SWIRILO 3
3
Ta mahlomulo ni ku chaveleriwa.
1Hi mina munhu la voneke mahlomulo
Hi nkhavi wa vukari bya wena.
2U ndzi fambisile, a ndzi yisa emunyameni,
Ku nga ri eku vonakaleni.
3Kunene u yimile emahlweni ka mina,
A ndzi hundzuluxela voko ra yena siku hinkwaro.
4U herisile nyama ya mina ni nhlonge ya mina,
U tshovile marhambu ya mina.
5U ndzi manyile hi rirhangu,
U ndzi rhendzele hi ku vaviseka ni makhombo.
6U ndzi tshamisisile etindhawini ta munyama
Hi mukhuva wa lava feke khale.
7U ndzi rhendzele hi khumbi leswaku ndzi nga tshuki ndzi huma;
U ndzi bohile hi tiketana leto tika.
8Na swona loko ndzi huwelela, ndzi kombela ku pfuniwa,
U sivile xikhongelo xa mina,
9U ndzi sivele tindlela ta mina hi maribye lama vatliweke,
U gombonyokisile tindlela ta mina.
10Eka mina, u kotise bere leyi ndzi bvutameleke,
Ni nghala leyi tumbeleleke.
11U hambukisile tindlela ta mina; a ndzi handzula;
A ndzi endla la kotisaka mananga.
12A konga vurha bya yena,
A ndzi veka tanihi pakana ya nseve.
13U nghenisile miseve ya gadzi ra yena
Exisutini xa mina.
14Ndzi hundzukile xisandzu xa tiko ra mina hinkwaro,
Ni risimu ra vona siku hinkwaro.
15U ndzi xurhisile leswo bava,
U ndzi pyopyisile hi nkaka.
16Kambe u fayile meno ya mina hi maribye,
U ndzi funengetile hi nkuma.
17U tsonile moya wa mina ku rhula,
Kutani a ndza ha tivi leswaku ku kateka i yini;
18Kutani ndzi ri:
“Ndzi helelwe hi matimba ya mina.
Ni ku langutela ka mina eka Yehovha.”
19Ehleketa ku onhaka ka mina ni ku xaniseka ka mina; nkaka ntsena ni nyongwa.
20Ndzi karhi ndzi titsundzuxa,
Kutani moya wa mina wu hela matimba endzeni ka mina.
21Hi tona leti ndzi nga karhi ndzi lwaka na tona embilwini ya mina,
Hikwalaho ndzi ta tshama ndzi ri karhi ndzi tshemba.
22I tintswalo ta Yehovha leti ti endleke leswaku hi nga tshuki hi lova,
Hikuva tintswalo ta yena a ti si hela;
23Ti tshama ti ri kona hi mixo wun'wana ni wun'wana;
Vunene bya wena byi kulukumba!
24Ku averiwa ka mina i Yehovha, ku vula sweswo moya wa mina;
Hikwalaho ndzi ta n'wi tshemba.
25Yehovha u ni tintswalo eka lava n'wi tshembaka,
Ni ka moya lowu n'wi lavaka.
26Swi lulamile eka munhu ku langutela hi ku rhula
Ku ponisiwa hi Yehovha.
27Swi lulamile eka munhu
Loko a rhwala joko ra yena evuntshweni bya yena.
28Swi lulamile, ni loko a titshamela a ri swakwe, a timiyelela
Nkarhi lowu Xikwembu xi n'wi leriseke wona.
29Ni loko ku ri ku veka nomu wa yena entshurini,
Swi ri leswaku kumbe ku tshemba ku kona.
30Ni loko ku ri ku nyika rhama ra yena eka loyi a n'wi phakataka,
Ni ku xurha xisandzu.
31Hikuva Hosi a nga ka a nga lahli munhu
Hilaha ku nga heriki.
32Kambe loko a n'wi ba hi nhlomulo,
U n'wi twela vusiwana hikwalaho ka vunyingi bya tintswalo ta yena.
33Hikuva mbilu ya yena a yi rhandzi ku twisa ku vaviseka
Ni ku xanisa vana va vanhu.
34Loko va kandziya hi milenge
Vabohiwa hinkwavo va tiko,
35Loko va hombolokisa ku lulama ka munhu
Emahlweni ka mombo wa La tlakukeke.
