Daut Leet 3
3
See
1Ekj ligj enne Nachten em Bad,
un wensch mie von Hoaten mien Schauz;
ekj bang mie no am, doch hee kjemt nich.
2Ekj woa oppstonen un enne Staut gonen,
oppe Gaussen un wua ekj bloos kaun,
woa ekj sieekjen no däm, däm ekj leew.
Ekj socht, un ekj funk am nich.
3Dan fungen mie Wajchta, aus see Wajchta
enne Staut oppe Gaussen romjinjen.
Ekj fruach an, auf see mienen leefsten
to seenen jekjräajen hauden.
4Ekj jinkj mau jrod wieda, dan funk ekj mien Schauz;
un ekj schmeet miene Oarms rom am,
soo daut hee mie nich wada wajch kunn;
un dan brocht ekj am bat en ons Hus,
miene Mutta äa Hus un de Stow
wua ekj kjlien jewast wia.
5Vespräakjt mie, Mejales von Jerusalem,
bie daut Ree un Gazell oppe Stap;
daut jie dee, dee sikj goot sent, nich stieren
bat see nuach haben von äare Leew.
Daut dredde Leet
See
6Waut sticht enne Wiltnis soo opp,
aus de Ruak von een Fia,
un aus Weiruak un Mirren un Saulw Eelj,
waut Haundelslied brinjen?
7Nu kjikjt! Daut es de Benkj fa mien Kjennich.
Mien Salomo woat häajedroacht,
met 60 Soldoten runt om,
von de baste waut Israel haft.
8Dee han aula äa Jereetschoft aul bie sikj,
un vestonen sikj goot met däm Kjrich;
daut Schwieet henjt bie jiedrem aun de Sied,
un jeft Schutz fa Jefoa en de Nacht.
9De Kjennich Salomo leet sikj emol,
von daut Holt ut däm Libanon Woolt,
eenen Troon moaken, toom am romdroagen.
10Jieda Akjstekj betrock hee met Selwa;
daut Zeich aun de Län wia aus Golt,
un daut Settzeich, daut wia scharlachroot.
Von bennen hauden de Frulied von Jerusalem
daut leeftolich foadich jemoakt.
11Komt doch, jie Mejales von Zion,
un seet hia däm Kjennich Salomo,
un de Kroon dee de Mutta am oppsad,
oppe Kjast, aus hee soo jlekjlich wia.
Currently Selected:
Daut Leet 3: PB
Highlight
Share
Copy
Want to have your highlights saved across all your devices? Sign up or sign in
Plautdietsch Bible © 2003 Kindred Productions and United Bible Societies Association, Inc.