yɔɔ nyinyinʋnya wlɩɩn 'pɛlʋzʋlʋ! 42A ‑bho 'kʋ! ‑A 'plɩ ‑a mʋ! 'Lɩka, 'na 'pɛlʋzʋnyɔa ya ci.»
Ma ya Zozii 'kʋbhli
(Mat 26.47-56; Luk 22.47-53; Zan 18.2-12)
43Wɔlɩa ‑kʋ kaa Zozii neen 'nyɩ Zuda, 'kʋgba ‑mɔsɔa nɩkplaan bhlo ɔya ncaakpaa, ‑teyiyinyaa tocɩa, ‑jlɩmaazienyaa* ɩya ncaakpasɩa lobhu 'lɛ na, maya ‑banjlɛtɩcɩ ɩya sikli ya 'lɛ futo. 44Ɔmɔa ‑ɔ ‑saa 'mɔɔ 'lɛ na, ɔya maasɔ yaa cibhlilida bhlo zʋ, ɔ ya 'cla lebhe: «Ɔmɔa n cɩ 'ka 'lɛ ‑kpacɩ cɩ ŋʋŋɔnʋ na, ɔmɔ ‑ɔ ‑kʋ 'lɛ 'dɛ. A bhlio 'kʋ, a klɔɔ kpaan ɩya a ‑yɔɔsɔ mʋ.» 45Zuda ŋeni 'lɛ ‑jaa na, ɔ ya Zozii 'bɩɩnmʋnʋ 'nyɩ ɔ yɔɔ 'cla lebhe: «Canyɔ!» 'Nyɩ ɔ yɔɔ ‑kpacɩ cɩ ŋʋŋɔnʋ. 46Ma yɔɔ 'kʋbhli. 47Maa ‑ɔ ‑kʋmʋa 'lɛ 'dɛ na, maa sidiin 'la bhlo ya ɔla lɛtɛa tɩkpaan ‑sa, ɔ ya ‑teyiyinyɔ ‑kpasaa 'la lobhocoa 'kʋpa 'nyɩ ɔ yɔɔ 'nyukwli 'kʋsa. 48Zozii ya wɔɔnyɩtʋ 'ma 'nyɩ ɔ ya maa 'cla lebhe: «Aya ‑banjlɛtɩcɩ ɩya si kli yaan 'kʋbhlikan ci le saa n ‑glɩ 'lɛ ncaabhlanyɔ na. 49Clɩɩa 'fɩan, n ‑kʋa anyɩ sidiin, 'yɛpɩ Laagɔpaakadiea* ‑zɔn 'nyɩ n caa, a 'taan 'dɛ 'kʋbhlili. ‑Ma ka ɩ plɩ 'lɛ sɛɛ le Zieziewɔlɩa 'ka 'kʋglalɩ.» 50Gɩlɩnyaa* 'fɩan yɔɔ 'ciindlolu 'nyɩ nclɔɔ nclɔɔ ya ɔla da 'manɩ. 51Nyɩgbɩɔ bhlo, ɔ ‑paa lokwi 'taatɛ 'kʋ, ɔ gɩlɩa 'mɔɔ. Ma yɔɔ 'nylugolu, 52‑ma ɔ ya lokwia te 'nyɩ 'ɔ ‑lɩɩkplawɩɩa ya 'gu.
Zozii ‑kʋ 'tɩtɩplajlea sidiin
(Mat 26.57-58; Luk 22.54-55,63-71; Zan 18.13-15)
53Ma ya Zozii ‑teyiyinyɔ kpasaa ‑deliin fa. ‑Teyiyinyaa tocɩa, ncaakpasɩa ɩya ‑jlɩmaazienyaa* 'fɩan ya 'wluwlalɩ. 54Pɩɛlɩ ‑kʋa 'koonkoon, ɔ yɔɔ gɩlɩ ‑aan ‑teyiyinyɔ ‑kpasaa 'bhisleen. Ɔya 'sojaa ‑kʋa sa 'nyɩ ɔ wɔlɔa ‑kosu. 55‑Teyiyinyaa tocɩa ɩya Zifʋnyaa* 'la 'tɩtɩplakandea 'fɩan 'matɩa ‑danʋfʋɛliliea ma cɩ 'kaa 'lɛ 'kʋplɩlɩ ɩya ma 'kaa 'lɛ Zozii 'bhla na, ‑ma 'ma 'lɩ 'taa 'mɩɩ. 56Sa ncaabhutukpa plea 'mɔɔ wɔlɩ, ‑ma mala niwɔlɩa 'taa bhlo ‑glɩ. 57Bhloonbhloon bhoa 'kʋ le ma kaa 'mɔɔ wɔlɩ ple, ma claa lebhe: 58«‑A yɔɔ neen 'nu, ɔ ya 'cla lebhe: ‑Amʋ, n cɩ Laagɔpaakadie ‑naa, ‑ʋ ‑glɩ 'lɛ ncɛlɩ 'la 'slaslapalʋ na, gbɔlʋ 'nyɩ clɩɩ ‑mɔta ‑gbaaglɩɩn n cɩ ʋmʋa ‑ʋ 'ta 'lɛ ncɛlɩ 'la 'slaslanaanʋ ‑glɩ na, 'sla.» 59‑Ma, ɩmɩ ‑naa 'kʋ 'titio, ma 'taa wɔɔnebhlo ‑ka. 60'Tɩtɩplajleea sidiin, ‑teyiyinyɔ ‑kpasaa ya 'kʋbho 'nyɩ ɔ ya Zozii neencla lebhe: «Wɔlɩa ncɛlɩ ‑naa nyɩtɛlɩɔ 'lɛ cɩ na, ‑n ‑sa 'tɩɩ bɩ ‑ylɛylɛ bha?» 61‑Ma ɔmɔ ɔ ‑kʋa 'cɩɩ, 'ɔ ‑sa 'taa ne ‑ylɛylɛ. ‑Teyiyinyɔ ‑kpasaa ya ‑awlɛɔ neencla lebhe: «‑Mɔ glɩ 'lɛ Laagɔ 'la ‑Sasanyɔa* bha? Laagɔa ‑a wo 'lɛ ‑evli na, 'la 'Cʋa bha?» 62Zozii yɔɔ 'cla lebhe: «‑Ghɛɛ, n ‑glɩɔ. 'Nyɩ a cɩ 'ka Nclɔɔa 'Cʋa* 'lɩ ɩya ɔ 'ka 'Tɛtɩa 'fɩan Toa 'lipasɔ 'kʋ sakʋ ɩya ɔ 'ka 'nyukplia nɩkplaan cili.» 63‑Teyiyinyɔ ‑kpasaa ya ɔla lokua ɔcɩ cɩ 'ŋatɩlɩ 'nyɩ ɔ ya 'cla lebhe: «'Nda 'la ‑danʋfʋɛsaa ‑a 'matɩ ‑awlɛ 'lɛ bha? 64A ya saa ɔ vla 'lɛ Laagɔ na 'lɩ. Na, a nabhe 'lɩsaa bha?» Maa 'fɩan ya 'cla lebhe ɔ ‑ya 'kwɩ ‑tɛɛ ‑fata. 65Ncɛlɩ ‑zlʋsaasa, paa 'mɔɔ ‑daadʋ 'kʋ, ma gʋa 'mɔɔ 'ci 'kʋ, ma slaa 'mɔɔ ‑dʋkɔlɩ 'nyɩ ma clɔɔ lebhe: «Nʋ Laagɔnekʋnyɩtɛnyɔ* 'bhisa, sla ka ɔmɔa ‑ɔ bhlɔɔ 'lɛ na 'ŋlɩ.» 'Nyɩ 'sojaa wlɩɩn bhlilimlɩɩn, ciin 'sɛpɩɛ ‑tɛɛ ma tlɔɔ 'klʋ.
Pɩɛlɩ ya Zozii ‑blɔ
(Mat 26.69-75; Luk 22.56-62; Zan 18.17,25-27)
66Daa Pɩɛlɩ ‑kʋa 'lɛ ‑zɔan, 'yɛpɩ 'slea nɩkplaan na, ‑teyiyinyɔ kpasaa 'la lobhoŋlɔ bhlo ya ci. 67Daa ɔ 'lɩ 'lɛ Pɩɛlɩ ‑kosuwɔlɔdaa na, ɔ yɔɔ 'ciinkope 'nyɩ ɔ yɔɔ 'cla lebhe: «‑Mɔɔ ‑ma, ‑n gɩlɩmʋa Zozii, Nazalɛtɩnyɔa.» 68‑Ma Pɩɛlɩ ya cɩcɛlɩ, ɔ ya 'cla lebhe: «Wɔlɩa ‑n ‑nana ‑n ka 'lɛ 'kʋbhli na, n 'tɩɩ 'wlu ‑ci 'nyɩ n 'nu 'tɩɩ ‑zɔn.» 'Nyɩ ɔ ya 'dɛ 'wlʋ, ɔ ya 'sligbinea 'kʋ mʋ. 69Lobhoŋlɔa ya ‑awlɛɔ 'lɩ 'nyɩ ɔ yaa maa ‑ɔ ‑kʋa 'lɛ 'dɛ na, 'cla lebhe: «‑Anɔ ‑naa, ɔ ‑kʋmʋ maa sidiin.» 70‑Ma ɔ ya ‑awlɛ cɩcɛlɩ. Ɩ nɩɩ 'kaan 'lɛ bɔ na, maa ‑ɔ ‑kʋa 'lɛ 'dɛ na, ma ya ‑awlɛɔ 'cla lebhe: «‑Zaagbʋsa ‑n ‑glɩmʋ maa sidiin 'la bhlo! 'Nyɩ ‑awlɛ, ‑n ‑glɩ Galileenyɔ.» 71‑Ma Pɩɛlɩ ya zligolɩɛ bhɔ 'nyɩ ɔ claa lebhe: «Nclɔɔa wɔlɩa a na a nyɩtɛ 'lɛ na, n nabhe n 'tɔɔ ‑ci.» 72'Kplookʋ, ‑mɔsɔda, ‑gʋgɔ ya 'pa. 'Nyɩ Pɩɛlɩ ya wɔlɩa Zozii solua 'mɔɔ 'lɛ na luoli: «'Fɩɔn ‑gʋgɔ 'ka 'lɛ dɩ ‑mɔsɔ 'palɩ na, ‑n cɩ ka dɩ ‑mɔta cɩcɛlɩ lebhe ‑n 'taan ‑ci.» Pɩɛlɩ ya ‑zɔnwlʋ sɔmɩ sɔmɩɩn, 'nyɩ ɔ ya 'yɛpɩ 'nʋgbʋ zʋ.
Currently Selected:
Mak 14: NTLD13
Highlight
Share
Copy
Want to have your highlights saved across all your devices? Sign up or sign in
Dida New Testament © Bible Society of Côte d'Ivoire, 2013.