FILIPAI 3
3
Na Yalosavasava Dina
1Me'u tinia, kemuni na wekaqu, ni reki ka marau ena nomuni sa tu vata kei na Turaga! E sega ni ka ni oca vei au me'u vola tale yani na veika au a sa vola oti e liu, ka ni na vinaka cake sara vei kemuni oqo. 2Ni qarauni kemuni vinaka mai vei ira na daucaka ca, o ira na koli, o ira na tamata era sa dau cikeva me tavalaki na yago. 3Ni sai keda ga oqo, e sega ni o ira, ka sa yaco vei keda na veicilivi dina, ni da sa qarava na Kalou ena veiliutaki ni Yalo Tabu ka sa noda vata na marau ni da sa tu vata kei Karisito Jisu. Eda sa sega ga ni vakararavi ki na veika vakayago, 4ka dina ga ni sa rawa vei au me'u vakararavi ki na veika oqo.
Ia kevaka e dua sa nanuma ni sa tu vua na ka me vu ni nona vakararavi ki na veika vakayago, sa levu sara na kena era tu oqo vei au: 5#Roma 11.1; Caka 23.6; 26.5Au a cilivi ena i kawalu ni siga ni noqu bula. Au kai Isireli ena noqu sucu, mai na yavusa i Penijamini, ka'u dra dina vakaiperiu. Ena veika me baleta na kena muri na Lawa vaka-Jiu, ka'u a dua vei ira na Farisi. 6#Caka 8.3; 22.4; 26.9-11Ena veika me baleta na kena cuqeni vagumatua sara na vakabauta vaka-Jiu, au a vakacacana kina na i soqosoqo lotu Vakarisito. Ena veika me baleta na nona vakadonui e dua mai na kena muri na Lawa, au a sega ni beitaki rawa ena dua na cala. 7Ia na veika kece ka'u a dau taleitaka e liu au sa okata oqo me ra tawayaga ena vuku i Karisito. 8E sega walega ni o ira na veika oqori; au sa okata na veika kece sara me ra tawayaga ni vakatauvatani vata kei na kena rui talei na veikilai kei Karisito Jisu na noqu Turaga. Au sa biuta tani na ka kecega ena vukuna; ka'u sa okata me ra benu, me noqu ga kina na Karisito, 9ka me keirau sa veisemati dina sara. Sa sega kina ni tu vei au na veivakadonui ena vukuqu ga, ka sa rawati oqo mai na kena vakamuri na Lawa. Sa tu ga vei au oqo na veivakadonui sa soli ena vuku ni vakabauti Karisito, na veivakadonui sa taka mai vua na Kalou ka yavutaki ena vakabauta. 10Au sa gadreva me'u kilai Karisito kei na kaukauwa ni nona tucake tale mai na mate, ka me'u wasea vata kei koya na nona rarawa, ka me'u vakataki koya ena nona mate, 11ena vuku ni vakanuinui me'u na vakaturi cake talega vakakina oi au mai na mate ki na bula.
Sasaga me Rawati na i Cocovi
12Au sa sega ni kaya ni'u sa rawata kece sara na veika oqo, se'u sa vinaka sara. Ia ka'u sa tovolea tikoga me'u rawata na i cocovi ka sa qaqa oti kina ko Karisito Jisu ena vukuqu, ni sa rawati au me'u nona vakadua. 13Kemuni na wekaqu, au sa sega sara ni tukuna ni'u sa rawata oti; ia e dua ga na ka au sa cakava, o ya me'u guilecava na veika sa sivi ka'u tovolea ena noqu i gu taucoko me'u rawata na veika sa tu mai liu. 14O koya oqo ka'u sa cici vakadodonu sara kina ki na kena i cavacava me'u rawata kina na ulu ni cocovi, o ya na kaci ni Kalou ena vuku i Karisito Jisu me baleta na bula mai cake.
15Oi keda kece eda sa matua vakayalo sa dodonu me tu vei keda na i tovo ni rai vakaoqo. Ia kevaka eso vei kemuni e dua tani na i tovo ni nomuni rai, ena qai vakamatatataka ga vei kemuni na Kalou. 16Ia me da toso tikoga ki liu, me vaka na i vakarau eda sa muria tiko mai ka yacova mai na gauna oqo.
17 #
1Kori 4.16; 11.1 Kemuni na wekaqu, ni vakadamurimuri au tikoga. Ni muri ira talega o ira sa bulataka tiko na i vakarau ni bula keitou a sa vakaraitaka oti vei kemuni. 18Au a sa tukuna oti vakavuqa vei kemuni eliu, ia au sa tukuna tale oqo kei na tonawanawa ni mataqu: na nodra i valavala ni bula e lewe vuqa sara sa vakavuna me ra veimecaki kei na mate i Karisito ena kauveilatai. 19Era na tini dina ga ki eli o ira oqo, ni sa nodra kalou na gagadre ni yagodra, ni ra sa dau dokadokataka na ka e dodonu me ra maduataka, ka ra sa dau vakasamataka ga na veika ni bula oqo. 20Ia oi keda, eda sa lewe ni koro mai lomalagi, ka da sa waraka tikoga ena yalo nanamaki na noda i Vakabula, na Turaga ko Jisu Karisito me lako mai lomalagi. 21Ena qai veisautaka o koya na yagoda malumalumu oqo, na yago sa rawa ni mate, me vukici me vaka na yagona lagilagi; ena nona vakayagataka na kaukauwa sa rawa kina vua me kauta kina na ka kecega ki na ruku ni nona lewa.
Currently Selected:
FILIPAI 3: FNV
Highlight
Share
Copy
Want to have your highlights saved across all your devices? Sign up or sign in
Fijian New Version Bible, Revised Edition © Bible Society of the South Pacific, 2017, 2021.