Provebs 2
2
Evri gud samting wea Waes Toktok save givim
1San, herem toktok blong mi,
tingim evrisamting mi talem.
2Herem evri waes toktok ya,
an traehad fo garem save.
3Kolaot go long waes man fo garem save,
an askem hem fo mekem yu save long olketa samting.
4Traehad fo lukaotem waes,
olsem yu traehad fo lukaotem seleni.
5Sapos yu traehad olsem, bae yu save hao fo tinghae long Yawe,
an garem save long God.
6Yawe nomoa hemi mekem yu waes,
an toktok blong hem hemi givim save long yu.
7Hemi helpem stret pipol fo kamap waes,
an hemi gadem pipol hu falom wanem hemi tru.
8Hemi lukaftarem olketa hu i falom stretfala wei,
an hemi gadem olketa hu i tinghevi long hem.
9Lisin long mi, an bae yu save wanem hemi gud an stret,
an wanem hemi stret fo duim.
10Ya, bae yu kamap waes,
an save blong yu bae mekem yu hapi.
11Gudfala tingting, hemi save lukaftarem yu,
an wei fo save mining blong olketa samting, hemi save helpem yu.
12Ya, waes hemi save sevem yu from olketa ravis pipol,
an from pipol hu save toknogud.
13Pipol olsem i lus finis, an stap nao long tudak.
14Olketa ya i hapi long evri ravis samting, an falom olketa ravis wei.
15Pipol olsem i laea tumas, yu no save trastem.
16Lisin long mi, an bae yu sef from suit toktok blong nogud woman.
17Hemi lusim finis hasban blong hem, an fogetem finis promis long God.
18Haos blong woman ya hemi ples fo dae, go long hem an bae yu dae.
19No eniwan hu hemi go long nogud woman ya, hemi save kambaek.
Hemi no save kambaek long wei fo garem laef.
20Falom wei blong gud man,
an bae yu go long stretfala rod.
21Stretfala pipol wea yu save trastem,
olketa nao bae save stap gud long ples blong olketa olowe.
22Bat bae God hemi aotem an torowem olketa ravis pipol an evri nogud man from ples blong olketa.
Currently Selected:
Provebs 2: SIDC
Highlight
Share
Copy
Want to have your highlights saved across all your devices? Sign up or sign in
Pijin Catholic Bible © Bible Society of the South Pacific, 2008.