Gal 3
3
‑Jlɩmaa nyɩ 'lɛ 'Wugoa bha, ‑ma pɔɔtɛtɛ bha?
1'Ayɩ Galasiinyanyɩ, 'tututunyanyɩ, ncaasaa ‑ɔ 'nyiglilia 'lɛ anyɩ bha? Anyɩa ma ya 'lɛ Zozi klisi, ‑ɔ 'kulu 'lɛ dabhlalɩsua 'ciin na, ‑sa wɩaan pala na. 2A ‑sa kaan wɔɔce ‑naa 'kpɔɔ ‑zɔn: ‑Jlɩmaa 'la 'kʋplɩlɩlɩɛa nɩkplaan a 'lɩlɩlɩ 'lɛ Laagɔ 'la 'Wugoa bha, ‑ma Dɩnanɩa* a po 'lɛ 'nyukwliin, 'nyɩ a la 'lɛ ‑nʋawlɛ na, nɩkplaan bha? 3‑Sa 'la 'tututunya a ‑glɩ 'lɛ bha? Anyɩa ‑ɔ ya 'lɛ 'Wugoa 'kʋ bhɔlʋ na, 'nyɛkɛa nɩkplaan a ‑wa 'lɛ le a 'kanɩ 'wlukolu bha? 4'Kpɔkpɔ 'titi a 'lɩ 'lɛ ɩmɩ ‑naa 'fɩan 'ciin bha? 'Nyɩ ka ɩmɩ ‑naa 'fɩan kaa 'kpɔkpɔ ‑glɩa na, 5ɔmɔa ‑ɔ 'nyɩ 'lɛ anyɩ 'Wugoa 'nyɩ ‑ɔ nʋnʋ 'lɛ 'ciinzizielɩlobholia anyɩ sidiin na, ‑jlɩmaa 'la 'kʋplɩlɩlɩɛa 'la gbʋ ɔ nʋɩ 'lɛ bha, ‑ma Dɩnanɩa a po 'lɛ 'nyukwliin 'nyɩ a la 'lɛ ‑nʋawlɛ na, ɩla gbʋ ɔ nʋɩ 'lɛ bha?
‑Jlɩmaa 'la 'kʋplɩlɩlɩɛ ple 'ta nclɔɔ 'kʋylugolunyɔ
6Sa Ablaamʋ ya 'lɛ ɔla pɔɔtɛtɛa Laagɔ 'kʋ zʋ 'nyɩ ɩmɩ ‑naa yɔɔ 'lɛ 'kʋnylugolunyɔ ple na, 7a 'nunu 'dɛ lebhe maa ‑ɔ -ka 'lɛ pɔɔtɛtɛ na, maa ‑ɔ ‑glɩ Ablaamʋ 'la 'cuoa. 8Ziewɔlɩaziewɔlɩa nɩkplaan Laagɔ gugua 'lɛ lebhe 'kaa maa ‑ɔ 'ta 'lɛ Zifʋnya* ‑glɩ na, 'kʋnylugolunya ple, pɔɔtɛtɛ nɩkplaan na, ɔ ya 'kʋklʋʋn pʋ 'nyɩ ɔ ya Ablaamʋ Dɩnanɩ ‑naa ‑sa: «‑Mɔ nɩkplaan ‑dʋdʋa 'kʋ 'la 'lɔlɩa 'fɩan cɩ 'ka 'lɛ 'nyupalɩɛ 'lɩlɩ.» 9Na maa 'fɩan ‑ɔ ‑glɩ 'lɛ pɔɔtɛtɩkalɩnyaa, maya pɔɔtɛtɛkalɩnyɔ Ablaamʋ ‑palɩɔ 'nyu.
10‑Ma ‑ɔ -glɩ 'lɛ ‑jlɩmaa 'la 'kʋplɩlɩnyaa 'fɩan na, 'palɩɛ ‑kʋ maa 'kʋ, sa ɩ ‑zieo lebhe: «'Palɩɛ ŋeni ncaatʋtʋʋntʋa ‑ɔ 'plɩlɩ 'ta 'lɛ ɩmɩa ‑tɛtɛa ‑ɩ ‑zieo 'lɛ ‑jlɩmaa 'la ‑afluwaa nɩkplaan na 'kʋ na.» 11Ɩ -kʋ 'dɛ 'kpataa le ‑jlɩmaa 'la 'kʋplɩlɩlɩɛa nɩkplaan, nclɔɔ ‑ylɛylɛ 'plɩ 'ta 'kʋnylugolunyɔ, sa ɩ ‑zieo lebhe: «Ɔmɔa ‑ɔ cɩ 'ka 'lɛ 'kʋnylugolunyɔ 'plɩ pɔɔtɛtɛ 'la gbʋ na, ɔ cɩ 'ka jabhʋa 'lɩ.» 12Na, ‑jlɩmaa -ya pɔɔtɛtɛ 'ta bhlo ‑glɩ. Sa ɩ ‑zieo lebhe: «Ɔmɔa ‑ɔ cɩ ‑ka 'lɛ ɩmɩa ‑jlɩmaa bhli 'lɛ 'kʋ na 'kʋplɩlɩ na, ɩmɩ nɩkplaan ɔ cɩ 'ka 'lɛ jabhʋa 'lɩlɩ.»
