Luk 2
2
Ma ya Zozii valɩ
1'Dɛ 'la 'bhlɛsʋa nɩkplaan, ‑kwletoa ma laa 'lɛ Ogusu na, ɔ ya 'cla le ma zʋ ‑laagɔzɔn bhuo 'la ncɛlɩa ‑afluwaan. 2‑Afluwaanzʋlɩɛ ‑naa 'la ‑bɛkanaanɩa, 'bhlɛsʋa nɩkplaan Kilinusu ‑glɩa 'lɛ Siliibhlɩa 'kʋ 'la goonvla na, dɛ ma nʋa 'mɩɩ 'lɛ. 3Na, ncɛlɩa 'fɩan mʋa macɩ ‑afluwaan zʋkan, nclɔɔ nclɔɔ ɔ 'bhlɩ duku. 4Zozɛfʋ ‑ma, ɔ ya Galileebhlɩa 'la 'dua ma la 'lɛ Nazalɛtɩ na, 'kʋ 'wlʋ 'nyɩ ɔ ya Zudeebhlɩa 'kʋ, nyɩbhɛlʋ Daviti 'la valɩdua ma la 'lɛ Bɛtɩlɛmʋ na, 'kʋ mʋ, sa ɔ ‑glɩa ɔla 'lɔlʋa ɩya ɔla valɩnɩkplaa nɩkplaan 'la nclɔɔ na. 5Ɔ ya mʋ le ma 'kɔɔ 'yɛpɩ ‑afluwaan zʋlʋ, ɔya ɔ nʋŋlɔ Malii. 'Dɛ 'la daa Malii kaa nɩkpla.
6Na, daa ma kʋa 'lɛ 'yɛpɩ na, clɩɩa 'kʋa Malii 'kaa 'lɛ valɩ na, ɩ ya ŋeni. 7Ɔ ya ŋodico valɩ, ɔla ‑bɛkaco, ɔ yɔɔ lokwi cɩ gʋalɩ 'nyɩ ɔ yɔɔ mlaa 'la nɩkplaanlililʋʋ nɩkplaan pʋa, sa ma 'taa lowiea 'la 'kʋpladaa pʋda 'lɩ na.
'Bhlaandlee bhlo ya mlakpanya 'ciinfutolu
(Mat 2.1-15)
8Na, bhlɩɩ ‑naa bhlogbɩɩ 'kʋ 'la 'kwlɩa nɩkplaan, mlakpanya ‑kʋa 'yɛpɩ, 'nyɩ dobhe ma ‑bɛa 'lɛ mala mlaa. 9‑Kwlenyɔ 'la 'bhlaandlee* bhlo ya maa 'ciinfutolu, Laagɔ 'la 'klʋagbaa ya maa lelie didio 'nyɩ ŋanɔ ya maa pla. 10‑Ma 'bhlaandleea ya maa 'cla lebhe: «Ŋanɔ 'la 'bhlaa anyɩ, ‑ma ka n ci 'lɛ le n 'ka anyɩ dɩnanɩ bhlo ‑sa, ‑ɩ ‑cɩ ka 'lɛ ncɛlɩa 'fɩan pɔlɛ 'kʋ mɛma na. 11‑Yaka, Daviti 'la 'dua nɩkplaan, ma ya anyɩ gbʋʋnsanyɔ valɩ. Ɔmɔ ‑glɩ 'lɛ ‑Kwlenyɔ, Laagɔ 'la ‑Sasanyɔa*. 12'Lɩka ghledaa a cɩ 'ka 'lɛ 'ma ɩya a 'kɔɔ 'lɛ cibhlili na. A cɩ 'ka 'cilee 'lɩ, ɔ ‑gʋalɩɔ lokwi cɩ 'nyɩ ɔ ‑pʋʋ mla 'la nɩkplaanlililʋʋ nɩkplaan.»
13'Kplookʋ, 'bhlaandleecɩ ya ‑laagɔɔn 'wlʋlʋ, mala 'kpaa ya 'bhlaandleea didio, ma woa Laagɔ ‑evli 'nyɩ ma claa lebhe:
14«'Klʋagba ŋeni Laagɔ 'yɛpɩ ‑laagɔɔn 'koonko
ɩya pupue ŋeni ‑dʋdʋa 'kʋ 'la ncɛlɩa ɔ ‑wa 'lɛ na 'kʋ!»
