Yakub Fare pala hageya
Fare pala hageya
Bage ne njaŋge Maktub ge Yakub ne ŋgay tene go na mo̰r ge Dok ne, ne ge Bageyal Jeso Kris ne (1:1). Naa gḛ a ɗaŋgre ta ge ndu ge ne njaŋge maktub mbe no pal. Amma swaga hale fare ma pe go, a ɓo go na Yakub ge Jeso ná vya (Mat 13:55, Mar 6:3), na ge Jeso ne dya̰ tene na ta go̰r tanna ge na ne go (1Kor 15:7), ge ne ka swaga koteya ge ɓase ge Dok ne ma ge ne Ursalima go ma pal (Tkm 12:17, 21:18, Gal 1:19, 2:9,12). A na ɗame koteya ge ga̰l ge suwal Ursalima go ne (Tkm 15:13), na sḛ ka ndu ga̰l ge Dok ne.
Njaŋge na maktub mbe hon naa ge hon fareba ma pet, be njaŋge na hon suwal a̰me ɗu ɗeŋgo to. Na del ge ne njaŋge na naa ne na kwarra go tem to, fare ɗaŋgreya ma ne na pal gḛ. Na jo̰ maana ma jan go na su del wara myanaŋgal para azi (62) go ɗe, ago na sḛ njaŋge na maktub mbe ge del mbe no ndwara zḛ.
Maktub ge Yakub ne sore, amma jya̰ fare ma ne zi gḛ. E pe janna go naa ɓol zwama da ne Dok ta, ndu ge ne ɓyare zwama na kaɗe na ne Dok ta hon fareba zi, Dok ba hon na na (1:2-8, 3:13-18). Ho̰ hateya ma no pe hini hini: a̰se ma ne gan pal (1:9-11), nee ɓol pe herra da ne dwatɗa ge nee ne ge sone ma ta (1:12-18), ndu ge Dok ne ge fareba kat da ne fare za̰ya pe ɗeŋgo to, amma ke temel fare ge Dok ne ge na ne zá̰ pal (1:19-27). Uwale, Yakub mḛre nama ge ne ke vareya naa ge a̰se ma ne naa ge gan ma buwal zi ma no (2:1-13), uwale, jan no go, ndu ge ne ho̰ fareba kwa naa a̰se, hon fareba ge na ne e na ke temel (2:14-26). Go no, ke kwarra go, ndu ge ne koy na wak a ndu ge ne Dok ne ne (3:1-12). Gwan mḛre naa no, ne ene ge nama ne ge ne e nama ke gool pe, hateya ma ne swaga mbe zi pe hini hini (4:1-10), moɗege naa no, na kaage nama kṵ sarya nama ná vya ma pal to (4:11-12), mḛre naa ge gan ma ge a ne e bama saareya bama kaŋ gan ma pal, a ka ke bama ná vya ma yál ma no (4:13—5:6). Á na fare da ne moɗegeya ma, ge wan ta pal, ne kaɗeya pal, ne mbar ta O̰yom zi pal me (5:7-20).
Maktub ge Yakub ne ke nee kwarra go, Dok kerra fá far ne wak ɗeŋgo to, amma a temel kerra, a ne ga ne jan go: «Hon fareba be temel kerra su su» (2:26).
Currently Selected:
Yakub Fare pala hageya: FGN2013
Highlight
Share
Copy
Want to have your highlights saved across all your devices? Sign up or sign in
La Bible en langue Kim © Alliance Biblique du Tchad, 2013.