FILIPAI 4
4
Na i Vakasala eso
1O koya oqo, kemuni na wekaqu, o ni sa rui ka vakamareqeti kina vei au ka'u sa nanumi kemuni vakalevu! Sa ka levu na nomuni vakamarautaka na yaloqu, ka'u sa cibitaki kemuni dina sara! Sa i koya kina oqo, kemuni na wekaqu, na veika mo ni vakayacora me rawa ni o ni tudei kina ena nomuni bula vata kei na Turaga.
2Au sa vakamasuti rau o Uotia kei Sainitiki me rau lomavata ena vuku ni Turaga. 3Au sa kerei iko talega, na noqu i tokani yalodina, mo vukei rau na yalewa oqo ka ni keitou a cakacaka vata sara vakaukauwa ena kena vakatetei na kosipeli, oi keitou vata kei Kelemedi kei ira kece talega na vo ni noqu i tokani dauveiqaravi, ka sa volai tu na yacadra ena i vola ni bula ni Kalou.
4Ni reki tikoga ena nomuni sa tu vata kei na Turaga. Au sa kaya tale: ni reki tikoga!
5Me laurai vei kemuni na i tovo ni rai sa yavutaki ena yalomalumalumu. Sa voleka mai na Turaga. 6Ni kakua ni lomaleqataka e dua na ka, ia na ka kece sara o ni vinakata mo ni kerea ga vua na Kalou ena masu kei na vakavinavinaka. 7Ia na vakacegu ni Kalou, sa uasivia na kila-ka vakatamata, ena vakataudeitaka na yalomuni kei na lomamuni ena vuku i Karisito Jisu.
8Me'u tinia kemuni na wekaqu, ni tugana ena nomuni vakasama na veika kecega e vinaka ka dodonu me vakacaucautaki; o ya na veika e dina, na veika e vakaturaga, na veika e dodonu, na veika e savasava, na veika e totoka ka dau dokai. 9Ni vakayacora na veika o ni sa vulica ka raica vei au, o ya mai na veika au sa tukuna kei na veika au sa cakava. Ena qai tiko vata kei kemuni na Kalou sa dauveivakacegui.
Vakavinavinakataki na i Loloma
10Au sa marau dina vakalevu ena Turaga ni sa qai vakavoui tale na nomuni kauwaitaki au vakaoqo. Au sega ni kaya ni a sa mai mudu na nomuni kauwaitaki au, ia sa sega ga na gauna mo ni vakaraitaka rawa kina. 11Au sega talega ni kaya tiko oqo me dusia ni'u gadreva na veivuke; ni'u sa vulica oti me'u ciqoma ga ena yalo vakacegu na veika cava ga sa tu vei au. 12Au sa kila na bula dravudravua ka'u sa kila talega na bula vutuniyau. Au sa vulica na i walewale ni bula vakacegu ni sotavi na veidraki ni bula duidui eso, se'u viakana se'u mamau, dravudravua se'u vutuniyau. 13Au sa rawa ni sotava na veidraki ni bula kecega ena vuku i Karisito, o koya sa vakaukauwataki au.
14Ia sa vinaka dina na nomuni mai vukei au ena gauna au a leqa tu kina. 15O ni sa kila vinaka tu na kai Filipai ni sai kemuni ga na i soqosoqo lotu o ni a vukei au ena noqu lako mai Masitonia, o ya ena gauna e se qai tekivutaki kina na vunautaki ni Tukutuku Vinaka. Oi kemuni ga o ni a vukei au ena veika e vakacurumi mai kei na veika me saumi. 16#Caka 17.1 #2Kori 11.9E na noqu tiko mai Cesalonaika, o ni a vakauta yani kina vakavica na nomuni ka ni veivuke vei au. 17E sega ni vuna oqo ni'u via vaqaqara i loloma ga; ia, au gadreva ga me'u raica me wili vei kemuni na vua ni nomuni vakabauta. 18#Lako 29.18Sa tu oqo na risiti ni veika kece o ni solia mai vei au — ka sa sivia tale! Na ka kece sara au gadreva sa tu oqo ni sa kauta kece mai o Epafirotaito na nomuni ka-ni-loloma. Era sa vaka e dua na ka-ni-vakacaboisoro boi vinaka vua na Kalou, ai madrali sa vakadonui ka vakalomavinakataka na Kalou. 19Ia na noqu Kalou ena sotava na nomuni gagadre kecega me vaka ni sa vutuniyau vakalevu sara o koya ena vuku i Karisito Jisu. 20Me ia vua na noda Kalou ka Tamada na vakarokoroko ka sega ni mudu! Emeni.
Vakadewataki na i Loloma
21Au sa loloma yani vei ira kecega era sa nei Karisito Jisu. Era sa loloma yani vei kemuni na noda i tokani era sa tiko vata kei au. 22O ira kece na tamata ni Kalou era tiko eke era sa loloma talega yani, ka vakabibi o iratou na tiko ena valenitui nei Sisa.
23Me tiko vata kei kemuni kece sara na lolomasavu ni noda Turaga ko Jisu Karisito.
Currently Selected:
FILIPAI 4: FNV
Highlight
Share
Copy
Want to have your highlights saved across all your devices? Sign up or sign in
Fijian New Version Bible, Revised Edition © Bible Society of the South Pacific, 2017, 2021.