Yakub 1
1
Wak sanna
1Yakub, mo̰r ge Dok ne, ne ge Bageyal Jeso Kris ne, a mbi njaŋge maktub hon pehir ge wol para azi ge ne ɓarse se ma ne. Mbi sá̰ aŋ wak.
Kugiya ma ne pe herra ma
2Mbi ná vya ma, ndi me pe herra ge daage pet ge ne det aŋ pal dimma ne kaŋ ke laar saal gḛ go, 3Aŋ da ne kwarra go, kadɗa hon fareba ge aŋ ne ɓol kugiya ya ɗo mḛ ndiŋ ɗe, e aŋ ɓol wan ta. 4Amma wan ta ge aŋ ne na ke temel ge mbyatɗa tap, go no, aŋ ba kat mbyatɗa tap, be ne fare a̰me eya aŋ pal, be ne woɗegeya a̰me.
Kaɗeya ge hon fareba
5Katɗa ndu a̰me ne aŋ buwal zi woɗege zwama ya, na kaɗe na ne Dok ta, na sḛ ba hon na na, ago na sḛ hon naa pet kaŋ da ne tok lwagar, be mḛreya#Frs 2:3-6.. 6Amma na kaɗe na hon fareba zi, be tumriya. Ago ndu ge ne kat ne tumriya a dimma ne maŋgaɗam ga̰l yuwam sḭḭl ge saam ne in na, ne pot na le may me le may me go. 7Ago ndu hir ge go mbe no, na dwa go na da ne pool ɓol a̰me ne Bageyal ta to. 8Ndu ge go mbe no, a ndu ge dul wak azizi ne, ndu ge ne er fare na kaŋ kerra ma zi ne.
Pe aya ge ndu ge tok pool ne
9Ya̰ ná vya ge woɗegeya uware tene ne Dok ne hé na digi pe, 10ndu ge tok pool ne Dok ne gwa̰ ne na se pe me, ne da pe, mbo kale uzi dimma ne sugur wak ɓoyya go#Isa 40:6-7.. 11Ago gyala det se njiw, til sugur, na wak ɓoyya kan uzi, siŋli ge na ne ban uzi. Ndu ge tok pool mbo ban uzi ne na kaŋ ma go mbe no me.
Kugiya ma ne pe herra
12Ndu ge ne wan tene kugiya ma zi da ne laar saal, ne da pe go̰r kugiya go, na sḛ mbo ɓol balme ge ndwara, na ge Bageyal ne ke nama ge na laar ne wa̰ nama na wak tuli.
13Na kaage ndu a̰me, swaga ge ne det pe herra zi, na jya̰ go: «A Dok he mbi pe ne» to. Ago Dok ne pool ge he ndu pe ndwara e na ke sone to, na sḛ he ndu pe to bat. 14A ene ge ndu ge daage ne zwal na mbo pe herra zi ne, ba lase na. 15Swaga ge ene ne eme ya, tol sone, swaga ge sone ne hatɗa ga̰l, tol siya.
16Mbi ná vya ge laar wanna ma, lase me ta to. Bobo ge kwaɗa ge daage, kaŋ honna ge mbyatɗa tap ge daage, mbo da ne digi zi ya, mbo da ne Bá ge kwaya̰l ta ya, na ge erra ko vareya a̰me ne na to. 17Bobo ge kwaɗa ge daage, kaŋ honna ge mbyatɗa tap ge daage, mbo da ne digi zi ya, mbo da ne Bá ge kwaya̰l ta ya, na ge ne er to, ge kḭḭm a̰me ge vareya ne na ta to. 18Tó nee laar ɓyareya ge na ne zi, ne fare ge fareba ta, ne da pe nee ka kaŋ wak ge zḛ ge ge na kaŋ dolla ma ne.
Za̰ya ɗeŋgo to, amma ne temel kerra
19Ná vya ge laar wanna ma, kwa me go, ndu ge daage na ke fogor ne za̰ya, amma dṵṵl ne janna, dṵṵl ne pore kerra#Bag 7:9., 20ago pore kerra ge ndu ne ke dosol ge Dok ne to. 21Ne pe no ɗe, cigi me kaŋ ge seŋgre ma uzi pet, ne kaŋ ge ne waɗe sone ma uzi pet me. Ame me fare ge Dok ne ge ne ɗū na ne aŋ dulwak zi ne suul, ago da ne pool má aŋ. 22Ká me naa ge za̰ya ma ɗeŋgo to, amma ke me temel fare mbe pal, ne da pe na kaage aŋ ka dale to. 23Ago ndu ge ne za̰ fare, ke temel na pal to, di da ne ndu ge ne ndil na ndwara ne kuturaŋ zi go, 24ndil tene, mbo na mborra, vyale na dir avun cap. 25Amma ndu ge ne hale Eya ge ne mbyatɗa tap pe, na ge ne hat naa suli, ke temel na pal, be ne za̰ya ge ndwara vyale na uzi pe ɗeŋgo to, amma ne ke temel na pal pe, ndu mbe mbo ɓol laar saal na kaŋ kerra ma zi pet.
26Ndu ge ne ndil tene go na ke Dok, kan arjam na wak zi to, lase tene baŋ, na Dok kerra mbe hamba to. 27Dok kerra hatal, ge ne na viya̰ go Báá Dok ndwara se, a ndil kya̰le ma, ne kumur ma yál njotɗa ge nama ne zi#Isa 1:17., ne koy ta ne seŋgre kerra ge daage pet ge ne dunya zi ta me.
Currently Selected:
Yakub 1: FGN2013
Highlight
Share
Copy
Want to have your highlights saved across all your devices? Sign up or sign in
La Bible en langue Kim © Alliance Biblique du Tchad, 2013.