FILIPAI 2
2
Na Yalo Malumalumu i Karisito kei na Nona Cecere
1Ia me vaka ni sa vakayaloqaqataki kemuni na nomuni tu vata kei Karisito, ka sa vakacegui kemuni na nona loloma, ka o ni sa veitokani vata tiko ena Yalo Tabu, ka sa tu vei kemuni na yalomatua kei na veilomani, 2au sa vakamasuti kemuni mo ni vakamarautaki au dina sara, me tautauvata na i vakarau ni nomuni vakasama, kei na nomuni tiko veilomani ka mo ni lomavata ka yalo vata tiko. 3Ni kakua ni cakava e dua na ka ena yalo ni nanumi koya ga vakai koya, se ena yalo dokadoka, ia mo ni yalo malumalumu ga ka dau okati ira na tani me ra uasivi cake vei kemuni. 4Me ra kakua ni dui nanuma ga na tamata yadua na veika e baleti ira, ia me ra dau nanuma talega na veika e baleti ira na tani. 5E dodonu me tiko vei kemuni na i tovo ni rai e tiko vei Karisito Jisu:
6Ni sa tiko ga vua ena veigauna kece na i tovo ni Kalou,
ia sa sega ga ni suguraki koya yani me rau tautauvata kei na Kalou.
7A sa biuta vakatikitiki na veika kece sa taukena,
ka sa matanataka na bula ni dauveiqaravi.
A sa vaka na i tovo ni tamata
ka sa rairai mai ena yago vakatamata.
8A sa vakayalomalumalumutaki koya
ka sa talairawarawa me mate — io me mate e na kauveilatai!
9O koya oqo sa laveti koya cake kina na Kalou ki na vanua cecere sara
ka sa solia vua na yaca sa uasivia na veiyaca kecega,
10 #
Aisea 45.23 (LXX) Me ra tekiduru kina ena yaca i Jisu na duru vakayadua ga,
mai lomalagi kei vuravura kei na ruku i vuravura,
11ka ra na vakatusa na yame kecega ni sa Turaga ko Jisu Karisito,
Me vakarokorokotaki kina na Kalou na Tamada.
Cila Serau me Vaka na Cina ni Vuravura
12O koya oqo kemuni na wekaqu lomani, me vaka ni o ni a dau talairawarawa vei au ena gauna eda se tiko vata kina, e bibi cake sara mo ni muria na noqu vosa ena gauna eda sega ni tiko vata kina me vakaoqo. Ni vakacavara vakavinaka na cakacaka ni nomuni vakabauta ena rere kei na sautaninini, 13baleta ni sa dau cakacaka tikoga na Kalou ena kemuni maliwa me vukei kemuni mo ni taleitaka ka talairawarawa ki na i naki ni lomana.
14Mo ni kakua ni cakava e dua na ka ena vosa kudrukudru se veileti, 15#Vrua 32.5me rawa kina mo ni yalosavasava ka sega ni beitaki ena dua na cala me vakataki ira na luve ni Kalou sa sega na nodra cala era sa bula voli ena kedra maliwa na i tabatamata lomatakelo ka i valavala ca. E dodonu mo ni cila serau ena kedra maliwa me vaka na kalokalo era sa vakararamataka na lomalagi, 16ena nomuni sa solia tiko vei ira na i tukutuku ni bula. Kevaka o ni vakayacora o ya, sa na rawa kina vei au me'u cibitaki kemuni ena Siga i Karisito, baleta ni na vakatakila o ya ni sa sega ni maumau wale na noqu i gu kei na noqu cakacaka.
17Kevaka sara mada ga au na mani vakamatei ena vukumuni, ka sovaraka na noqu dra me i kuri ni nomuni i soro vua na Kalou ena vuku ni nomuni vakabauta, au sa na reki dina sara ka marau vata kina kei kemuni yadua. 18Me vaka talega kina oi kemuni, mo ni reki ka marau vata kei au.
O Timoci kei Epafirotaito
19Kevaka sa vakakina na loma ni Turaga, au na talai Timoci yani vei kemuni ena dua na gauna walega oqo, ka me na mai vakaceguya na yaloqu na kemuni i tukutuku. 20E sega tale ni dua e tiko vei au me kauwaitaka dina na veika e baleti kemuni me vakataki koya. 21Era sa dui kauwaitaka ga na tamata yadua na ka e baleti ira, ka sega na veika e baleti Jisu Karisito. 22Oi kemuni sara mada ga vakai kemuni, o ni sa vakadinadinataka na nona yaga, ena neirau a cakacaka vata ena vuku ni kosipeli, me vaka e dua na tama kei na luvena. 23O koya oqo au sa nanuma kina me'u na talai koya yani vei kemuni ena gauna ga au sa kila rawa kina na veika me baleti au. 24Ia au sa vakanuinui tiko vua na Turaga ni na rawa me'u lako yani vei kemuni ena dua ga na gauna lekaleka oqo.
25Au nanuma talega ni sa ganita me'u tala yani na wekada o Epafirotaito, o koya keirau a veiqaravi vata ka vala voli e yasaqu, ka a kauta mai na nomuni i tukutuku ena nona mai vukei au. 26Sa gadreva vakalevu o koya me raici kemuni kece sara, ka sa rarawa na yalona ni o ni la'ki rogoca ni a tauvimate. 27Io sa tauvimate dina o koya ka voleka sara ni mate. Ia sa yalololoma vua na Kalou, ka sega ni vei koya taudua ga, sa yalololoma talega vei au ka sega kina ni vakaikuritaka na noqu rarawa ena dua tale na ka. 28O koya oqo sa gu sara kina vakalevu na lomaqu, me'u talai koya yani vei kemuni, mo ni na marau kina ni o ni sa raici koya tale, ka sa na seyavu talega kina na noqu rarawa. 29Ni ciqomi koya, io, ena yalo marau, me vaka ni sa wekada o koya ena vuku ni Turaga. Ni dokai ira kece talega na tamata era sa vakataki koya, 30baleta ni a voleka sara ni mate ena vuku ni cakacaka i Karisito, ni sa solia ga na nona bula me mai qarava na veivuke eso ka sa sega ni rawa mo ni vakayacora.
Currently Selected:
FILIPAI 2: FNV
Highlight
Share
Copy
Want to have your highlights saved across all your devices? Sign up or sign in
Fijian New Version Bible, Revised Edition © Bible Society of the South Pacific, 2017, 2021.