Luk 3
3
'Nyuwluzʋnyɔ Zaan 'la ‑laagɔlobholia
(Mat 3.1-6; Mak 1.2-6; Zan 1.19-23)
1‑Kwleto Tibɛlɩ 'la ‑kwleliea 'la 'kʋgba ‑ngbi lioa nɩkplaan, Pɔnsʋ Pilatɩ ‑glɩa Zudeebhlɩa 'kʋ 'la goonvla, Ewlɔdʋ ‑kwlea Galileebhlɩa, ɔ bholi Filipʋ ‑kwlea Itulee ɩya Tlakonitibhlɩa, Lizanɩasɩ ‑kwlea Abilɛnɩbhlɩa, 2'nyɩ Anɩ ɩya Kayifʋ ‑glɩa 'lɛ ‑teyiyinyakpasɩ. 'Dɛ 'la 'bhlɛsʋa nɩkplaan, Laagɔ ya Zakalii ‑yowli Zaan solu, 'yɛpɩ 'pʋpʋa nɩkplaan. 3Zaan 'plɩlɩa Zludɛɛnnyidɔlʋa 'la 'bhlɩa ‑tɛtɛa 'kʋ 'nyɩ ɔ nyɩtea kwlacalalɩɛ 'la 'nyuwluzʋlɩɛa ‑ɩ lamʋ 'lɛ nyinyivalɩɛ na ɩla cɩa wɔlɩ. 4Saa ɩ ‑zieo 'lɛ Laagɔnekʋnyɩtɛnyɔ* Izayii 'la ‑afluwaa nɩkplaan lebhe:
‑Blɩɩzɔn bhlo ‑gaan 'pʋpʋa nɩkplaan,
ʋ cla lebhe:
A bhɔsʋa ‑Kwlenyɔ 'la ‑gugwiea
A ‑sɔɔ ‑gugoa ‑ɩ 'nylugolu 'lɛ 'kʋ na!
5 ‑Gbaazlɩa ‑tɛtɛa cɩ 'ka ‑suo,
ma cɩ 'ka 'kiki 'kadɩa ɩya 'kiki cʋa ‑tɛtɛa wla,
‑gugoa ‑ɩ ‑cɩcɔɔ 'lɛ na, ɩ cɩ 'kʋnylugoluo,
‑gugonyinyia ‑tɛtɛa cɩ 'kʋwlʋlʋ,
6 ɩya ncɛlɩa ‑tɛtɛa 'ka Laagɔ 'la gbʋʋnsalɩɛa 'lɩ!
7Ncaabhutukpa cia Zaan 'bhlɩ le ɔ 'kaa maa 'nyuwluzʋ. Ɔ claa maa lebhe: «Kpaclɩlɔlʋnyanyɩ! ‑Ɔ caa 'lɛ anyɩ le a 'gulu Laagɔ 'la dɔgbɛa ‑ɛ ci 'lɛ 'yɛpɩ na bha? 8A tlʋnɩ 'caa ‑a pala 'lɛ lebhe a ya kaci na, ɩya a 'la 'cla acɩ lebhe: ‑Anyɩ, ‑a too ‑glɩ 'lɛ Ablaamʋ. Sa n solu anyɩ lebhe cɔkʋa a ‑jlɛ 'lɛ ‑da na, Laagɔ cɩ mino 'nyɩ ɔ cɩɩ Ablaamʋ 'la 'cuo ple. 9‑Dɔbhɛa ‑nɛɔ tooto le ɛ 'ka sɩa 'la ‑sikpliia 'dɩ. Su 'tʋtʋʋntʋa ‑ʋ cɩ 'ta 'lɛ 'ca 'nana tlʋ na, ʋ cɩ ‑dɩɔ 'nyɩ ʋ cɩ ‑kosuun ‑pɔɔ.»
