Gal 1
1
‑Ayopalɩɛ
1‑Amʋ Pɔlʋ, ‑ɔ 'ta 'lɛ ncɛlɩ ‑aana nclɔɔ bhlo 'la lobhulobhunyɔ* ‑glɩ, ‑ma ‑ɔ ‑glɩ 'lɛ Zozi Klisi ɩya To Laagɔ ‑ɔ ‑bhoo 'lɛ 'kwɩɩn 'kʋ na, 'la lobhulobhunyɔ na, 2n ‑ya bholiecɩa 'fɩan ‑ɔ ‑kʋʋn 'lɛ cɩ na, ‑anyɩ -ɔ zie 'lɛ anyɩ Galasiibhlɩa 'kʋ 'la ‑laagɔnɩkplaa. 3'Nyupalɩɛ ɩya pupuea ‑a To Laagɔ ɩya ‑Kwlenyɔ Zozi Klisi nyɩ 'lɛ na, kʋ anyɩ 'kʋ. 4Klisi ya ɔcɩ ‑sa ‑ala nyinyia 'la gbʋ, le ɔ 'ka ‑anyɩ ‑abhɔlɛ 'la 'pʋpʋ ‑naa 'ku 'la ‑kwleliea ‑zɔn ‑sa, saa Laagɔ ‑ɔ ‑glɩ 'lɛ ‑a To wabha 'lɛ na. 5'Klʋagba ŋenio 'lʋkʋlʋkʋ ɩya 'lʋkʋlʋkʋ! Ɩ kʋ sɛɛ!
Dɩnanɩa ‑glɩ bhlo
6Ylɩbhalɩlɩɛa a ylɩbhalɩ 'lɛ 'nyɩ a ya 'lɛ ɔmɔa, Klisi la ŋaazɩɩnlɩlɩɛa nɩkplaan, ‑ɔ la 'lɛ anyɩ na, kɔkʋʋn ‑tla 'nyɩ a ya 'lɛ ‑sa 'faanfan ‑buun ‑dɩnanɩ 'klʋ ‑tla na, ɩ slaan nikpoo. 7‑N 'ta le, Dɩnanɩa* 'ka ɩla ‑buun -naanɩ kalɩ. ‑Ma ncɛlɩ -ɔ gblogblolu 'lɛ anyɩ 'nyɩ ‑ɔ 'matɩ 'lɛ lebhe ‑ɔ ka Klisi 'la Dɩnanɩa sagblii. 8‑Ma ɩ ‑ka ‑kʋ le nclɔɔ, ɔ 'plɩmʋ ‑anyɩ 'titi ‑aana ‑laagɔɔn 'la 'bhlaandleeo*, ‑ka anyɩ Dɩnanɩa ‑a ‑sa 'lɛ anyɩ na ɩla ‑buun -naanɩ ‑sa na, 'naa 'palɩɛ ŋenio! 9‑A yɩɩ tooto nyɩtɛ 'nyɩ n nyɩtɛ ‑awlɩɩ 'lɛ ‑pɔtɔnʋ: Ɩ ‑ka ‑kʋ le nclɔɔ ‑ka anyɩ Dɩnanɩa ‑a ‑sa 'lɛ anyɩ na ɩla ‑buun -naanɩ ‑sa na, 'naa 'palɩɛ ŋenio!
10Na, ncɛlɩ 'la ‑plɔlɩɛ n 'matɩnɩ 'lɛ bha? ‑Ma Laagɔ 'la ‑pɔlɩɛ bha? Ka n 'matɩ 'lɛ le n 'ka ncɛlɩ 'tʋpla bha? N ‑kaa 'matɩ le n 'kanɩ ‑awlɛ ncɛlɩ 'tʋpla na, n cɩ 'tanɩa Klisi 'la lobhoco 'plɩ.
Saa Pɔlʋ 'plɩplɩlɩ 'lɛ lobhulobhunyɔ na
11Bholiecɩnyɩ, n solui anyɩ: Dɩnanɩa* n ‑sa 'lɛ anyɩ na, ɩ 'ta nclɔɔ 'la wlɩɩn ‑naanɩ ‑glɩ. 12'Nyɩ ‑awlɛ, ɩ 'ta nclɔɔ 'kʋ 'plɩlɩ ɩya ɩ 'kaan 'kʋ ŋeni naa ‑n 'ta nclɔɔ 'taan 'lɛ mɩ ca, ‑ma Zozi Klisi palaan 'lɛ mɩ.