Mlakpanyaa ya Bɛtɩlɛmʋ mʋ
15Daa 'bhlaandleecɩa* 'wlʋlʋ 'lɛ mlakpanyaa cɩɩn 'nyɩ ma cɔlɔ 'lɛ ‑laagɔɔn na, mlakpanyaa ya macɩ 'cla lebhe: «‑A ka Bɛtɩlɛmʋ mʋ ɩya ‑a ka ɩmɩa ‑ɩ 'plɩ 'lɛ, 'nyɩ ‑Kwlenyɔa gba 'lɛ ‑a cibhlili na 'lɩ.» 16Ma ya 'faanfan 'yɛpɩ mʋ 'nyɩ ma ya Malii, Zozɛfʋ ɩya 'cileloa 'lɩ, ɔ pʋa mla 'la nɩkplaanlililʋʋ nɩkplaan. 17Daa ma 'lɩ 'lɛ 'cileea na, ma ya ɔla wɔlɩa ma solua 'lɛ maa na, 'dɩ 'kʋ ‑salɩ. 18Maa 'fɩan ‑ɔ 'nua 'lɛ mlakpanyaa neen na, nikpoo ya maa sla. 19‑Ma Malii ‑zʋa wɔlɩ ‑naa ‑tɛtɛa pɔlɛɛn 'nyɩ ɔ 'matɩa ɩla ‑zɔn. 20Ɩla leen, mlakpanyaa ya cɔlɔ. Ma gbaa Laagɔ 'klʋ 'nyɩ ma woa 'mɔɔ ‑evli, sa ɩmɩa ‑tɛtɛa ma 'nu 'lɛ 'nyɩ mala 'ci 'lɩ 'lɛ na ɩya ɩmɩa 'bhlaandleea solua 'lɛ maa na, ɩ ‑glɩ bhlo.
Ma ya Zozii 'ŋlɩ zʋ
21‑Ngbata clɩɩa 'kʋ, daa ma 'ka 'lɛ 'cileea 'kʋdɩ na, maa yɔɔ Zozii la, 'ŋlɩa 'bhlaandleea* zʋa 'mɔɔ 'lɛ 'fɩɔn ma ya 'lɛ ɔla nɩkplaa 'ma na.
Ma ya Zozii Laagɔ ‑deliin ‑la
22Daa mala cɩkplɔlɩɛa 'la clɩɩa ŋeni 'lɛ na, Zozɛfʋ ɩya Malii ya 'cileea Zolizalɛmʋ famʋ le ma 'kɔɔ ‑Kwlenyɔa pala, saa Moyizi 'la ‑jlɩmaa bhli 'lɛ 'kʋ na. 23Sa, ɩ ‑zieo ‑Kwlenyɔa 'la ‑afluwaa nɩkplaan lebhe: ‑Bɛkacoa ‑tɛtɛa ɔ ‑glɩ 'lɛ ŋodico na, ɔ ‑glɩ ‑Kwlenyɔa 'nɔ, 24ɩya ma ka 'dablii ‑mɔsɔ ‑aan na 'kpaakpɩ ‑mɔsɔ 'bhla ɩya ma 'ka gʋgwla, saa ‑Kwlenyɔ 'la ‑afluwaa bhli 'lɛ 'kʋ na.
Simeyɔɔn ya Zozii 'la gbʋ Laagɔ bhɔlʋ
25Na, nclɔɔ bhlo ‑kʋa Zolizalɛmʋ ma laa 'mɔɔ Simeyɔɔn. Nclɔɔ ‑naa, ɔ ‑glɩa 'kʋnylugolunyɔ 'nyɩ ɔ zʋa Laagɔ. Ɔ ‑bɛa Izlayɛlɩnyaa* 'la gbʋʋnsalɩɛa 'nyɩ ‑Kplɔkplɔ ‑Wugoa* ʋ ‑kʋa 'mɔɔ 'kʋ. 26'Nyɩ ʋ ya 'mɔɔ tooto pala le ɔ 'ta ka ‑Kwlenyɔa 'la ‑Sasanyɔa 'ciinlɩ na, ɔ cɩ 'ta ka 'ku. 27Na, 'Wugoa ya gba 'nyɩ Simeyɔɔn Laagɔpaakadiea* ‑zɔn mʋ. 'Nyɩ daa Zozii 'la ‑lɩɩco ɔla valɩnyaa ‑lamʋɔ 'lɛ le ma 'kɔɔ ɩmɩa ‑jlɩmaa bhli 'lɛ 'kʋ na cɩ nʋ na, 28Simeyɔɔn yɔɔ 'ma, ɔ ya Laagɔ bhɔlʋ 'nyɩ ɔ ya 'cla lebhe:
29«‑Pɔtɔnʋ, ‑Kwlenyɔ, saa ‑n 'bhli 'lɛ 'kʋ na,
'talɩnɩ ‑naa lobhocoa 'ciin ɩya ɔ mʋnɩ pupueen.
