Gal 2
2
Pɔlʋ ‑ya ‑bɛka ‑lobhulobhuyaa ya bhlo 'plɩ
1Na, liowli 'kʋgba ‑nmɔɔna 'plɩ 'lɛ na, n ‑ya Banabasɩ ya ‑awlɛ Zolizalɛmʋ mʋ. N ya Titi ‑ma famʋ. 2N ya 'yɛpɩ mʋ, ‑ofi lebhe Laagɔ yaan mɩ pala 'nyɩ n ya 'lɛ Dɩnanɩa* n plici 'lɛ maa ‑ɔ 'ta 'lɛ Zifʋnya* ‑glɩ na, ‑zɔnsa. N ‑ya 'kʋklʋʋnpʋnyaa ‑ma ya ‑asule mʋ 'nyɩ n ya ‑awlɩɩ maa ‑zɔnsa ɩya 'na sɔmɩa n fa 'lɛ na, 'la 'ka sɛ 'kpɔkpɔ 'plɩ. 3‑Ma, ma 'ta 'na 'namʋnyɔ Titi ‑ɔ ‑glɩ 'lɛ Glɛkɩnyɔ* na, ‑ylɛylɛ 'cla le ma 'dɩɔ 'kʋ 'saantiin. 4Yooyo ‑bholiecɩa ‑ɔ blea 'lɛ ‑anyɩ sidiin, ‑ɔ 'cakalɩɔa 'lɛ ‑anyɩ 'nyɩ ‑ɔ dɩdɛa 'lɛ ‑ala ‑ncɩkalɩɛa ‑a 'lɩlɩ 'lɛ Zozi Klisi nɩkplaan le ma 'ka ‑anyɩ geyliin cala na, mala gbʋ ɩ cɩ 'kaa 'lɛ sɛɛ 'plɩ. 5Ncɛlɩ ‑naa, ‑a 'ta maa ‑acɩ ‑zɔn te ‑ylɛylɛ ‑ɩya Dɩnanɩa 'la ‑nʋawlɛa 'ka sɛ ɛla daa kʋ anyɩ 'wluku.
6‑Ma, ‑ɔ ‑glɩ 'lɛ 'kʋklʋʋnpʋnyaa na, mala saa ma ‑kʋkʋlʋa 'lɛ na, ‑n 'ta ɩmɩ ‑ɩ 'ta 'lɛ 'na da wɔlɩa ‑glɩ, sa Laagɔ kope 'ta ncɛlɩ 'la kʋkʋkʋlɩɛ 'ciin. Na ncɛlɩ ‑naa ‑ma, ma 'taanɩ ‑buun -wɔlɩ ‑ylɛylɛ 'clalɩ. 7‑Ma ma ya 'lɩ lebhe Laagɔ yaan maa ‑ɔ 'ta 'lɛ 'kʋdɩɔ na, 'la Dɩnanɩa wlɩɩn zʋ, saa ɔ zʋ 'lɛ maa ‑ɔ ‑dɩɔ 'lɛ 'kʋ 'la Dɩnanɩa Pɩɛlɩ wlɩɩn na. 8Sa ɔmɔa ‑ɔ ple 'lɛ Pɩɛlɩ, lobhulobhunyɔ*, maa ‑ɔ ‑dɩɔ 'lɛ 'kʋ, 'la Dɩnanɩa 'la ‑salobholia 'la gbʋ na, ɔmɔ ‑sakasaka ‑ɔ nʋnʋa ‑amʋa 'lɛ maa ‑ɔ 'ta 'lɛ Zifʋnya ‑glɩ na, 'la Dɩnanɩa 'la ‑salobholia nɩkplaan. 9'Nyɩ Zakɩ, Pɩɛlɩ ɩya Zaan -ma, ‑ɔ ‑glɩ 'lɛ ncɛlɩa 'fɩan ‑ɔ -ka 'lɛ Klisi 'la pɔɔtɛtɛ na sidiin 'la 'cwie na, ma ya cibhlili lebhe Laagɔ 'nyɩɩn 'lɛ lobholi ‑naa ɔla ŋaazɩɩnlɩlɩɛa nɩkplaan. Na, ma ya n ‑ya Banabasɩ sɔ 'nyɩ le ‑a ‑glɩnɩ bhlo ɩya ‑anyɩ ‑a ka maa ‑ɔ 'ta 'lɛ Zifʋnya ‑glɩ na, 'bɩɩn mʋnʋ ɩya maa ma 'ka maa ‑ɔ ‑dɩɔ 'lɛ 'kʋ na, 'bɩɩn mʋnʋ. 10'Bhlɩmɔɔn wɔlɩa bhlogbɩɩa ma 'clalɩa 'lɛ ‑anyɩ na, ɩmɩ ‑ɩ ‑glɩ 'lɛ lebhe ‑a falɩa ŋaazɩnyaa pɔlɛ cɩ.
