Provebs 4
4
Waes Toktok hemi nambawan
1!Olketa pikinini!
Lisin kam gudfala long olketa tising blong mi,
an bae yufala save gudfala.
2Olketa gud samting nao, mi talem long yufala,
so yufala no les long olketa.
3Taem mi nomoa san blong mami an dadi blong mi,
4dadi hemi tisim mi an tok olsem,
“San, tingim evrisamting mi talem yu,
barava falom an bae yu laef.
5Kasem waes an kasem gudfala save.
Yu mas no fogetem tufala,
an nating givap long toktok blong mi.
6Yu no les long waes, an bae hemi gadem yu.
Laekem hem tumas, an bae hemi helpem yu.
7Waes hemi nambawan, yu mas garem.
Nomata gudfala save hemi dia tumas, yu mas garem tu.
8Tinghae long waes toktok, an bae olketa mekhae long yu,
holetaet long hem, an bae olketa tinghae long yu.
9Bae hemi olsem naes flaoa raonem nek blong yu,
an bae yu garem trufala biknem long hem.”
Gudfala wei an Ravis wei
10Pikinini, lisingud long mi,
tinghevi long toktok blong mi an bae yu garem longfala laef.
11Mi tisim yu fo kamap waes,
an mi lidim yu long stretfala wei.
12Falom an bae yu stret,
taem yu ran long hem bae yu no foldaon.
13Holetaet long waes toktok ya, gadem gud, hemi laef blong yu.
14No falom nogud wei, an no falom wei blong ravis pipol.
15!No falom wei ya! !Yu mas tane go long deferen wei!
16Olketa ya no save slip gogo olketa duim
eni nogud samting, o spoelem narafala man.
17Wei nogud an wei fo faet nao i olsem kaikai an dring blong olketa.
18Bat stretfala wei hemi olsem fas laet long moning,
hemi gohed fo saen gogo hemi olsem san hemi kamap.
19Bat wei blong ravis pipol hemi olsem tudak,
olketa nating save nomoa wanem i mekem olketa foldaon.
20Pikinini, herem gud wanem mi talem,
lisin gud long toktok blong mi.
21Yu mas lukluk long hem olowe,
an tingting tumas long hem.
22Savegud long hem, an bae yu laef,
an bodi blong yu i save gudbaek.
23Kontrolem tingting long haat blong yu,
laef blong yu hemi kamaot long hem.
24No laea olsem konman,
talem nomoa trutoktok.
25Luk stret long gogo blong yu, no luk olobaot.
26Planem gud wanem yu wande duim,
evrisamting bae stret nomoa ya.#Hibrus 12:13.
27Yu no tane go long lefsaet o long raetsaet from stretfala wei,
bat tane goawe from wei nogud.
Currently Selected:
Provebs 4: SIDC
Highlight
Share
Copy
Want to have your highlights saved across all your devices? Sign up or sign in
Pijin Catholic Bible © Bible Society of the South Pacific, 2008.