Jona 4
4
Profet Jona hemi kros long Yawe
1Bat Profet Jona hemi no hapi abaotem wei wea God hemi no panisim olketa, an hemi kros tumas. 2So hemi prea olsem, “Yawe, taem mi stap yet long kantri blong mi, mi save finis wea yu save fogivim pipol. Dastawe nao mi trae fo ranawe go long Spen. Mi save finis wea yu kaen tumas an yu save sore long pipol. Yu no save kros kuiktaem, an yu tinghevi tumas long pipol. Ya, yu redi olowe nomoa fo fogivim pipol, an i no fo panisim olketa.#Eksodas 34:6; Joel 2:13. 3Bat Yawe, letem mi dae. ?Fo wanem nomoa mi laef? Hemi moabeta fo mi dae nomoa.”#1 Kings 19:4.
4Yawe hemi tok olsem, “Jona. ?Waswe, hemi stret nomoa fo yu kamap kros olsem?”
5Jona hemi goaot from taon ya, long saet long ist. Hemi wakem wanfala smolfala lif haos an hemi sidaon insaet long hem fo haed from san, mekem hemi save lukim wanem nao bae hemi kasem Nineve. 6Yawe God#4:6 “Yawe God” Disfala nem blong God hemi no kamap staka taem long Oltestamen. Samfala pipol biliv Jona hemi yusim disfala nem fo mekem yumi tingbaek long Jenesis sapta 2 an 3 wea Yawe hemi mekem evrisamting long skae an graon. hemi mekem wanfala vaen tri fo grouap bikfala kolsap long Jona, an tri ya hemi givim sado long hem, mekem Jona hemi filgud moa. Jona hemi barava hapi tumas long tri ya. 7Bat long eli moning long neks de, God hemi mekem wom fo kaikaim disfala vaen tri, an tri ya hemi dae nao. 8An long taem wea san hemi kamap, God hemi mekem ist win fo blou wea hemi barava hot fogud. An hot san ya hemi saen daon long hed blong Jona, mekem hemi wik fogud. Nao hemi tok olsem, “?Fo wanem nomoa mi laef? Hemi moabeta fo mi dae nomoa.”
9Yawe hemi tok olsem long hem, “?Waswe, hemi stret nomoa fo yu kamap kros abaotem vaen tri ya?”
Jona hemi ansarem hem olsem, “!Ya! !Hemi stret nomoa! !Mi kros tumas ya! !Hem nao mi wande dae!”
10Nao Yawe hemi tok olsem long hem, “Vaen tri ya hemi grouap kam long wanfala naet nomoa, an long neks de hemi dae. Yu nating plantem o mekem hem grou, bat yu sore tumas long hem. 11Tri ya wea yu sore long hem, hemi smolfala tumas. Bat disfala taon long Nineve hemi bikfala tumas, an winim 120,000 pipol nao i stap long hem. Tingting blong olketa hemi olsem nomoa smolfala pikinini hu hemi no save yet wanem hemi gud o wanem hemi nogud, an plande animol tu i stap long ples ya. ?Waswe, yu barava tingse hemi no fitim fo mi sore long olketa ya?”#Diutronomi 1:39; Aesaea 7:15-16; Esikiel 33:11.
Currently Selected:
Jona 4: SIPB
Highlight
Share
Copy
Want to have your highlights saved across all your devices? Sign up or sign in
Pijin Catholic Bible © Bible Society of the South Pacific, 2008.