30Sa 'na 'cia ya ‑naa gbʋʋnsalɩɛa 'lɩ,
31ɩmɩa ‑n bhɔsʋa 'lɛ 'lɔlɩa 'fɩan 'la 'klʋʋn na.
32Ɩ ‑glɩ ‑zelia ‑ɩ ‑cɩ kɔɔ 'lɛ 'la ncɛlɩa ‑ɔ 'tɔɔ 'lɛ ‑ci na pala na,
ɩya ‑naa 'lɔlʋa ‑ʋ ‑glɩ 'lɛ Izlayɛlɩ na 'la 'klʋagba.»
33'Cileea 'la cɩa wɔlɩa Simeyɔɔn nyɩtɛa 'lɛ ‑sa na, ɩ slaa ɔ to ɩya ɔ 'nɔ nikpoo. 34Simeyɔɔn ya maa 'nyupalɩ 'nyɩ ɔ ya Zozii nɔ Malii 'cla lebhe: «‑Naa 'cileea cɩ 'ka gba ɩya Izlayɛlɩbhlɩa 'kʋ, ncaabhutukpa 'ka bhli ɩya ncaabhutukpa 'ka 'kʋbho. Ɔ cɩ 'ka ghledaa, ma cɩ 'ka 'lɛ gbatlɩ mʋnʋ na 'plɩ, 35ɩya ‑mɔɔ 'titi, Malii cɩɩnkalɔ cɩ 'kɔɔ pɔlɛ 'ŋatɩ lesaa ma bhoɛ 'lɛ lɛtɛ na. 'Lɩka ‑sa wɔlɩa ncɛlɩ 'tɩtɔ 'lɛ mala pɔlɩa nɩkplaan na cɩ ka 'lɛ ‑zɔnwlʋ.»
Laagɔnekʋnyɩtɛŋlɔ Anɩ
36Laagɔnekʋnyɩtɛŋlɔ bhlo ‑kʋa, ma laa 'mɔɔ Anɩ, ɔ ‑glɩa Azɛɛ 'la 'lɔkpʋnyɔ Fanʋwɛlɩ ɔ ‑nyɔŋlɔ. Ɔ ya kplɩɩ plaa. Ɔya ɔ ŋuto ya sakʋ liowli ‑ngbɔɔsɔ 37'nyɩ ɔ ya 'lɛ 'kuzluŋlɔ 'plɩ. Na, ɔ ‑kʋnɩ sɛɛ ‑aan 'nyɩ ɔ ya 'lɛ liowli ‑gwlɩɩ ‑nmɔɔna ɩya ‑nmɔɔna 'lɩ. Ɔ ‑salɩ 'taa Laagɔpaakadiea* ‑vakɩ, bhlibhliylʋʋn ɩya zezezeliin ɔ gʋgwlaa Laagɔ, ‑zelizlolɩɛ ɩya bhibhili nɩkplaan. 38Na, ɔ ya 'dɛ 'la 'ŋwacɩa bhlogbɩɩ 'kʋ cili 'nyɩ ɔ ya Laagɔ ‑evliwolɩɛ bhɔ. Ɔ solua maa 'fɩan ‑ɔ ‑bɛa 'lɛ Zolizalɛmʋ 'la geyliinwlʋlɩɛ na, 'cileea 'la cɩa wɔlɩa.
Ma ya Nazalɛtɩ cɔlɔ
39Daa Zozii ma bhɩalɩ 'lɛ ‑tɛtɛa 'fɩan ‑Klwenyɔ 'la ‑jlɩmaa 'clalɩ 'lɛ na, nʋlɩɛ na, Zozɛfʋ ɩya Malii ma ya Galileebhlɩa 'kʋ, mala 'dua ʋ ‑glɩ 'lɛ Nazalɛtɩ na 'kʋ cɔlɔ.
