Luk 4
4
Gɔzɛ ya Zozii gbɩɩncla
(Mat 4.1-11; Mak 1.12-13)
1‑Kplɔkplɔ ‑Wugoa* yeli 'lɛ Zozii na, ɔ ya Zludɛɛnnyidɔlʋa cɩ 'wlʋ nyɩ ʋ yɔɔ 'pʋpʋa nɩkplaan fa. 2Gɔzɛ yɔɔ 'yɛpɩ gbɩɩncla clɩɩ ‑gwlɩɩ ‑mɔsɔ. Clɩɩ ‑naa nɩkplaan, ɔ 'taa lʋʋ ‑ylɛylɛ li, 'nyɩ ɩ 'plɩ 'lɛ na ŋɔmʋ yɔɔ 'lɛ kla. 3Na, Gɔzɛ yɔɔ 'cla lebhe: «‑Mɔ ‑ka Laagɔ 'la 'Cʋa ‑glɩ na, 'cla cokwie ‑naa le ɛ kaci 'flawo.» 4Zozii yɛɛ 'cla lebhe: «Ɩ ‑zieo lebhe: ‑N 'ta 'flawo ‑tɛɛ nclɔɔ cɩ 'ta 'lɛ li ɩya ɔ 'ka 'kʋ.» 5Gɔzɛ ‑yɔɔsɔ ya koonko ‑gblaa, 'nyɩ ɛ yɔɔ ‑dʋdʋa 'kʋ 'la nyɩbhɛlɩdia ‑tɛtɛa pala 6'nyɩ ɛ yɔɔ 'cla lebhe: «N cɩ 'ka nyɩbhɛlɩdi ‑naa ‑tɛtɛa ɩya ɩla 'klʋagbaa ‑naa ‑kwleliea ‑zɔn zʋ. ‑Amʋ ma 'nyɩɩ 'lɛ, 'nyɩ n cɩ mino n cɩɩ ɔmɔa n ‑wa 'lɛ na 'nyɩ. 7Na ‑mɔ, ‑n kaan gʋgwla na, ɩmɩ ‑naa ‑tɛtɛa, ɩ cɩ ‑nanɩ 'plɩ.» 8Zozii yɛɛ 'cla lebhe: «Ɩ ‑zieo lebhe: ‑Kwlenyɔ ‑naa Laagɔ bhlo ‑n ‑cɩ ka 'lɛ gʋgwla ɩya ‑n ka ɔmɔ bhlogbɩɩ lobho.»
9Na, Gɔzɛ yɔɔ Zolizalɛmʋ famʋ, ɛ yɔɔ Laagɔpaakadiea* 'wlu ‑gbɛ 'nyɩ ɛ yɔɔ 'cla lebhe: «‑Mɔ ‑ka Laagɔ 'la 'Cʋa ‑glɩ na, 'talɩ ‑ncɩ 'cin ɩya ‑n bhli, 10sa ɩ ‑zieo lebhe Laagɔ cɩ 'ka ɔla 'bhlaandleecɩa* 'cla le ma 'lɩɔ 'klʋ. 11‑Awlɛ, ɩ ‑zieo lehbe: Ma cɩ 'kɔɔ bhɛ ɩya ‑naa kplea 'la ka sɛ cokwie gozo.» 12Zozii yɛɛ 'cla lebhe: «Ɩ ‑zieo lebhe ‑n cɩ 'ta ‑Kwlenyɔ, ‑naa Laagɔ, gbɩɩncla.»
13Na, Gɔzɛ cla 'lɛ Zozii gbɩɩn 'nyɩ ɛ bhɩalɩ na, ɛ yɔɔ cɩɩnwlʋlʋ 'nyɩ ɛ ‑bɛanɩa ‑buunclɩɩ.