13Sa, a ya saa n nʋnʋnʋa 'lɛ ‑bɛkadaa, daa n ‑kʋa 'lɛ Zifʋnyaa* 'la gʋgwlɛa nɩkplaan na, 'la wɔlɩa 'nu. A ‑ci saa 'cizalaa ‑amʋa 'lɛ ncɛlɩa 'fɩan ‑ɔ -ka 'lɛ Klisi 'la pɔɔtɛtɛ na 'la gbaylɩsalɩɛ 'la gbʋ 'nyɩ n 'matɩa 'lɛ le n 'kaa maa nua na. 14N via ‑nwɔ Zifʋnyaa 'la Laagɔgʋgwlɛa nɩkplaan 'nyɩ n zia 'na ‑zɔkpʋnya ɩya n 'bhlɩnya ‑bhutukpa 'kʋ, n tokadɔcɩ 'la nʋnʋgbɩa 'la 'kʋplɩlɩɛa nɩkplaan.
15‑Ma ɔmɔa ‑ɔ slaan 'lɛ de n 'nɔ nɩkplaan tooto 'nyɩ ɔla ŋaazɩɩnlɩlɩɛa nɩkplaan, ‑ɔ laan 'lɛ na, daa ɩ ‑plɔɔ 'lɛ 'tʋ 16le ɔ palaan ɔla 'Cʋa ɩya n 'ka maa ‑ɔ 'ta 'lɛ Zifʋnya ‑glɩ na, ɔla Dɩnanɩa ‑sa na, n 'ta nclɔɔ 'la dɩgalɩ 'matɩ naa 17n 'ta Zolizalɛmʋ, maa ‑ɔ 'plɩlɩ 'lɛ lobhulobhunya* ‑bɛɛ na 'bhlɩ mʋ, ‑ma 'kplookʋ ka n 'plɩ 'lɛ 'nyɩ n ya 'lɛ Aghlabʋbhlɩa 'kʋ mʋ 'nyɩ ɩla leean, n ya 'lɛ Damasɩdua 'kʋ cɔlɔ. 18'Nyɩ liowli ‑mɔta 'plɩ 'lɛ na, n ya 'lɛ Zolizalɛmʋdua 'kʋ mʋ le n 'ka Kefasɩ cibhlili 'nyɩ n yɔɔ clɩɩ 'kʋgba ‑ngbi cɩ li, 19‑ma 'bhlɩmɔɔn, n 'ta ‑buun lobhulobhunyɔ* bhlogbɩɩ 'lɩ, ‑n 'ta le ‑Kwlenyɔa bholi Zakɩ ‑tɛɛ na. 20Ɩmɩa n zie 'lɛ anyɩ na, n cla anyɩ Laagɔ 'ci kʋ lebhe ɩ 'ta yodi ‑glɩ. 21'Nyɩ n ya 'lɛ 'plɩ, n ya 'lɛ Silii ɩya Silisiibhlɩa 'kʋ mʋ. 22‑Ma Zudeebhlɩa 'kʋ 'la ncɛlɩa ‑ɔ -ka 'lɛ Klisi 'la pɔɔtɛtɛ na, 'ta ka kaa 'na 'klʋa 'ciinlɩ, 23'bhlɩmɔɔn ma yaa 'nu lebhe: «Ɔmɔa ‑ɔ saa 'lɛ -anyɩ ‑bɛkadaa gbaylɩ na, ɔ sanɩ ‑pɔtɔnʋ Klisi 'la pɔɔtɛtɛa ɔ mʋnʋa 'lɛ gbatlɩ na, 'la 'dɩa» 24'nyɩ ma gbaa Laagɔ 'klʋ 'na da.
Currently Selected:
Gal 1: NTLD13
Highlight
Share
Copy
Want to have your highlights saved across all your devices? Sign up or sign in
Dida New Testament © Bible Society of Côte d'Ivoire, 2013.