40‑Ma ‑ɔ ‑glɩ 'lɛ 'cileea na, ɔ glɛa 'nyɩ ɔ 'tɛbhalɩa nɩkplaan, dɩgalɩ ‑yelia 'mɔɔ 'nyɩ Laagɔ 'la 'nyupalɩɛa ‑kʋa 'mɔɔ 'kʋ.
Zozɛfʋ ɩya Malii 'matɩ Zozii
41Lio 'fɩan nɩkplaan, Zozii 'la valɩnyaa mʋa Zolizalɛmʋ, Zifʋnyaa* 'la geyliinwlʋfɛtlɩa* 'kʋ. 42Saa mala ‑jlɩmaa bhli 'lɛ kʋ na,#2.42 Zifʋnyaa 'la ‑jlɩmaa a cla le gbazɩ 'cilee ‑ka liowli 'kʋgba ‑mɔsɔ 'lɩ na, ɔ yanɩ nclɔɔ 'plɩ. Na ɩ ‑fata le ɔ 'plɩlɩnɩ Laagɔ 'la ‑jlɩmaa 'kʋ. daa Zozii 'lɩ 'lɛ liowli 'kʋgba ‑mɔsɔ na, ma yɔɔ famʋ.
43Na, daa 'fɛtlɩa bhɩa 'lɛ, 'nyɩ ma ‑kʋ 'lɛ cɔlɔda na, Zozii ya Zolizalɛmʋ ‑to, ‑ma ɔla valɩnyaa 'ta sɛɛ cibhlili. 44Ma gugua le ɔ ‑kʋmʋa ma 'yea maya maasɔ bhlia 'lɛ ‑gugwiea na sidiin. Ma ya clɩɩ ‑totobhuo namʋ 'fɩɔn ma yɔɔ 'lɛ mala ncɛlɩ ɩya ma cibhlilinya sidiin 'matɩlɩɛ bhɔ. 45Ma 'tɔɔ 'lɛ 'lɩ na, ma ya Zolizalɛmʋ cɔlɔ 'nyɩ ma 'matɩa 'mɔɔ. 46Ɩla ‑mɔta ‑zelia, ma yɔɔ Laagɔpaakadiea* ‑zɔn 'lɩlɩ, ɔ kʋa ‑jlɩmaacanyaa sidiin sa, ɔ poa maa 'nyukwliin 'nyɩ ɔ claa maa neen. 47Maa 'fɩan ‑ɔ nua 'lɛ ɩmɩa ɔ nyɩtɛ 'lɛ na, dɩgalɩa nɩkplaan ɔ ŋonunua 'lɛ maa neen na ɩ slaa nikpoo. 48Daa ɔla ma 'lɩɔ 'lɛ na, nikpoo ya maa sla 'nyɩ ɔ 'nɔ yɔɔ 'cla lebhe: «'Na 'cʋ, 'lɩsaa 'la gbʋ ‑n nʋa 'lɛ ‑sa ‑anyɩ bha? Kopeka! N ‑ya ‑n to, pɔɔvʋ bhla 'lɛ ‑anyɩ 'nyɩ ‑a 'matɩɔ 'lɛ.» 49Ɔ ya maa 'cla lebhe: «Na, 'lɩsaa 'la gbʋ a 'matɩɩn 'lɛ bha? A 'ta sɛɛ ‑ci lebhe ɩ ‑fata le n kʋ n To 'la ‑palʋa ‑zɔn bha?» 50‑Ma maa, ma 'taa ɩmɩa ɔ solua 'lɛ maa na 'nu.
51Na ɩla leean, Zozii ‑ya maasɔ ya Nazalɛtɩ cɔlɔ. Ɔ zʋa maa 'nyɩ ɔ 'nɔ ‑zʋa wɔlɩ ‑naa ‑tɛtɛa ɔla pɔlɛa nɩkplaan sa. 52Zozii glɛlɩa dɩgalɩɩn, ɔ pʋa 'nyɩ Laagɔ ɩya ncɛlɩ ‑waa 'mɔɔ.
Currently Selected:
Luk 2: NTLD13
Highlight
Share
Copy
Want to have your highlights saved across all your devices? Sign up or sign in
Dida New Testament © Bible Society of Côte d'Ivoire, 2013.