Jona 2
2
Profet Jona hemi prea long Yawe
1Taem Profet Jona hemi stap insaet long bele blong bikfala fis ya, hemi prea olsem long Yawe hu hemi God blong hem,
2“Yawe, taem trabol hemi kasem mi, mi singaot go long yu,
an yu lisin kam long mi an yu ansarem mi.
From bele blong Grev#2:2 “Grev” Long Hibru langguis, disfala wod hemi “Siol” wea hemi minim “ples blong man dae”. Lukim long Provebs 30:16; Aesaea 5:14; Habakuk 2:5. mi kraeaot long yu,
an yu herem voes blong mi.
3Yu torowem mi godaon long barava dip si,
wea solwata hemi kavarem mi finis,
an olketa bikfala wev i gohed fo brek antap long mi.
4Mi tingse mi bin lus finis from yu,
an bae mi kanduit lukim moa Tambuhaos blong yu.
5Mi dringim solwata go-go mi kolsap dae nao.
Solwata ya hemi kolsap draonem mi,
an gras long solwata hemi taemapem hed blong mi.
6Hemi olsem wea mi singdaon
barava long botom blong olketa maonten.
An graon ya hemi satem mi
olsem wea mi insaet long prisin,
an mi kanduit kamap fri moa.
“Bat Yawe, yu nao yu God blong mi,
an yu sevem laef blong mi,
olsem wea yu bin tekem mi aot
from grev blong mi.
7O Yawe, mi tingim yu
long disfala taem wea mi kolsap dae.
Prea blong mi hemi kasem yu
long Tambuhaos blong yu.
8Evriwan hu i holetaet long olketa laea god,
olketa ya i nating tinghevi long yu.
9Bat bae mi singsing fo preisim nem blong yu,
an bae mi mekem sakrifaes fo talem tengkiu long yu.
Evrisamting wea mi promisim long yu
bae mi duim.
!Yawe nomoa save sevem man!”
10Taem Jona hemi prea olsem, Yawe hemi tok long fis ya, an hemi gosoa an toraotem profet ya long sanbis.
Currently Selected:
Jona 2: SIPB
Highlight
Share
Copy
Want to have your highlights saved across all your devices? Sign up or sign in
Pijin Catholic Bible © Bible Society of the South Pacific, 2008.