13Klisi* ya 'lɛ ŋonu lebhe ‑ala 'palɩɛ 'plɩ ɔmɔ 'titi ɔla 'palɩɛ na, ɔ ya ‑ala dlua ‑plʋ le ɔ 'ka ‑anyɩ ‑jlɩmaa 'la 'palɩɛa ‑zɔn ‑sa, sa ɩ ‑zieo lebhe: «'Palɩɛ ŋeni ncaatʋtʋʋntʋa ma gʋalɩ 'lɛ su 'ciin na.» 14Ka ɩ 'plɩ 'lɛ sɛɛ ɩya Ablaamʋ 'la 'nyupalɩɛa 'ka maa ‑ɔ 'ta 'lɛ Zifʋnya ‑glɩ na 'kʋ ŋenimʋ, Zozi Klisi 'la 'ŋlɩa nɩkplaan ɩya pɔɔtɛtɛ nɩkplaan, ‑a ka 'Wugoa Laagɔ talɩ 'lɛ ‑ndanyɩ 'kʋ na 'lɩ.
‑Jlɩmaa ‑sa 'ta 'dɛ Laagɔ 'la ‑ndanyɩtalɩɛa
15Bholiecɩnyɩ, ‑a bhɔlʋ ka ncɛlɩ 'la nʋnʋgbɩ 'kʋ: Ncɛlɩ bhlobhlo 'la mɛnʋ, ɩ -ka ‑kʋ le ma ‑kʋʋ ‑ndanyɩ 'kʋ talɩ na, nclɔɔ ‑ylɛylɛ ‑sa 'tanɩʋ 'dɛ naa, ma zʋlʋ 'tanɩʋ 'kʋ. 16Na, Ablaamʋ ɩya ɔla valɩnɩkpaannyɔa, Laagɔ ta 'lɛ ‑ndanyɩa. Zieziewɔlɩa* 'cla 'ta lebhe: Ɩya valɩnɩkpaannyaa, le saa ɩ saa 'lɛ ncaabhutukpa na. ‑Ma Ɩya ‑naa valɩnɩkpaannyɔa, ɩ sa ‑zɔn lebhe nclɔɔ bhlogbɩɩ ɩ sa 'lɛ. Ɔmɔ ‑glɩ 'lɛ Klisi. 17Na, 'lɩka 'na wɔɔgugwiea: Laagɔ ya ɔla mɛnʋa kpo 'kʋ zʋ, liowli ‑gwlɩɩ ‑ngbi 'la dɩpici ‑nmɔɔna ɩya liowli ‑glʋʋ ɩya 'kʋgba, 'fɩɔn ‑jlɩmaa ya 'lɛ ci. 'Nyɩ a ‑sa 'tʋʋ 'dɛ. Ɩ kaa sɛɛ ‑kʋa na, Laagɔ 'la ‑ndanyɩtalɩɛa cɩa 'kpɔkpɔ 'plɩ. 18Sa ɩ ‑ka ‑kʋ le ‑jlɩmaa 'la 'kʋplɩlɩlɩɛa nɩkplaan ma lili 'lɛ Laagɔ 'la ‑ajaa na, 'dɛndlana ‑n 'tanɩ ‑ndanyɩtalɩɛa 'kʋʋ. ‑Ma ‑ndanyɩtalɩɛ 'kʋ Laagɔ palɩlɩ 'lɛ Ablaamʋ 'nyu.