Pɔlʋ ya Pɩɛlɩ 'gesalɩ
11‑Ma daa Pɩɛlɩ ci 'lɛ Antɩɔsʋdua nɩkplaan na, n yɔɔ ncɛlɩa 'fɩan 'ci 'kʋ gbatlɩ mʋnʋ, sa ɔ 'taa 'nanɩ nʋ na. 12-Masa 'fɩɔn ɩya ncɛlɩa Zakɩ lobhu 'lɛ na, 'kaa 'lɛ cɩ na, ɔya maa ‑ɔ 'ta 'lɛ Zifʋnya* ‑glɩ na, lilia dabhlo. ‑Ma daa ma ci 'lɛ na, ɔ mɛ 'tanɩa maa cɩ, sa ɔ 'gulua maa ‑ɔ ‑dɩɔa 'lɛ 'kʋ na. 13‑Daa Zifʋnyaa yaa ɔla nʋnʋgbɩa dɩbalɩlɩɛ bhɔ 'nyɩ Banabasɩ 'titi ya ɔcɩ 'cintalɩ 'nyɩ ɔ ya mala yooyogbanʋlɩɛa nɩkplaan bhlili. 14Na, daa n 'lɩ 'lɛ lebhe mala 'namʋa 'taa 'kʋnylugolu, ‑ofi lebhe ma 'plɩlɩ 'taa Dɩnanɩa* 'la ‑nʋawlɛa 'kʋ na, n ya Pɩɛlɩ ncɛlɩa 'fɩan 'ci 'kʋ 'cla lebhe: «‑Mɔa ‑ɔ ‑glɩ 'lɛ Zifʋnyɔ na, ‑n nʋ 'lɛ maa ‑ɔ 'ta 'lɛ Zifʋnya ‑glɩ na 'bhisa 'kʋ 'nyɩ ‑n nʋ 'ta 'lɛ le Zifʋnyɔ na, 'nsasa -n -cɩ ka 'lɛ mino ɩya -n ka 'lɛ maa ‑ɔ 'ta 'lɛ Zifʋnya -glɩ na 'kʋkpafɩalɩ le ma nʋ le Zifʋnya bha?»
Zozi Klisi nɩkplaan ncɛlɩa 'fɩan 'lɩlɩ 'lɛ gbʋʋnsalɩɛ
15‑Anyɩ, Zifʋdʋdʋvalɩnya ‑a ‑glɩ 'lɛ, ‑ma ‑a 'ta nyinyinʋya ‑naa ‑ɔ 'ta 'lɛ Laagɔ ‑ci na, ‑glɩ. 16'Bhlɩmɔɔn, ‑a ‑ci sɛɛ lebhe, ‑n 'ta ‑jlɩmaa 'la 'kʋplɩlɩlɩɛ nɩkplaan nclɔɔ 'plɩlɩ 'ta 'kʋnylugolunyɔ, ‑ma Zozi Klisi 'la pɔɔtɛtɛ nɩkplaan ‑tɛɛ. ‑Anyɩ ‑ma, ‑a ya Zozi Klisi 'la pɔɔtɛtɛ 'lɩ ɩya ‑aya Laagɔ 'ka bhlo 'plɩ Klisi 'la pɔɔtɛtɛa nɩkplaan. ‑N 'ta ‑jlɩmaa 'la nʋnʋgbɩa nɩkplaan, ‑ofi lebhe nclɔɔ ‑ylɛylɛ ‑ya Laagɔ cɩ 'ta ‑jlɩmaa 'la nʋnʋgbɩa nɩkplaan bhlo 'plɩlɩ. 17‑Ma daa ‑a 'matɩ 'lɛ lebhe ‑aya Laagɔ 'kanɩ Klisi nɩkplaan bhlo 'plɩ na, ‑a lɩnɩ lebhe ‑a ‑glɩnɩ nyinyinʋya. Na, ka Klisi ‑glɩ 'lɛ nyinyi 'la lobhoco bha? ‑Wɔɔ, ɩ 'ta sɛɛ ‑kʋ ‑ylɛylɛ!
18Ɩ ‑ka ‑kʋ lebhe n ‑ka ɩmɩa n ya 'lɛ 'dɛ ‑sa na, ɩla daa cala na, ‑amʋ 'titii ‑ɔ mʋnʋnɩ 'lɛ ‑jlɩmaa gbatlɩ. 19Sa, ‑amʋ, ‑jlɩmaa ya gba 'nyɩ n ya ala gbazɔ 'ku ɩya n 'kanɩ Laagɔ 'la gbʋ kʋ. N ‑ya Klisi ‑bhoonɩ 'lɛ dabhlalɩsua 'ciin. 20N ‑kʋ, ‑ma ‑n 'tanɩ ‑amʋ, Klisi ‑kʋnɩɩn 'lɛ nɩkplaan. Sa 'na ‑pɔtɔnʋ 'la 'pʋpʋkʋ 'la kʋlɩɛa, Laagɔ 'la 'Cʋa ‑ɔ wabhaan 'lɛ 'nyɩ ‑ɔ ya 'lɛ 'na gbʋ 'ku na, ɔla pɔɔtɛtɛa nɩkplaan ɩ ‑kʋlʋnɩ 'lɛ. 21N 'ta ‑wa lebhe Laagɔ 'la 'nanɩa ɔ 'nyɩ 'lɛ ‑anyɩ na, 'plɩ 'kpɔkpɔ, sa ɩ ‑kaa ‑kʋa lebhe ‑jlɩmaa 'la 'kʋplɩlɩlɩɛa nɩkplaan nclɔɔ ‑ya Laagɔ 'plɩlɩ 'lɛ bhlo na, 'dɛndlana 'kpɔkpɔ 'titi Klisi 'ku 'lɛ.
Currently Selected:
Gal 2: NTLD13
Highlight
Share
Copy
Want to have your highlights saved across all your devices? Sign up or sign in
Dida New Testament © Bible Society of Côte d'Ivoire, 2013.