10Na, ‑alawleea ya Zaan neencla lebhe: «'Lɩsaa ‑a ‑cɩ kaa 'lɛ nʋ bha?» 11Ɔ ya maa neenŋonu lebhe: «Nclɔɔ ‑ɔ ‑ka loku ‑mɔsɔ ‑ka na, 'naa ɔ 'nyɩmʋ ɔmɔa ‑ɔ 'ta 'lɛ ‑ka na. Nclɔɔ ‑ɔ ‑ka nyɩ ‑ka na, 'naa ɔ nʋmʋ sɛɛ bhlogbɩɩ.»
12‑Lapooclanyaa ‑ma, ya cimʋ le ɔ 'ka maa 'nyuwluzʋ, 'nyɩ ma yɔɔ neencla lebhe: «Canyɔ, 'lɩsaa ‑a ‑cɩ kaa 'lɛ nʋ bha?» 13Zaan ya maa 'cla lebhe: «Dlua ma 'dɩ 'lɛ na, a 'la palɩʋ 'kʋ.»
14'Sojanya ‑ma, yɔɔ neencla lebhe: «'Nyɩ ‑anyɩ, 'lɩsaa ‑a ‑cɩ kaa 'lɛ nʋ bha?» Ɔ yaa maa 'cla lebhe: «A 'la 'maa ‑bhɩakpa, ‑aana a 'la gɩa nclɔɔ yooyowɔlɩ 'kʋ ɩya a 'la lio 'dala. ‑Ma 'naa ala dluuplʋlɩɛ bhlili anyɩ pɔlɛɛn.»
Zaan nyɩtɛ ɔmɔa ‑ɔ ‑cɩ 'ka 'lɛ ci na 'la wɔlɩ
(Mat 3.11-12; Mak 1.7-8; Zan 1.24-28)
15Ncɛlɩa 'fɩan ‑bɛa 'nyɩ ma claa macɩ Zaan 'la wɔlɩa neen lebhe: «‑N 'ta ɔmɔ ‑ɔ 'ta sɛ 'lɛ Laagɔ 'la ‑Sasanyɔa* ‑glɩ bha?» 16Na, Zaan ya maa 'fɩan 'cla lebhe: «‑Amʋ, nyuu n zʋ 'lɛ anyɩ 'nyu 'wlu, ‑ma ɔmɔa ci 'lɛ 'yɛpɩ na, ɔ ‑ka 'tɛtɩ ɔ ziin 'kʋ, 'nyɩ n 'ta 'kʋŋwa le n ‑blulu ɔla ‑gbanbʋɩa 'la 'bhlia. Ɔmɔ, ‑Kplɔkplɔ ‑Wugoa* ɩya ‑kosu nɩkplaan ɔ ‑cɩ 'ka 'lɛ anyɩ 'nyu 'wlu zʋlʋ. 17Ɔ ‑ka ɔla bʋtɛa wlɩɩn le ɔ 'ka ɔla gologololɩɩa ma 'dɩ 'lɛ na pu, ɔ 'ka 'caa ‑gbogbu 'kʋ zʋ ɩya ɔ 'ka fɩfɩa ‑kosua ‑ʋ ŋomu 'ta 'lɛ na nɩkplaan 'pa.»
18'Lɩka wɔlɩ ‑naa ɩya ‑buunwɔlɩ ‑bhutukpa ɔ 'plɩlɩa 'lɛ 'kʋ 'nyɩ ɔ saa 'lɛ maa Dɩnanɩa* na.
Ewlɔdʋ Antipasɩ ya Zaan ‑palʋʋn 'pa
(Mat 14.3-4; Mak 6.17-18)
19Ewlɔdʋa ‑ɔ ‑kwlea 'lɛ Galileebhlia na, Zaan yɔɔ 'gesalɩ, ɔ bholi 'la 'ŋlɔa ma la 'lɛ Ewlodiadɩ, ɔ ‑salɩ 'lɛ ɩya wɔɔnyinyi ‑bhutukpaa ɔ nʋ na ɩla gbʋ. 20Ɩla leen ɔ ya ‑awlɛ wɔɔnyinyi bhlo nʋ. Ɔ ya gba ma ya Zaan ‑palʋʋn 'pa.