Zozii ya Galilee cɔlɔ
(Mat 4.12-17; Mak 1.14-15; Zan 4.1-3,43-46)
14Ɩla leen Zozii ya Galileebhlɩa 'kʋ cɔlɔ, ‑Kplɔkplɔ ‑Wugoa* 'la 'tɛtɩa ‑yelia 'mɔɔ 'nyɩ ɔla 'ŋlɩa ya 'bhlɩa ‑tɛtɛa 'kʋ dlolu. 15Ɔ calɩa Zifʋnyaa* 'la bhibhiepalɩa* ‑zɔn 'nyɩ ncɛlɩa 'fɩan nyɩtɛa ɔla wɔɔnanɩ. 16Zozii ya Nazalɛtɩ mʋ, 'dua 'kʋa ma lolulua 'mɔɔ 'lɛ na. Zifʋnyaa 'la nyɔkɛclɩɩa* 'kʋ, ɔ ya mala 'la bhibhiepalʋa ‑zɔn ble, saa ɔ nʋa ‑azla 'lɛ na. Ɔ ya 'kʋbho le ɔ 'kaa Zieziewɔlɩa* zɛlɩ 17'nyɩ ma yɔɔ Laagɔnekʋnyɩtɛnyɔ* Izayii 'la ‑afluwaa 'nyɩnɩ. Ɔ yaa ‑blulu 'nyɩ daa ɔ bhlili 'lɛ 'kʋ na, ɩ ‑zieo lebhe:
18 Laagɔ 'la 'Wugoa ‑kʋʋn 'kʋ.
Ɔ yaan ‑sa
le n 'ka ŋaazɩnya Dɩnanɩa* ‑sa.
Ɔ yaan lobhu
le n 'ka ‑palʋʋnpapanya solu
lebhe ma cɩ 'ka ‑zɔnwlʋ,
ɩya 'citutunya 'ka salɩ!
Ɔ yaan lobhu
le n 'ka maa ma sa 'lɛ
gbaylɩ na ‑ncɩkalɩɛ 'nyɩ,
19 ɩya n 'ka anyɩ Laagɔ 'la ŋaazɩɩnlɩlioa 'la 'dɩa ‑sa!
20Zozii ya ‑afluwaa kpaslɩlɩ, ɔ yaa lobhocoa 'nyɩnɩ 'nyɩ ɔ ya sakʋ. Ncɛlɩa 'fɩan ‑ɔ ‑kʋa 'lɛ bhibhiepalʋa ‑zɔn na, kopea 'mɔɔ 'ciin. 21Na, ɔ ya maa 'cla lebhe: «‑Yaka, wɔlɩ ‑naa a nu 'lɛ na, ɩ ya 'kʋglalɩ.»
22Maa 'fɩan kopea Zozii 'ciin 'nyɩ nikpoo slaa maa, pɔlɛkʋmɛnɔwɔlɩa ‑ɩ 'wlʋlʋa 'mɔɔ 'lɛ neen na ɩla gbʋ, 'nyɩ ma claa lebhe: «‑N 'ta Zozɛfʋ ‑yowlia bha?» 23Zozii ya maa 'cla lebhe: «A cɩ 'kaan ‑nʋawlɛɛsa 'nine ‑naa 'palɩ lebhe: ‑Dɔtɛ, jabha ‑mɔɔ 'titi ‑ncɩ. A cɩ 'ka ‑awlɛɛn 'cla lebhe: ‑A ya ɩmɩa ‑tɛtɛa n nʋnʋ 'lɛ Kapɛnayumʋdua 'kʋ na 'nu, na 'maa nʋmʋɩ ‑da, ‑mɔɔ 'titi ‑n 'bhlɩdua 'kʋ!» 24Na, Zozii ya ‑awlɛ maa 'cla lebhe: «N solu ‑anyɩ, ɩ ‑glɩ ‑nʋawlɛ lebhe Laagɔnekʋnyɩtɛnyɔ bhlogbɩɩ 'ta ɔ 'bhlɩdu 'kʋ 'ŋlɩ ‑ka. 25N solu anyɩ ‑nʋawlɛ, Laagɔnekʋnyɩtɛnyɔ Elii 'la 'bhlɛsʋa nɩkplaan, daa liowlia ‑mɔta ɩya 'klea