Provebs 3
3
Toktok fo helpem olketa yanga
1San blong mi, tingim olketa tising blong mi,
an no fogetem olketa toktok blong mi.
2Sapos yu duim olsem, bae yu no sot long enisamting an bae yu garem longfala laef.
3No lusim wei fo lavem pipol, an kaen long olketa olowe.
Somaot long laef blong yu olsem wanfala nekles, kipim insaet long haat blong yu.
4Sapos yu duim olsem, bae God hemi hapi long yu, an pipol tu bae hapi long yu.
5Trastem Yawe long ful haat blong yu.
Yu no dipen nomoa long save blong yu seleva.
6Tingim Yawe long evrisamting, an bae hemi stretem rod blong yu.
7Yu no tingim yu seleva nao waes,
tinghae long Yawe an tanem baeksaet long evri nogud samting.
8Sapos yu duim olsem, bae yu helti, an yu save filgud.
9Mekhae long Yawe long wei wea yu givim go fas kaikai from gaden blong yu long hem.
10Sapos yu duim olsem, bae yu garem plande kaikai fo kipim, an bae yu garem staka waen.
11San blong mi, yu no les long strongfala toktok blong Yawe,
yu no taet long wei wea hemi stretem yu.#Job 5:17.
12Olsem dadi hemi lavem san blong hem,
Yawe hemi stretem eniwan hu hemi lavem.#Hibrus 12:5-6; Revelesin 3:19.
13Man hu hemi faendem save an hu hemi garem waes,
hem nao hemi hapi.
14Waes hemi gud moa winim silva,
an save hemi hae moa winim gol.
15Waes hemi gud moa winim olketa pel an daemen,
no enisamting wea yu laekem tumas hemi save winim hem.
16Hemi givim yu plande gudfala samting an longfala laef tu, mekem pipol tinghae long yu.
17Olketa wei blong hem hemi naes tumas,
an yu save falom hem fo kasem piis.
18Waes hemi olsem tri wea yu save laef long frut blong hem,
holem frut blong hem an bae yu hapi.
19Yawe hemi yusim waes fo mekem wol,
an long save, hemi mekem skae.
20Long save, Yawe hemi mekem riva fo ran,
an hemi mekem ren foldaon from klaod.
21San blong mi, yu holetaet long waes blong yu, an kipim gudfala tingting.
Lukaot, nogud yu lusim tufala.
22Tufala save givim gud laef long yu,
an laef blong yu bae hemi luknaes.
23Ya, bae yu stap gud an sef an bae yu no save foldaon.
24Bae yu slip gud long naet, an bae yu no fraet.
25Kuiktaem nomoa trabol save kasem ravis pipol.
Bat yu no fraetem samting ya.
26Yawe hemi barava lukaftarem yu,
an bae hemi no letem yu foldaon long trap.
27Sapos yu save helpem eniwan hu i nidim, yu mas duim nao.
28Taem yu save helpem wantok, duim tude. No weitem tumoro.
29Yu no mekem plan fo spoelem wantok, hem ya hemi trastem yu.
30Sapos man no duim eni ravis samting long yu,
yu no raoa long hem.
31Yu no joles long olketa man fo faet, an no falom wei blong olketa.
32Yawe no laekem olketa ravis man ya.
Hemi trastem olketa stretfala man, an talemaot tingting blong hem long olketa.
33Yawe mekem trabol kasem famili blong nogud man,
bat hemi blesim famili blong stretfala man.
34Hemi daonem olketa hu i tokdaonem nara man,
bat hemi kaen long olketa hu i hambol.#Jemes 4:6; 1 Pita 5:5.
35Pipol hu i waes bae garem gudfala nem,
bat pipol hu i krangge bae garem ravis nem nomoa.
Currently Selected:
Provebs 3: SIDC
Highlight
Share
Copy
Want to have your highlights saved across all your devices? Sign up or sign in
Pijin Catholic Bible © Bible Society of the South Pacific, 2008.