Yakub 2
2
Ké me vareya to
1Mbi ná vya ma, ká me ne vareya a̰me hon fareba ge aŋ ne ge nee Bageyal Jeso Kris ge ne mbya uwareya zi to#Ayu 34:19.. 2Kadɗa ndu a̰me wat ja aŋ zok koteya zi, ne kyaɗa ge dinar na tok zi, ne ba̰r ge siŋli ma na ta, ndu ge a̰se a̰me wat ya ne ba̰r kasagal ma na ta me. 3Kadɗa aŋ e aŋ haŋgal ya ndu ge ne ka̰ ba̰r ge siŋli ta, aŋ jan na go: «Mo ɗe, ka swaga ge hormo mbe no go,» aŋ jan ndu a̰se go: «Mo ɗe mḛ digi, ko ka mbi koo se ya go.» 4Swaga ke go mbe no go, aŋ te ke vareya to’a? Aŋ te be naa ge kun sarya ge ne dwatɗa ge sone ma ne to’a?
5Zá̰ me gale, mbi ná vya ge laar wanna ma! Te be Dok tá naa ge dunya ma ne ndil nama naa ge a̰se ma ne ndwara saŋge nama naa ge njwanjway hon fareba zi ndwara go nama za muluk ge na ne ke wak tuli hon na naa ge laar wanna ma na ne to’a? 6Amma aŋ ɗe, aŋ ndil naa ge a̰se ma kaŋ senna. Te be naa ge gan ma ke aŋ yál ne to’a? Te be nama zwal aŋ mbo swaga sarya ma go ne to’a? 7Te be nama sal dḭl ge kwaɗa ge a ne ho̰ aŋ na ne to’a? 8Amma, kadɗa aŋ ke mborra Eya ge muluk ne pal dimma ne njaŋgeya pal go: «Mo laar wa̰ mo kon dimma ne mo laar ne wa̰ tene go.» Aŋ ke kwaɗa. 9Amma kadɗa aŋ ke vareya naa buwal zi, aŋ ke sone, Eya wan aŋ wan dimma ne aŋ ne naa ge ya̰l ma ne go. 10Ago, kadɗa ndu koy Eya ma ya mwaɗak ɗo, yele a̰me ɗu pala, saŋge ya̰l ge may ma ta pet. 11Ago, Bage ne jya̰ go: «Mo gale ke zina ɓaca», a na sḛ gwan jan ne go uwale: «Mo gale hun siya ɓaca#Wat 20:14, Dwa 5:18, Wat 20:13, Dwa 5:17..» Kadɗa mo be ke zina to, amma mo hṵ siya ɗe, mo yele Eya pala. 12Jya̰ me fare ne ke fare ma dimma ne naa ge a ne mbo kun sarya nama pal ne Eya ge kat suli ne go. 13Ago ndu ge ne kwa naa a̰se to, a mbo kun na sarya be kwa a̰se, ndu ge ne kwa naa a̰se cot tene ne sarya kunna cot.
Hon fareba ne temel kerra
14Mbi ná vya ma, a ma hamba ne ge ndu jan go, mbi da ne hon fareba, kadɗa na ne temel kerra to. Na hon fareba mbe da ne pool ge má na ɗaa? 15Kadɗa ná vya ge son, ko ge gwale ne kaŋ a̰me ge lar na pe to, ko ne kaŋzam ge zamma dam ne dam to, 16kadɗa ndu a̰me ne aŋ buwal zi jan nama ya go: «Mbo me ne halas, ká̰ me ba̰r ge dṵṵl ma aŋ ta, zá me kaŋzam mbyatɗa!» Be ge aŋ hon nama kaŋ ge ne mbya ma to, aŋ mba nama da ne da ɗaa? 17Hon fareba go no me. Kadɗa na ke temel to, na sḛ su su. 18Ndu a̰me da ne pool jan go: «Mo, mo da hon fareba, mbi me, mbi da temel kerra!» Ŋgay mbi hon fareba ge mo ne ge be temel kerra, mbi sḛ me, mbi ba ŋgay mo temel kerra ge mbi ne ge ne ŋgay hon fareba ge mbi ne. 19Mo ɗe, mo ho̰ fareba go Dok ɗu kikit, mo ke kwaɗa. O̰yom ge seŋgre ma puy a da ne hon fareba mbe go me, a ndat ndat#Mat 8:29, Mar 1:24, 5:7, Luk 4:34, 1Tim 4:1. .
20O ndu ge pala tṵ! Mo ɓyare kwa go, hon fareba be temel kerra na a̰me pe ne to’a? 21Nee bá Abraham Dok ndi go na ndu ge dosol ne da ne na temel kerra ta to’a? Te be tyare na vya Isaku twal tuwaleya pal to’a#Pe 22:9.? 22Ndi gale, hon fareba ge na ne ma ne na temel kerra a ka ke temel dagre. Da ne na temel kerra ma ta hon fareba ge na ne wak dé ya wiya no. 23A go no, fare njaŋgeya wak wi no, na ge ne jya̰ go: «Abraham ho̰ fareba Dok ta, Dok ndi na no go na ndu ge dosol ne,» tó na no go na na kondore ne#Pe 15:6, Isa 41:8, 2Maa 20:7.. 24Ndi me gale, da ne temel kerra ma ta Dok ndi no go ndu dosol, a be ne hon fareba ta ɗeŋgo to.
25Ke ne gwale kaya Rahab go no me. Da ne na temel kerra ma ta Dok ndi no go na ndu ge dosol ne. Ago na sḛ ame naa ge temeya ma ge Israyela ma ne na yadiŋ, e nama gwanna ne viya̰ ge ɗogle no#Jus 2:1-21.. 26Dimma ne duur ge be o̰yom ne na zi ne su go, hon fareba ge be temel kerra su su.
Currently Selected:
Yakub 2: FGN2013
Highlight
Share
Copy
Want to have your highlights saved across all your devices? Sign up or sign in
La Bible en langue Kim © Alliance Biblique du Tchad, 2013.