nɩkplaan, 'nyu 'ta 'lɛ bhla 'nyɩ ŋɔmʋ 'kadiea pla 'lɛ 'bhlɩ bhuoa 'kʋ na, 'kuzluŋwlɛ ‑bhutukpa ‑kʋa Izlayɛlɩbhlɩa* 'kʋ. 26'Bhlɩmɔɔn Laagɔ 'ta Elii maa nɩkplaan bhlogbɩɩ 'bhlɩ lobhu, ‑ma Sidɔɔnbhlɩa 'kʋ, Salɛtaadua 'kʋ 'la 'kuzlʋŋlɔ bhlo 'bhlɩ ɔ lobhuo 'lɛ. 27'Nyɩ Laagɔnekʋnyɩtɛnyɔ Elizee 'la 'bhlɛsʋa nɩkplaan, kokobhebhlanya ‑bhutukpa ‑kʋa Izlayɛlɩbhlɩa 'kʋ. 'Bhlɩmɔɔn, maa nɩkplaan bhlogbɩɩ 'ta jabha, ɩ ‑ka ‑kʋ le ‑n 'ta Siliinyɔ Naamaa ‑tɛɛ na.»
28Daa ma 'nu 'lɛ wɔlɩ ‑naa na, dɔgbɛ ya maa 'fɩan ‑ɔ kʋa 'lɛ bhibhiepalʋa ‑zɔn na, pla. 29Ma ya 'kʋbho, ma ‑yɔɔsɔ ya 'dua nɩkplaan 'wlʋ 'nyɩ ma yɔɔ 'kikea 'kʋa mala 'dua 'slalɩɔ 'lɛ na 'wlu famʋ, le ma 'ka 'mɔɔ ‑bhubhua nɩkplaan 'pa. 30‑Ma Zozii ya maa sidiin 'plɩlɩ 'nyɩ ɔ ya mʋ.
Zozii ya 'wugonyunyunyɔ bhlo jabha
(Mak 1.21-28)
31Zozii ɔ ya Galileebhlɩa 'la 'dua ma la 'lɛ Kapɛnayumʋ na 'kʋ mʋ, 'nyɩ Zifʋnyaa* 'la nyɔkwɛclɩɩa* 'kʋ, ɔ caa ncɛlɩ. 32Ɔla cacawɔlɩa ya ncɛlɩa 'fɩan nikpoo ‑sla, sa ɩ ‑kaa 'tɛtɩ na.
33Bhibhiepalʋa* ‑zɔn, 'wugonyunyunyɔ bhlo ‑kʋa 'yɛpɩ. Ɔ yaan ‑gaa 'nyɩ ɔ ya 'cla lebhe: 34«'Ayɩ! Nazalɛtɩnyɔ Zozii, 'lɩsaa ‑n 'matɩlɩa 'lɛ ‑anyɩ kpʋkpʋʋn bha? Ka ‑n ci 'lɛ le ‑n ka ‑anyɩ nlɔɔa bha? N ‑ci nclɔɔa ‑n ‑glɩ 'lɛ na. ‑Mɔ ‑glɩ 'lɛ Laagɔ 'la ‑Kplɔkplɔnyɔa ɔ lobhu 'lɛ na!» 35Zozii ya 'wugo ‑nyunyua 'cizalalɩ 'nyɩ ɔ yʋʋ 'cla lebhe: «Mɛ ‑naa nea ɩya ‑n 'wlʋ nclɔɔa nɩkplaan!» 'Wugo ‑nyunyua ya nclɔɔa sapalɩ, ncɛlɩa 'fɩan 'ci 'kʋ, ʋ yɔɔ nɩkplaan 'wlʋ ‑ma ʋ 'tɔɔ lʋʋ ‑ylɛylɛ nʋ. 36Na, nikpoo ya maa 'fɩan sla 'nyɩ ma 'claclalɩa neen lebhe: «Wɔɔnyɩtʋ ‑naa, 'ndanaanʋ ʋ ‑glɩa 'lɛ bha? Nclɔɔ ‑naa ɔ solulu 'wugwi ‑nyinyi ‑kwlelie ɩya 'tɛtɩ nɩkplaan 'nyɩ ɩ wlʋ nclɔɔ nɩkplaan.» 37'Nyɩ Zozii 'la 'ŋlɩa ya 'bhlɩ ‑tɛtɛa 'kʋ dlolu.