Zozii ya 'nyuwluzʋɔ
(Mat 3.13-17; Mak 1.9-11; Zan 1.29-34)
21Daa Zaan ‑kʋa 'lɛ ncɛlɩa 'fɩan 'nyu 'wlu zʋda na, ɔ ya Zozii ‑ma 'nyu 'wlu zʋmʋ. Na, daa Zozii ‑kʋa 'lɛ bhibhieda na, ‑laagɔɔn ya 'gbokalɩ, 22'nyɩ ‑Kplɔkplɔ ‑Wugoa* yɔɔ 'kʋ kwlili 'dablee 'bhisa. 'Kplookʋ, ‑blɩɩzɔn bhlo ya ‑laagɔɔn 'wlʋlʋ 'nyɩ ʋ ya 'cla lebhe: «‑Mɔ ‑glɩ 'lɛ 'na ‑wawacoa, ‑mɔ nɩkplaan n ‑zʋɔ 'lɛ 'na pɔlɛkʋmɛnɔa ‑tɛtɛa.»
Zozii ɔ tokadɔkadɔcɩa 'la 'ŋlɩ
(Mat 1.1-16)
23Zozii ɔ cɩa ‑sa liowli ‑glʋʋ ɩya 'kʋgba kalɩ, daa ɔ bhɔ 'lɛ Dɩnanɩa* ‑salɩɛ na. Ncɛlɩ gugua lebhe Zozɛfʋ 'la cʋʋ ɔ ‑glɩa 'lɛ. Zozɛfʋ ‑glɩ Ghelii 'la 'cʋ. 24Ghelii ‑glɩ Matatɩ 'la 'cʋ. Matatɩ ‑glɩ Levii 'la 'cʋ. Levii ‑glɩ Mɛlɩkii 'la 'cʋ. Mɛlɩkii ‑glɩ Zanayii 'la 'cʋ. Zanayii ‑glɩ Zozɛfʋ 'la 'cʋ. 25Zozɛfʋ ‑glɩ Matatɩasɩ 'la 'cʋ. Matatɩasɩ ‑glɩ Amɔsʋ 'la 'cʋ. Amɔsʋ ‑glɩ Nayumu 'la 'cʋ. Nayumu ‑glɩ Eslii ɔ 'cʋ. Eslii ‑glɩ Nagayii 'la 'cʋ. 26Nagayii ‑glɩ Maatɩ 'la 'cʋ. Maatɩ glɩ Matatɩasɩ 'la 'cʋ. Matatɩasɩ ‑glɩ Semeyini 'la 'cʋ. Semeyini ‑glɩ Zozɛkɩ 'la 'cʋ. Zozɛkɩ glɩ Zoda 'la 'cʋ. 27Zoda ‑glɩ Yoananɩ 'la 'cʋ. Yoananɩ ‑glɩ Ghleza 'la 'cʋ. Ghleza ‑glɩ Zolobabɛlɩ 'la 'cʋ. Zolobabɛlɩ ‑glɩ Keasɩɛlɩ 'la 'cʋ. Keasɩɛlɩ ‑glɩ Neli 'la 'cʋ. 28Neli ‑glɩ Mɛlɩkii 'la 'cʋ. Mɛlɩkii ‑glɩ Adi 'la 'cʋ, Adi ‑glɩ Kozamʋ 'la 'cʋ. Kozamʋ ‑glɩ Elimadamʋ 'la 'cʋ. Elimadamʋ ‑glɩ Ɛlɩ 'la 'cʋ. 29Ɛlɩ ‑glɩ Zozii 'la 'cʋ. Zozii ‑glɩ Eliezɛlɩ 'la 'cʋ. Eliezɛlɩ ‑glɩ Zolimu 'la 'cʋ. Zolimu ‑glɩ Matatɩ 'la 'cʋ. Matatɩ ‑glɩ Levii 'la 'cʋ. 