2 Timoci 3
3
Na Veisiga Emuri
1Mo kila talega oqo, ni na yaco mai na gauna dredre eso ena veisiga emuri. 2O ira na tamata era na daunanumi ira vakataki ira ga, era na dauvinakata na i lavo, era na dokadoka ka qaciqacia, era na sega ni dokai ira na nodra i tubutubu, era na sega ni dau via vakavinavinaka, era na sega ni daulotu, 3era na sega ni dau kauwaitaki ira na tamata, ena kaukauwa na nodra i vakarau, era na dauveibeitaki vakailasu, era na daucudrucudru; era na cata na veika e vinaka; 4era na dauveidabui, era na dui vakayaco lomadra, era na sinai ena dokadoka; era na dau lomana ga na marau ka sega ni lomana na Kalou; 5Era sa vakayacora me ka vakarairai ga na nodra lotu ka sega ni ka mai na yalodra dina. Kakua ni dau veitokani kei ira na tamata vakaoqo. 6Eso vei ira era sa dau lako ki na veivale ka rawai ira na yalewa malumalumu vakayalo era se bikai tu ena nodra i valavala ca ka lewai mai na nodra gagadre ca e vuqa, 7o ira na yalewa ka ra sa dau tovolea vakaukauwa me ra vakavulici, ia era sa sega ga ni kila rawa na ka dina. 8#Lako 7.11Me vaka na nodrau saqati Mosese o Jani kei Jabari, era sa saqata vakakina na ka dina na tamata vakaoqo. Sa tauvimate na nodra vakasama ka sega ni vakadonui na nodra vakabauta. 9Ena sega ni balavu sara na nodra toso, baleta ni ra na raica na tamata kecega na nodra lecaika. Sa i koya o ya na ka sa yaco vei Jani kei Jabari.
Na i Otioti ni Vakaro vei Timoci
10Ia o iko, o sa dau muria na noqu i vakavuvuli, na noqu i tovo, na i naki ni noqu bula, na noqu vakabauta, na noqu vosota vakadede, na noqu loloma, na noqu vosota na veika dredre, 11#Caka 13.14-52; Caka 14.1-7; Caka 14.8-20na vakacacani ni noqu vakabauta, kei na noqu vakararawataki mai na veika ka'u a sota kaya mai Anitioki, kei Ikoniona, kei Lisitira. Sa ka levu dina sara na veivakararawataki ka'u sa curuma rawa! Ia sa vakabulai au na Turaga mai na veika kece oqori. 12O ira yadua sa gadreva me ra bulataka na bula vakalou ena vuku i Karisito Jisu era na vakacacani. 13Ia ena toso cake ga vakalevu na nodra veidabui kei na veivakacalai o ira na tamata ca kei ira na dauvosalasu, ni ra sa vakacalai ira eso ka vakacalai ira vakai ira talega. 14Ia o iko, mo tudei tikoga ena veika dina o sa vakavulici kina, ka vakadinata baleta ni o sa kilai ira sa vakatavulici iko. 15Ni o sa kila rawa na i Vola Tabu o iko mai na gauna o se gone kina, ka sa vakavukui iko na ka oqo me nomu rawa kina na bula ni o sa vakabauti Karisito Jisu. 16Ni sa ceguva na i Vola Tabu kecega na Kalou, a sa yaga oqo me ia kina na veivakavulici, me vunauca na ca, me vakadodonutaka na cala, me ia kina na veituberi ena valavala dodonu, 17ka me yaco kina vua na tamata ni Kalou me vakarautaki koya vinaka sara ki na kena cakacakataki na veika vinaka kece sara.
Currently Selected:
2 Timoci 3: FNVDC12
Highlight
Share
Copy
Want to have your highlights saved across all your devices? Sign up or sign in
Fijian New Version including Deuterocanonical Books © Bible Society of the South Pacific, 2012.