Zozii ya guzenya jabha
(Mat 8.14-17; Mak 1.29-34)
38Zozii ya bhibhiepalʋa* ‑zɔn 'wlʋ 'nyɩ ɔ ya Simɔɔn 'bhisleen mʋ. Na, wɔtlɩkukonkuo bhlaa Simɔɔn 'wʋtlɔ 'nyɩ ɔla gbʋ, ma ya Zozii bho kla. 39Ɔ yɔɔ cɩ sakwlili, ɔ ya wɔtlɩa 'cizalalɩ 'nyɩ ɩ ya 'ŋlɔa 'ciin 'wlʋ. 'Kplookʋ, ɔ ya 'kʋbho 'nyɩ ɔ ya maa lobholɩɛ bhɔ.
40Na, 'ylʋa mʋ 'lɛ na, maa 'fɩan ‑ɔ ‑kaa 'lɛ guzenya, 'nyɩ gu ‑mizimizi bhlaa 'lɛ na, ma ya maa Zozii ‑la. Ɔ ya maa 'fɩan sɩ 'kʋ ‑gbɛ 'nyɩ ɔ ya maa jabha. 41'Wugwi ‑nyinyi ya guzenya ‑bhutukpa nɩkplaan 'wlʋ, ɩ ‑gaa nɩkplaan 'nyɩ ɩ claa lebhe: «‑N ‑glɩ Laagɔ 'la 'Cʋ!» ‑Ma Zozii zalalɩa 'mɩɩ 'ci 'nyɩ 'ɔ 'nyɩ 'taa 'mɩɩ nyɩtɛda ‑ylɛylɛ, ‑masa ɩ ‑cia sɛɛ le ɔmɔ ‑glɩ Laagɔ 'la ‑Sasanyɔa* na.
Zozii sa Dɩnanɩa Zudeebhlɩa 'kʋ
(Mat 4.23; Mak 1.35-39)
42Daa ‑zeli ze 'lɛ na, Zozii ɔ ya ‑zɔnwlʋ 'nyɩ ɔ ya daa ‑ɩ 'kʋ 'lɛ ɩcɩɩn na mʋ. Ncaalawlee 'matɩa 'mɔɔ. Daa ma 'lɩɔ 'lɛ na, ma yaa wabha le ma 'kaa 'mɔɔ macɩ cɩ kalɩ ɩya ɔ 'la ka sɛ mʋ. 43‑Ma Zozii ya maa 'cla lebhe: «Ɩ ‑fata le n ‑samʋ ‑buundi 'kʋ 'la ncɛlɩ Laagɔ 'la Nyɩbhɛlɩdua* 'la Dɩnanɩa*, sa ɩla gbʋ dɛ Laagɔ ɔ lobhuun 'lɛ.» 44Na, ɔ plɩ Zudeebhlɩa 'kʋ 'la bhibhiepalɩa* ‑zɔn 'nyɩ ɔ saa Dɩnanɩa.
Currently Selected:
Luk 4: NTLD13
Highlight
Share
Copy
Want to have your highlights saved across all your devices? Sign up or sign in
Dida New Testament © Bible Society of Côte d'Ivoire, 2013.