30Levii ‑glɩ Simeyɔɔn 'la 'cʋ. Simeyɔɔn ‑glɩ Zuda 'la 'cʋ. Zuda ‑glɩ Zozɛfʋ 'la 'cʋ. Zozɛfʋ ɔ ‑glɩ Zonamu 'la 'cʋ. Zonamu ‑glɩ Eliakimʋ 'la 'cʋ. 31Eliakimʋ ‑glɩ Meleya 'la 'cʋ. Meleya ‑glɩ Mena 'la 'cʋ. Mena ‑glɩ Matataa 'la 'cʋ. Matataa ‑glɩ Nataan 'la 'cʋ, Nataan ‑glɩ Daviti 'la 'cʋ. 32Daviti ‑glɩ Zesee 'la 'cʋ. Zesee ‑glɩ Obɛdɩ 'la 'cʋ. Obɛdɩ ‑glɩ Bozʋ 'la 'cʋ. Boozʋ ‑glɩ Salaa 'la 'cʋ. Salaa ‑glɩ Nasɔɔn 'la 'cʋ. 33Nasɔɔn ‑glɩ Aminadabʋ 'la 'cʋ. Aminadabʋ ‑glɩ Adimini 'la 'cʋ. Adimini ‑glɩ Anii 'la 'cʋ. Alinii ‑glɩ Ɛslɔɔn 'la 'cʋ. Ɛslɔɔn ‑glɩ Pelɛsɩ 'la 'cʋ. Pelɛsɩ ‑glɩ Zuda 'la 'cʋ. 34Zuda ‑glɩ Zakɔpʋ 'la 'cʋ. Zakɔpʋ ‑glɩ Izakɩ 'la 'cʋ. Izakɩ ‑glɩ Ablaamʋ 'la 'cʋ. Ablaamʋ ɔ ‑glɩ Telaa 'la 'cʋ. Telaa ‑glɩ Nawɔlʋ 'la 'cʋ. 35Nawɔlʋ ‑glɩ Seluku 'la 'cʋ. Seluku ‑glɩ Ghleyuu 'la 'cʋ. Ghleyuu ‑glɩ Pelɛgɩ 'la 'cʋ. Pelɛgɩ ‑glɩ Ebɛlɩ 'la 'cʋ. Ebɛlɩ ‑glɩ Kelaa 'la 'cʋ. 36Kelaa ‑glɩ Kenanɩ 'la 'cʋ. Kenanɩ ‑glɩ Apasadɩ 'la 'cʋ. Alɩpasadɩ ‑glɩ Sɛmʋ 'la 'cʋ. Sɛmʋ ‑glɩ Nowee 'la 'cʋ. Nowee ‑glɩ Lemɛkɩ 'la 'cʋ. 37Lemɛkɩ‑glɩ Matuzalɛmʋ 'la 'cʋ. Matuzalɛmʋ ‑glɩ Enɔkʋ 'la 'cʋ. Enɔkʋ ‑glɩ Yelɛdɩ 'la 'cʋ. Yelɛdɩ ‑glɩ Malaleyɛlɩ 'la 'cʋ. Malaleyɛlɩ ‑glɩ Kenanɩ 'la 'cʋ. 38Kenanɩ ‑glɩ Enɔsʋ 'la 'cʋ. Enɔsʋ ‑glɩ Sɛtɩ 'la 'cʋ. Sɛtɩ ‑glɩ Adaan 'la 'cʋ. Adaan ‑glɩ Laagɔ 'la 'cʋ.
Currently Selected:
Luk 3: NTLD13
Highlight
Share
Copy
Want to have your highlights saved across all your devices? Sign up or sign in
Dida New Testament © Bible Society of Côte d'Ivoire, 2013.