2 Kolt 13
13
Bhɩalɩwɔlɩ ɩya ‑ayopalɩɛ
1‑Mɔtada n cɩ 'ka 'lɛ anyɩ 'bhlɩ ci. Wɔlɩa ‑tɛtɛa, ɩ ‑cɩ 'ka 'lɛ nyɩtɛɔ na, ɩ ‑fata lebhe ɩ kalɩ ‑danʋfʋɛcɩ ‑mɔsɔ ‑aana ‑mɔta. 2N yaa 'mɩɩ tooto nyɩtɛ, daa n cia 'lɛ ‑mɔsɔdaa anyɩ 'bhlɩ na, 'nyɩ ‑yaka, n 'ta 'lɛ anyɩ sidiin ‑kʋ na, n nyɩtɛ ‑awlɩɩ 'lɛ 'nyɩ n cla 'lɛ maa ‑ɔ yaa 'lɛ nyinyi nʋ, ɩya ‑da -naanʋaa 'fɩan lebhe: Gbazɩ n ‑ka anyɩ 'bhlɩ cɔlɔ na, 'n cɩ 'ta 'cisa ci, 3‑masa a ‑wa lebhe a 'ka 'lɩ ɩ ‑ka ‑kʋ lebhe Klisi 'plɩlɩɩn 'kʋ 'nyɩ ɔ nyɩtɛ na. ‑N 'ta le ka ɔ 'ta 'lɛ 'tɛtɩ ‑ka ɩya ɔ 'ka anyɩ klalɩ, ‑ma ka ɔ ‑wa 'lɛ lebhe ɔla 'tɛtɩa kʋ anyɩ nɩkplaan. 4‑Ghɛɛ, daa ma ‑kʋa 'mɔɔ 'lɛ dabhlalɩsua 'ciin bhoda na, ɔ 'taa 'tɛtɩ ‑ka, ‑ma ɔ ‑ja, Laagɔ 'la 'tɛtɩa nɩkplaan. Na, ‑anyɩ ‑masɛɛ, ‑a ‑yɔɔsɔ ya 'lɛ bhlo 'plɩ na, ‑a 'ta 'tɛtɩ ‑ka, ‑ma ‑a ‑yɔɔsɔ cɩ 'ka jabha ala gbʋ, Laagɔ 'la 'tɛtɩa nɩkplaan.
5Anyɩ 'titi, a mʋ acɩ nɩkplaan ɩya a 'ka kope ɩ ‑ka ‑kʋ lebhe a ‑ka pɔɔtɛtɛ na. A 'lɩ 'ta lebhe Zozi Klisi ‑kʋ anyɩ nɩkplaan bha? Ka a 'tɩɩ palalɩɛ mino 'titio na, 6n gugu lebhe a cɩ cibhlili lebhe -a ya ‑anyɩ acɩ pala. 7-A bhibhie Laagɔ le a 'la nʋa wɔɔnyinyi ‑ylɛylɛ. ‑N 'ta wɔɔmɛnɔ ‑a 'matɩlɩ 'ta 'lɛ 'dɛ, ‑ma ka ‑a ‑wa 'lɛ lebhe a nʋ 'nanɩ, ka ‑anyɩ, ‑a 'ta mino 'titio na. 8Sa, ‑a cɩ 'ta Laagɔ 'la ‑nʋawlɛa gbatlɩmʋnʋlɩɛ mino, ‑ma ka ‑tɛɛ ‑a -cɩ ka 'lɛ ɛla lobholia nʋ. 9‑Ghɛɛ, ‑a ‑kʋ pɔlɛkʋmɛmɔɔn daa ‑a cɩ 'ta 'lɛ 'tɛtɩ -kalɩ 'nyɩ anyɩ a ‑ka 'lɛ 'tɛtɩ na. 'Lɩka ɩmɩa ‑a 'clalɩ 'lɛ ‑ala bhibhiea nɩkplaan na: Ɩmɩ ‑ɩ ‑glɩ 'lɛ le a 'plɩ 'kʋnylugolunya. 10Ɩ 'la gbʋ, n ‑kʋ ka ka 'lɛ 'koonko na, dɛ n zie 'lɛ anyɩ ɩmɩ ‑naa le n ‑ka ci na, n 'la ka sɛ anyɩ gblɔɔgblɔɔ kla, 'tɛtɩa ‑Kwlenyɔ 'nyɩɩn 'lɛ na nɩkplaan. Ka ɔ 'nyɩɩn 'lɛ mɩ le n 'ka 'sla, ‑ma ɔ 'ta mɩ 'nyɩ le n 'ka gbɔlʋ.
11Na, ‑pɔtɔnʋ, bholiecɩnyɩ, a kʋ pɔlɛkʋmɛnɔɔn, a 'plɩ 'kʋnylugolunya, a zʋzʋlʋ 'tɛtɩɩn, a 'nununu neen, a kʋ pupueen ɩya ‑walʋ ɩya pupue 'la Laagɔa 'ka anyɩ cɩ kʋ.
12A ŋʋŋɔnʋ acɩ ‑kpacɩ cɩ bholiecɩ 'bhisa ɩya a 'papalɩ ‑ayo. ‑Kplɔkplɔnyaa 'fɩan pa anyɩ ‑ayo.
13'Naa ‑Kwlenyɔ Zozi Klisi 'la 'nyupalɩɛa, Laagɔ 'la ‑walʋa ɩya ‑Kplɔkplɔ ‑Wugoa* ‑ʋ ple 'lɛ ‑anyɩ bhlo na, kʋ anyɩa 'fɩan cɩ.
Currently Selected:
2 Kolt 13: NTLD13
Highlight
Share
Copy
Want to have your highlights saved across all your devices? Sign up or sign in
Dida New Testament © Bible Society of Côte d'Ivoire, 2013.