19Na, 'lɩsaa 'la gbʋ ‑jlɩmaa ‑zʋɔanɩa 'lɛ bha? Ka a ci 'lɛ, a ya 'lɛ ‑ndanyɩa 'kʋ ‑gbɛ le ‑ngasɩtʋlɩɛ 'ka ‑zɔnwlʋ 'fɩɔn ɩya Ablaamʋ 'la valɩnɩkplaa 'la nclɔɔa 'la gbʋa Laagɔ ta 'lɛ ‑ndanyɩa na, ɔ 'ka ci. Nclɔɔ 'bhlaandleecɩa* 'plɩlɩ 'lɛ 'kʋ 'nyɩ ma ya 'lɛ ‑jlɩmaa ‑zɔnwla. 20Ncɛlɩ ‑mɔsɔ 'la gbʋ ma 'matɩ 'lɛ 'kʋplɩlɩnyɔ. 'Nyɩ Laagɔ ‑glɩ bhlo. 21Na, ka ‑jlɩmaa mʋnʋ 'lɛ Laagɔ 'la ‑ndanyɩtalɩɛa gbatlɩ bha? ‑Wɔɔ ɩ 'ta sɛɛ kʋ ‑ylɛylɛ. Ɩ ‑kaa ‑kʋ lebhe Laagɔ yaa ncɛlɩ ‑jlɩmaa bhlo 'nyɩ ‑a -cɩ kaa 'lɛ 'tɛtɩa ‑ɩ cɩ 'ka 'lɛ gba ɩya ncɛlɩ 'kaa 'lɛ jabhʋa 'lɩ na, kalɩ na, 'dɛndlana ‑jlɩmaa 'la 'kʋplɩlɩlɩɛa nɩkplaan nclɔɔ cɩ 'kaa 'lɛ ‑zaagbʋsa 'kʋnylugolunyɔ 'plɩlɩ. 22‑Ma Zieziewɔlɩa cla lebhe ‑tɛtɛa 'fɩan ‑kʋ nyinyi 'la geyliin, ɩya ‑ndanyɩa Laagɔ ta 'lɛ na, ɩ 'ka maa ‑ɔ ‑zʋɔ 'lɛ mala pɔɔtɛtɛa Zozi Klisi 'kʋ na 'la gbazɔ 'kʋglalɩ, mala pɔɔtɛtɛa 'la gbʋ.
23'Fɩɔn ɩya pɔɔtɛtɛa 'la daa 'ka 'lɛ ŋeni na, ‑a ‑kʋa geyliin, ‑jlɩmaa ‑zɔn le ‑a ka pɔɔtɛtɛa ‑ɩ cɩ 'kaa 'lɛ ci na, ‑bɛ. 24Na, ka ‑jlɩmaa 'plɩ 'lɛ ‑ala 'klʋbɛlɩnyɔ ‑aan ɩya Klisi 'ka ci ɩya ‑a ka ɔla pɔɔtɛtɛa nɩkplaan, Laagɔ 'la pɔɔsanʋnya 'plɩ. 25Na ‑nʋawlɛlalɩɛa yanɩ 'lɛ ci na, ‑a 'tanɩ 'klʋbɛlɩnyɔ ‑naa 'la ‑kwleliea ‑zɔn ‑kʋ. 26Sa anyɩa 'fɩan a ‑glɩnɩ Laagɔ 'la 'cuo pɔɔtɛtɛa a zʋ 'lɛ Zozi Klisi nɩkplaan na 'la gbʋ. 27‑Ghɛɛ, anyɩa 'fɩan ma zʋlʋ 'lɛ Klisi nɩkplaan 'nyuwlu na, a ya Klisi nɩkplaan ‑pla. 28Zifʋnyɔ* 'tanɩ ‑kʋ naa, Glɛkɩnyɔ 'tanɩ ‑kʋ. Geyu 'tanɩ ‑kʋ naa, ‑ncɩkalɩnyɔ 'tanɩ ‑kʋ. Ŋodi 'tanɩ ‑kʋ naa, 'ŋlɔ 'tanɩ ‑kʋ. Sa Zozi Klisi nɩkplaan, anyɩa ‑tɛtɛa ‑glɩnɩ nclɔɔ bhlo. 29'Nyɩ ɩ ‑ka ‑kʋ lebhe a ‑glɩnɩ Klisi 'nʋa na, 'dɛndlana a ‑glɩ Ablaamʋ 'la valɩnɩkpaanya. A ‑glɩnɩ ‑ajaalinya ‑ndanyɩtalɩɛa 'la 'sasʋʋn.
Currently Selected:
Gal 3: NTLD13
Highlight
Share
Copy
Want to have your highlights saved across all your devices? Sign up or sign in
Dida New Testament © Bible Society of Côte d'Ivoire, 2013.