36Loko va tlherisa munhu enandzwini wa yena,
Xana Hosi a nga swi voni xana?
37I mani la nga ta vula mhaka, kutani yi humelela,
Loko yi nga lerisiwanga hi Hosi xana?
38Swilo leswo saseka ni leswo biha
Xana a swi humi enon'wini wa La nge henhla?
39Xana munhu la hanyaka a nga tivilerisa hi yini-ke?
Munhu un'wana ni un'wana a a tivilerise hi swidyoho swa yena.
40A hi lavisiseni tindlela ta hina, hi va hi tianakanya,
Kutani hi tlhelela eka Yehovha.
41A hi yimiseni timbilu ta hina ni mavoko ya hina,
Eka Xikwembu lexi nga ehenhla.
42“Hi dyohile hi va hi tiarisa;
Kutani wena a ku vanga u tsetselela.
43“U funengele vukari bya wena, kutani u hi hlongorisa;
U dlele, kutani a ku vanga u tsetselela.
44U tifunengetile hi papa,
Leswaku xikhongelo xa hina xi nga tshuki xi fika eka wena.
45U hi endlile ntshuri ni xisandzu,
Exikarhi ka matiko.
46“Hinkwavo lava nga valala eka hina
Va hi ahlamisele milomu ya vona.
47Hi humeleriwile hi ku rhurhumela ni ku phasiwa
Swin'we ni ku onhaka ni ku lova.
48Tihlo ra mina ri halata milambu ya mati
Hikwalaho ka ku onhaka ka nhwanyana wa tiko ra mina.
49“Tihlo ra mina ri karhi ri halaka mihloti, a ri miyeri,
A ku na laha ri nga tikhomaka,
50Yehovha a kondza a hlometela
Kutani a swi vona a ri ematilweni.
51Tihlo ra mina ri xanisa moya wa mina
Hikwalaho ka vanhwana hinkwavo va muti wa mina.
52“Lava ndzi vengeke ntsena
Va ndzi rhiyile hi xirimbana tanihi loko ndzi ri xinyanyana.
53Va tsemile vutomi bya mina ekheleni;
Va hoxile ribye ehenhla ka mina.
54Mati ma khapela enhlokweni ya mina,
Kutani a ndzi ku: ‘Ndzi tsemiwile.’
55Ndzi vitanile vito ra wena, oho Yehovha!
Ndzi ri ehansi enceleni wa vafi.
56“U yingisile rito ra mina, u nga tshuki u siva tindleve ta wena
Loko ndzi hefemuteka, ni loko ndzi huwelela eka wena.
57U ndzi tshinelele ekusuhi siku leri ndzi nga huwelela eka wena,
U ku: ‘U nga tshuki u chava.’
58“Hosi, u yimerile mhaka ya moya wa mina,
U kutsule vutomi bya mina.
59Yehovha, u vonile ku xanisiwa ka mina;
U ndzi avanyisela hi ku lulama!
60U vonile ku tirihisela hinkwako ka vona,
Ni ku ngurhangurha hinkwako ka vona!
61“U yingisile xisandzu xa vona, oho Yehovha!
Ni ku dzumadzuma hinkwako ka vona ehenhla ka mina,
62Ni milomu ya lava ndzi pfukelaka matimba,
Ni makungu ya vona ematshan'weni ya mina siku hinkwaro.
63Languta loko va tshama ni loko va pfuka,
Hi mina risimu ra vona.
64“Yehovha, u ta hakela hi hakelo leyi ringanaka
Mitirho ya mavoko ya vona,
65U va nyika timbilu leto nonon'hwa,
Ku rhukana ka wena a ku ve ehenhla ka vona.
66U va hlongorisa hi vukari bya wena,
Kutani u va herisa ehansi ka matilo, oho Yehovha!”
Currently Selected:
SWIRILO 3: TSO29
Highlight
Share
Copy
Want to have your highlights saved across all your devices? Sign up or sign in
Bible in Xitsonga 1929/2012 © Bible Society of South Africa 2012. Digital Version © Bible Society of South Africa 2012. All rights reserved. www.biblesa.co.za.