2 Kolt 12
12
Pɔlʋ nyɩtɛ wɔlɩa Laagɔ palɔɔ 'lɛ na
1Ɩ ‑fata lebhe nclɔɔ 'pa ‑blii! ‑Ma ɩ ‑glɩ 'kpɔkpɔ! 'Bhlɩmɔɔn, n cɩ 'ka ɩmɩa ‑Kwlenyɔa gba 'lɛ 'nyɩ n 'lɩ 'lɛ 'ciin 'nyɩ n cibhlili 'lɛ na ɩla wɔlɩa 'kʋ ci. 2N ‑ci nclɔɔ bhlo, ɔ ‑kʋlʋa Klisi. 'Lɩka liowli 'kʋgba ‑mnɔɔna, Laagɔ ya nclɔɔ ‑naa 'yɛpɩ ‑laagɔɔn 'vʋʋn famʋ. 3Ɔya ɔla 'nyɛkɛa mʋ 'lɛ bha? ‑Ma ‑n 'ta ɔ ‑yɛɛsɛ 'ta 'lɛ mʋ bha? N 'ta ‑ci, Laagɔ ‑tɛɛ ‑cii 'lɛ.
4Laagɔ ya nclɔɔ ‑naa ‑laagɔduun famʋ, 'nyɩ ɔ ya wɔɔnyɩtʋa nclɔɔ cɩ 'ta 'lɛ nyɩtɛlɩɛ mɩno na 'nu. 5Nclɔɔ ‑naa 'la gbʋ, n cɩ ‑blii 'pa, ‑ma ‑ɔ ‑glɩ 'lɛ amʋ na, 'na 'nyɛkɛa 'la cɔbhalɩɛa nɩkplaan ‑tɛɛ n cɩ 'ka 'lɛ 'na ‑bliia 'palɩ. 6'Ayɩ! Ɩ ‑kaa ‑kʋ lebhe n 'matɩa lebhe n 'kaa ‑blii 'paa na, 'n cɩ 'taa pɔɔbhlanyɔ 'plɩ, ‑ma ‑nʋawlɛ ‑tɛɛ n cɩ 'ka 'lɛ nyɩtɛ. ‑Ma 'n cɩ 'ta sɛɛ nʋ ɩya nclɔɔ bhlogbɩɩ 'la ka gugu lebhe n zi ɩmɩa ma ‑jlɛɛn 'lɛ, n nʋ 'lɛ ‑aana ɩmɩa ma 'nunuun 'lɛ neen na 'kʋ.
7Na, sa ɩmɩa Laagɔ palaan 'lɛ na, ɩ ‑glɩ 'lɛ nikpooslaslawɔlɩ na, ma yaan 'kwlɩbhɩɛ 'nyɛkɛɛn zʋ 'nyɩ ma ya 'lɛ Sataan* 'la 'bhlaandlee* bhlo ‑sa le ɔ bhutiin ɩya ɩ 'ka gba ɩya n 'la ka sɛ ‑tutule li. 8Ɩmɩ ‑naa 'la gbʋ, n ya ‑Kwlenyɔ bhibhie dɩ ‑mɔta le ɔ tlʋbhalɩɩn 'kwlɩbhɩɛ ‑naa cɩ da. 9‑Ma ɔ yaan 'cla lebhe: «'Na dananɔa ‑zu ‑naa da, sa 'na 'tɛtɩa, 'nyɛkɛa 'la cɔbhalɩɛ nɩkplaan ɩ palalɩ 'lɛ ɩcɩ.» Na, 'na 'nyɛkɛa 'la cɔbhalɩɛa nɩkplaan n cɩ 'ka 'lɛ 'na ‑bliipalɩɛa zɛlɩmʋ ɩya Klisi 'la 'tɛtɩa 'ka sɛɛn 'kʋ kʋ. 10Ɩla gbʋ na, 'nyɛkɛ ‑kaan cɔbha, ma ‑kaan vla, 'kwlɩ ‑kaan bhɩa, ma ‑kaan gbaylɩsa, 'nyɩ n ‑ka pɔlɛ ple 'titio na, n ‑kʋ pɔlɛkʋmɛnɔɔn, Klisi 'la gbʋ. Sa daa 'nyɛkɛ cɔbhaan 'lɛ na, dɛ n ‑ka 'lɛ 'tɛtɩ.
