SWIRILO 4
4
Ta makhombo ya tiko emasikwini ya ku hela ka Yerusalema.
1Xana nsuku wu hundzukisile ku yini ntima?
Nsuku lowu nga ringiwa endzilweni wu hundzukisile mavala hi yini?
Maribye ya vukwetsimelo ma hangalasile ku yini
Emitsendzeleni hinkwayo xana?
2Vana va Siyoni lavanene
Va ringanisiwe ni nsuku lowu lulameke,
Va hlayiwile ku yini kukota makhuwana ya vumba,
Yi nga mitirho ya mavoko ya muvumbi.
3Swi tsandza ni timhisi ti humesa vele
Ku an'wisa vana va tona;
Kambe nhwanyana wa tiko ra mina yena wa nonon'hwa ngopfu,
Kukota tiyimbhu ta mananga.
4Ririmi ra risana ri namarhele enon'wini wa rona,
Hi ku omisiwa hi torha;
Lavatsongo va kombela vuswa,
Kambe ku hava loyi a va phamelaka.
5Lava ngi va dya swo nandziha
Va fa hi ndlala emitsendzeleni;
Lava ngi va phutseriwile hi xivunguvungu,
Va sivamile ethyakeni.
6Ku biwa ka nhwanyana wa tiko ra mina
Ingi kukulu ku tlula ka Sodoma,
La nga wisiwa hi nkarhinyana,
Ku nga ri na mavoko lama rhumeriweke kona.
7Vafumi va kona a va tengile ku fana ni gamboko,
Va basile kukota ntswamba;
Mimiri ya vona a yi tshwukile ku hundzisa korale,
Tinghohe ta vona a ti fana ni ribye ra safiri.
8Tinghohe ta vona ti nyamile ku hundzisa ntima;
A va ha tiviwi emitsendzeleni;
Nhlonge ya vona yi namarhele emarhambyini ya vona,
Yi omelele tanihi rikunyi.
9Ku katekile lava dlayiweke hi tlhari,
Ku tlula lava nga dlayiwa hi ndlala;
Vona va wile va hele matimba
Hi ku pfumala leswi vekiwaka hi nsimu.
10Mavoko ya vavasati, hambi ma ri ya lavo olova
Ma swekile vana va vona,
Va vile swakudya swa vona
Eku onhakeni ka nhwanyana wa tiko ra mina.
11Yehovha u hetisile vukari bya yena;
U halatile vukari lebyi pfurhaka bya yena.
Kutani u tshiverile ndzilo eSiyoni,
Lowu nga dya masungulo ya yena.
12Tihosi ta misava, ni vaaki hinkwavo va matiko,
A va pfumelanga leswaku
Nala ni mukanganyisi va ta va va nghena
Hi tinyangwa ta Yerusalema.
13Swona swi humelele hikwalaho ka swidyoho swa vaprofeta va yena,
Ni vukanganyisi bya vaprista va yena,
Lava nga halata exikarhi ka wona
Ngati ya lava lulameke.
14A va ri karhi va rhendzeleka tanihi vo fa mahlo emitsendzeleni,
Va tinyamisile hi ngati;
Kutani tinguvu ta vona;
A ti nga ri na ku khumbiwa.
15“Sukani, n'wina mi tinyamiseke!”
Ku huweleriwe sweswo eka vona;
“Sukani, sukani!
Mi nga tshuki mi khumba!”
Kuteloko va balekile, a ku ri ku tsendzeleka;
A va ku exikarhi ka matiko:
“A vanga vuyeli va aka kona.”
16Mombo wa Yehovha wu hangalasile,
Evukarini bya yena a nga tlheli a va languta.
A va vanga na xichavo eka vaprista,
A va tsetselelanga swidyuhati.
17Ni namuntlha mahlo ya hina ma hela
Hi ku langutela ku pfuniwa ka hina ka hava;
Eku languteleni ka hina, a hi langutela hi ku tshemba
Eka tiko leri nga riki na ku hi ponisa.
18A va xiya ku famba ka hina
Leswaku hi nga tshuki hi famba etimbaleni ta ka hina;
Ku hela ka hina ku kusuhi; masiku ya hina ma herile;
Hikuva sweswi, ku fikile ku hela ka hina.
19Vaxanisi va hina va ni matsamba
Ku tlula magama ya le henhla;
Va hi hlongorisa etintshaveni;
Emananga va hi celela marindzi.
20Loyi a nga va ku hefemula ka hina, a ri muhlawuriwa wa Yehovha,
U phasiwile erindzini ra vona,
A ri loyi, a hi ku:
“Hi ta hanya endzhutini wa yena exikarhi ka matiko.”
21Tsaka, u tsakisisa, nhwanyana wa Edomu,
La akeke etikweni ra Usi!
Xinwelo xi ta fika ni le ka wena;
Na wena u ta pyopya, u va u hluvula tinguvu.
22Nandzu wa wena wu hetisiwile, nhwanyana wa Siyoni;
A ku nga ha vi na loyi a ku yisaka evukhumbini.
Ku ta lavisisiwa ku homboloka ka wena, nhwanyana wa Edomu,
Yehovha u ta funungula swidyoho swa wena.
Currently Selected:
SWIRILO 4: TSO29
Highlight
Share
Copy
Want to have your highlights saved across all your devices? Sign up or sign in
Bible in Xitsonga 1929/2012 © Bible Society of South Africa 2012. Digital Version © Bible Society of South Africa 2012. All rights reserved. www.biblesa.co.za.