2 Timoci 2
2
Na Sotia Vinaka i Jisu Karisito
1I Timoci na luvequ, mo vakaukauwataki ena loloma-savu sa noda ena noda tu vata kei Jisu Karisito. 2Mo maroroya na i veivakavuvuli o sa rogoca niu vunautaka ena matadra e lewe vuqa na i vakadinadina, ka vakadewataka vei ira na tamata nuitaki, o ira era rawa me ra na vakavulici ira talega na kena vo.
3Mo vosota na veika dredre o sotava me vaka e dua na sotia yalodina i Karisito Jisu. 4Na sotia e veiqaravi voli vakaivalu sa dau vinakata me vakalomavinakataki koya na nona turaganivalu ka sa sega kina ni vakaogai koya tale ena ka ni bula raraba. 5Na dauqito e qitora e dua na qito sa sega sara ni rawata rawa e dua na i covi kevaka e sega ni muria na lawa ni qito. 6Na dauteitei sa cakacaka vakaukauwa e dodonu me na kania taumada na i sevu ni vua ni qele. 7Mo vakasamataka mada na veika ka'u sa kaya oqo vei iko, baleta ni na vukei iko na Turaga mo kila na ka kece sara.
8Mo nanumi Jisu Karisito, o koya sa vakaturi cake mai na mate, a sa vu mai na kawa i Tevita o koya, me vaka sa tukuni ena i Tukutuku Vinaka au sa vunautaka. 9Ena vuku ni noqu vunautaka voli na i Tukutuku Vinaka, au sa vakararawataki kina ka'u sa vesuki sara kina ena sinucodo me vaka e dua na kaivesu. 10Ia ena vukudra na digitaki ni Kalou, au sa rawa ni vosota kina na veika oqo me ra rawata kina na lagilagi kei na veivakabulai tawamudu sa tu vei Karisito Jisu. 11Sa dina sara na vosa oqo:
“Kevaka eda sa mate vata kei koya,
Eda na bula vata talega kei koya.
12 #
Maciu 10.33; Luke 12.9 Kevaka eda sa vosota tikoga,
Eda na lewa vata talega kei koya.
Kevaka eda sa cakitaki koya,
Ena cakitaki keda talega o koya.
13Kevaka eda na sega ni yalodina,
Sa yalodina tikoga o koya,
Baleta ni sa sega ni rawa ni lasu o koya vakai koya.”
Na Tamata Cakacaka sa Vakadonui mai Vua na Kalou
14Mo vakananumi ira tikoga na tamata ena ka oqo, ka vakaroti ira matua ena mata ni Kalou me ra kua ni veiletitaka na vosa. Sa sega na kena yaga oqo, ia sa veivakaleqai ga vei ira sa rogoca. 15Gumatua sara mo rawata na veivakadonui sa taucoko sara ena mata ni Kalou, me vaka na tamata daucakacaka sa sega ni maduataka na nona cakacaka, ka sa dau kaya vakadodonu na i tukutuku dina ni Kalou. 16Mo lako tani mai na veivosaki lialia kei na veitalanoa vakasisila, ni veika oqo sa vakavuna ga me ra gole tani kina mai vua na Kalou o ira na tamata. 17Na nodra i vakavuvuli vakaoqo sa vaka e dua na mavoa sa tadola tu ka sa kania vakamalua tiko na lewe ni yago. Oi rau na lewe rua ka vakatavuvulitaka tiko na veika oqo sai rau o Imeneo kei Filito. 18E rau sa gole tani mai na ka dina, ni rau sa kaya voli ni sa vakayacori oti na noda tucake tale mai na mate. A sa vakaleqai kina na nodra vakabauta eso. 19#Tiko 16.5Ia na yavu tudei sa virikotora na Kalou sa sega ni yavalati rawa, ka sa volai kina oqo: “Na Turaga sa kilai ira era sa nona” kei “O ira yadua era sa tukuna ni ra sa nona na Turaga e dodonu me ra vuki tani kece sara mai na nodra caka ca.”
20Ena loma ni dua na vale levu, sa sega walega ni tu kina na veibilo koula kei na veibilo siliva; ia sa tu talega kina na bilo kau kei na bilo qele, eso me vakayagataki ena veisoqo lelevu ka so me vakayagataki ena veisoqo lalai. 21O ira kece na tamata sa vakasavasavataki ira mai na veika ca oqo era na vakayagataki me ra bilo digitaki me vaka na kedra dui i naki, ka ra sa vakatabui me ra yaga vua na nodra Turaga, ka vakarau tu me ra vakayagataki ena veicakacaka vinaka kecega. 22Mo dro tani mai na veigagadre ca vakacauravou, ia me goleva ga na lomamu na yalododonu, na vakabauta, na loloma, kei na vakacegu, ka mo cakava oqo vata kei ira sa dau kerea na veivuke ni Turaga ena nodra dau masuti koya ena yalosavasava. 23Tarovi iko mai na veileti lialia ka tawayaga; o sa kila ni ra sa vakavuna na veivala. 24Me vaka ni o sa dauveiqaravi ni Turaga, sa sega kina ni dodonu mo ia na veileti. Sa dodonu ga mo yalovinaka vei ira na tamata kecega, ka mo qasenivuli vinaka ga ka dauvosota, 25ka vakatavulici ira na kemu meca ena yalomalumalumu. De na qai solia vei ira na Kalou na gauna me ra veivutuni kina ka kila na ka dina, 26ni ra sa kilai yalodra tale mai ka dro bula mai na dai ni tevoro, o koya ka sa vesuki ira tu me ra cakava na lomana.
Currently Selected:
2 Timoci 2: FNVDC12
Highlight
Share
Copy
Want to have your highlights saved across all your devices? Sign up or sign in
Fijian New Version including Deuterocanonical Books © Bible Society of the South Pacific, 2012.