SWIRILO 5
5
Xikhongelo xa tiko endzhaku ka ku onhaka ka Yerusalema.
1Tsundzuka, wena Yehovha, leswi hi humeleriweke hi swona,
Kutani u vona xisandzu xa hina.
2Ndzhaka ya hina yi yile eka vamatiko,
Ni tindlu ta hina eka lava nga ehandle.
3Hi endliwile swisiwana leswi nga hava tatana;
Vamana wa hina va fana ni tinoni.
4Hi nwile mati ya hina hi ku xava hi mali;
Tihunyi ta hina hi ti kuma hi ku xava.
5Va hi tsutsumele hi ri karhi hi rhwele hi tinhamu ta hina;
Hi karhele, kambe a hi kumi ku wisa.
6Hi tshambulute mavoko eka Vaegipta ni ka Vaaxuru
Ku xurha hi vuswa.
7Vatata wa hina va dyohile, kutani a va ha ri kona,
Kutani hina hi rhwala makhombo ya ku dyoha ka vona.
8Hi fumiwa hi makhumbi;
Ku hava loyi a hi lwelaka emavokweni ya vona.
9Hi rholela vuswa bya hina hi ku tiveka ehansi ka rifu,
Emahlweni ka tlhari ra le mananga.
10Nhlonge ya hina yi hisa kukota xitiko
Hi vukari bya ndlala.
11Va onhile vavasati va le Siyoni,
Ni vanhwanyana emitini ya ka Yuda.
12Tihosi tin'wana ti hayekiwile hi mavoko ya tona;
Mimombo ya vakulukumba a yi xiximiwanga.
13Majaha ma byarisiwile maribye yo sila,
Lavantshwa va wele ehansi ka mirhwalo ya tihunyi.
14Lavakulu va lan'wile tihuvo,
Ni majaha ma tshikile magubu ya wona.
15Ku tsaka ka timbilu ta hina ku herile;
Ku cina ka hina ku hundzukile nkosi,
16Misingasoro yi wile etinhlokweni ta hina;
Hi ni khombo hina,
hikuva hi dyohile!
17Timbilu ta hina ta hela hikwalaho ka sweswo,
Ni mahlo ya hina a ma ha voni,
18Hikuva ntshava ya Siyoni yi onhakile,
Kutani timhungubye ti tifambela ehenhla ka yona.
19Wena, Yehovha u fuma hilaha ku nga heriki,
Xiluvelo xa wena xi kona hi masiku ni le mikarhini hinkwayo.
20Xana u nga hi rivala hilaha ku nga heriki?
Xana u nga hi lan'wa hi malembe ya ku tala xana?
21U hi hundzuluxela eka wena Yehovha,
hi ta tlhela hi vuya;
Endla leswaku masiku ya hina ma va lamantshwa,
tanihi le ku sunguleni.
22Xana u hi tshikele makumu xana?
Xana u hi hlunamele ku tlurisisa xana?
Currently Selected:
SWIRILO 5: TSO29
Highlight
Share
Copy
Want to have your highlights saved across all your devices? Sign up or sign in
Bible in Xitsonga 1929/2012 © Bible Society of South Africa 2012. Digital Version © Bible Society of South Africa 2012. All rights reserved. www.biblesa.co.za.