Jona 3
3
Profet Jona hemi obeim Yawe
1Yawe hemi talemaot moa Mesij blong hem long Profet Jona. Hemi olsem, 2“Yu go long bikfala taon long Nineve, an talemaot disfala Mesij wea mi givim long yu.” 3Distaem, Jona hemi go long Nineve olsem Yawe hemi bin talem long hem. Taon ya hemi bikfala tumas wea hemi save tekem trifala de fo wakabaot insaet long hem. 4Long fas de, taem hemi wakabaot insaet long taon, hemi singaot olsem, “!Bifoa fotifala de hemi finis, yufala mas lusim ravis wei blong yufala, nogud bae God hemi lusim yufala an barava spoelem yufala!”#Matiu 12:41; Luk 11:32.
5Olketa pipol blong Nineve i bilivim Mesij ya blong God. Nomata man hemi garem biknem o nomoa, olketa evriwan i stop from kaikai an werem ravis kaleko fo somaot dat olketa sore tumas.
6Taem king blong Nineve hemi herem disfala nius, hemi somaot tu dat hemi sore tumas. Hemi stanap from sea blong hem, an hemi tekemaot barava spesol kaleko blong hem. Hemi werem ravis kaleko tu, an hemi go sidaon insaet long asis blong faea. 7Hemi sendemaot toktok blong hem go long olketa pipol blong Nineve wea hemi olsem, “Mi nao mi king blong yufala. An mi wetem olketa bikman blong mi, mifala odarem yumi evriwan, olketa pipol wetem olketa buluka an olketa sipsip blong yumi, bae yumi mas no kaikaim o dringim enisamting. 8Yumi mas werem olketa ravis kaleko an taengem olketa ravis blangket raonem olketa animol blong yumi. An yumi evriwan mas prea strong long God, an yumi mas lusim olketa ravis wei blong yumi. 9Maet God bae hemi save sore long yumi an hemi lusim wei blong hem fo kros long yumi, an bae yumi no dae.”#Joel 2:14; Jona 1:6.
10God hemi lukim olketa samting ya wea olketa duim, an hemi lukim dat olketa lusim ravis wei blong olketa. So, hemi sore long olketa, an hemi no panisim olketa olsem wea hemi bin talem bifoa.#Eksodas 32:14.
Currently Selected:
Jona 3: SIPB
Highlight
Share
Copy
Want to have your highlights saved across all your devices? Sign up or sign in
Pijin Catholic Bible © Bible Society of the South Pacific, 2008.