Pɔlʋ ple Kolɛntɩnyaa 'la pɔlɛ
11'Lɩka n ya pɔɔbhlanyɔ 'plɩ! Anyɩ 'susuoon 'lɛ. Anyɩ ‑ɔ cɩ 'kaa 'lɛ na da nyɩtɛ. Sa, lobhulobhunya* 'kadɩ ‑naa 'taan lʋʋ bhlogbɩɩ nɩkplaan 'kʋzi, ka n 'ta sɛɛ lʋʋ ‑ylɛylɛ ‑glɩ 'titio na. 12Nʋnʋgbɩa nɩkplaan ma cibhlilili 'lɛ lobhulobhunyɔ* na, ɩ ya anyɩ sidiin ‑nʋnʋɔ. Ɩmɩ ‑ɩ ‑glɩ 'lɛ pɔɔklalɩɛa ‑ɩ sɩa 'lɛ gbɩɩnclalɩɛa 'fɩan na, 'ciinzizielɩlobholi, nikpooslaslawɔlɩ, ɩya 'tɛtɩ 'la nʋnʋgbɩ. 13'Lɩsaa ‑daa ncɛlɩa ɔ ‑zʋɔ 'lɛ mala pɔɔtɛtɛa Zozi Klisi 'kʋ na 'lɩa 'lɛ 'nyɩ ma ya 'lɛ anyɩ 'kʋ zi bha? Sa ‑amʋ n 'taa anyɩ ‑dufle li. Na, ka 'na nʋnʋgbɩa 'ta 'kʋnylugolu na, a vaan.
14'Lɩka n ya bhɔsʋa le n 'ka ‑mɔtada anyɩ 'bhlɩ ci 'nyɩ 'n cɩ 'ta anyɩ ‑dufle li. Sa, n 'ta ala 'nanɩa n 'matɩ 'ta 'lɛ, ‑ma anyɩ 'titi. ‑N 'ta cuo ‑ɔ gbɛga 'ta 'lɛ 'dala ma tocɩ 'la gbʋ, ‑ma 'cuotocɩa, maa ‑ɔ gbɛga 'lɛ 'dala mala 'cuoa 'la gbʋ. 15Na, ‑amʋ, n ŋonu le n cɩ 'dalaa ‑sa 'nyɩ n cɩ ‑awlɛ ‑amʋ 'titi ncɩ ‑sa ala gbʋ. Saa n ‑wa 'lɛ ‑sa anyɩ na, 'a cɩ 'taan sɛɛ wabhamʋ bha?
16N 'ta anyɩ 'kʋ kʋlʋ 'bhlɩ, ‑ma n ‑glɩ 'lɛ yooyo nclɔɔ na, 'dɛ n 'ma 'lɛ ‑kplakpla 'nyɩ n ya 'lɛ anyɩ daan 'lɩ. 17Na, maa n lobhu 'lɛ anyɩ 'bhlɩ na, a 'ma ɔmɔa a ‑wa 'lɛ na. N ya bhlo 'kʋ 'plɩlɩ 'nyɩ n ya anyɩ ‑dufle li bha? 18N ya Titi cɩ zɩzlalɩ 'nyɩ n ya 'lɛ ɔya ‑a bholia 'la wɔlɩa n nyɩtɛa 'lɛ na, anyɩ 'bhlɩ lobhu. Na, Titi ya anyɩ ‑dufle li bha? -N 'ta 'wugoa bhlogbɩɩ nɩkplaan ‑a 'ta 'lɛ namʋnʋ bha? N 'ta 'bɩa bhlogbɩɩ ‑a 'ta 'lɛ bhli bha? 19Clɩɩ 'kʋ tooto, anyɩ a gugu lebhe ka ‑a 'tɩtɔlʋ 'lɛ ‑acɩ 'kʋ anyɩ 'ci 'kʋ. ‑Wɔɔ, Laagɔ 'ci 'kʋ, Klisi nɩkplaan ‑a nyɩtɛlɩ 'lɛ. Na, ‑wawabholiecɩnyɩ ka ‑a nʋ 'lɛ ɩmɩ ‑naa 'fɩan ɩya ala pɔɔtɛtɛa 'ka 'ghlibholi. 20Pɔɔvʋ bhlaan, ‑masa n ‑ka ci na, 'n cɩ 'ta sɛ anyɩ saa n ‑wa 'lɛ lebhe a kʋ na ŋeni 'nyɩ anyɩ ‑ma, a cɩ 'ta sɛɛn saa a ‑wa 'lɛ n kʋ na 'lɩ. N cɩ 'ta sɛ nɩkplaandolɩɛ, woze, dɔgbɛ, wɔɔtɩtʋɛ, ‑glaankalɩlɩɛ, 'lɩbhɩlɩbhɩ, ‑tutule, zɔgblɩ anyɩ sidiin ŋenio. 21Pɔɔvʋ bhlaan le gbazɩ n ‑ka ‑awlɛ anyɩ kopekan ci na, 'na Laagɔ 'la ka sɛɛn anyɩ 'ci 'kʋ sʋkpalɩ ɩya maa ‑ɔ ya 'lɛ nyinyi nʋ 'nyɩ ma 'ta ka ‑azla 'lɛ kwlacala ɩya ma 'ka mala nʋnʋgbɩa ‑ɩ 'ta 'lɛ ‑kplɔ, mala yooyogbanʋlɩɛ ɩya mala ‑badaaglʋa bɩ 'kʋ 'wlʋ na, 'wlu 'tulu.
Currently Selected:
2 Kolt 12: NTLD13
Highlight
Share
Copy
Want to have your highlights saved across all your devices? Sign up or sign in
Dida New Testament © Bible Society of Côte d'Ivoire, 2013.